Chon Oruch mi Murinno Repwe Eu Feioch Ngenikich
“A murinno emon chon orum mi kan ngonuk lap seni emon pwium mi touau senuk.”—An Salomon Fos 27:10, New World Translation.
EMON sou tipatchem lon ewe aeuin senturi C.E. a eisini Jises: “Io wesewesen chon ori?” Lon an polueni, Jises a ereni, sap io mi wewe ngeni chon orun, nge met weween wesewesen emon chon orun. Eni en mi silei ussun an Jises we kapas monomon. Chommong ra silei ena kapas monomon ussun ewe re Sameria mi murinno mi mak lon ewe puken Luk. A iei ussun Jises a eani ewe poraus:
“Emon mwan a fefeitiu seni Jerusalem pwe epwe feilo Jeriko, o a sereni ekkoch chon sola. Ra pwiliti seni ufan, o ra wichi i. Iwe, ra feilo, ra likitalo atewe, nge i a chok arap ngeni malo. Iwe, a sereni pwe emon samol-fel a pwal feitiu won ewe al, nge lupwen a kuna atewe, a chok rikilo ewe epek. Pwal usun chok emon re Lifai, lupwen a tori ewe leeni o a kuna atewe, iwe, a pwal chok rikilo ewe epek. Nge emon re Sameria, lupwen an feilfetal, a tori ikewe atewe a nom ie. Iwe, lupwen a kuna atewe, a fakkun tongei i. Iwe, a feilo ren i o a niinalong lo me wain lon an kewe kinas, o a finitirelo. A pwal ekieta i won noun we man, a uweialo tori eu imwen wasola, o a pwal tumunu i. Iwe, soratan, a isenatiu ruu moni silfer, a ngeni mastaan ewe imwen wasola, o a apasa, ‘Kopwe tumunu atei, nge minne ka sopwei ngeni upwap liwini ngonuk lupwen ua liwinto.’ Iwe, ifa usun om meefi, io lein ekkewe ulumon a foralo pwe chon orun atewe mi feiengau ren ekkewe chon sola?”—Luk 10:29-36.
Ewe sou tipatchem a weweiti lesenin ena poraus. A muttir affata io chon orun ewe mwan mi feiengau: “Atewe mi pwari an angangen umoumoch ngeni i.” Iwe, Jises a apasa ngeni: “Kopwe feilo o fori usun chok.” (Luk 10:37) A ifa me watten pochokkulen ena kapas monomon mi och a pwarata met weween wesewesen emon chon oruch mi murinno! An Jises kapas monomon epwe tongeni pwal mwo nge amwokutukich ach sipwe eisini pwisin kich: ‘Met sokkun aramas ngang ngeni chon ori kkewe? Ua kan achocho ngeni ai upwe foffor-murinno ngenir?’
Ia Sipwe Poputa Ia?
Ika sia meefi lamoten ach sipwe lipwakochulo lon ei mettoch, epwe lamot ach sipwe poputa ren ach ekiek. Sipwe ekilapei ach sipwe wiliti emon mi murinno ngeni chon oruch kkewe. Epwe tongeni alisata ach sipwe nouni chon oruch kkewe mi murinno. Arapakkan ruu ngerou ier lom, Jises a apochokkula ena popun alongolongun alluk ussun foffor lefilen aramas lon an Afalafal won ewe Chuuk mi itefoulo. A apasa: “Iei minne, mettoch meinisin minne oua mochen pwe aramas repwe fori ngenikemi, epwe chok iei usun ami oupwe fori ngenir.” (Mattu 7:12) Om kopwe pwarata sufol, mennin, me kirokiroch ngeni ekkewe ekkoch epwe amwokutur ar repwe pwal ina ussun ngonuk.
Pwungun pwe eni chommong leich sise meefi kinamwe ren ach sipwe arap ngeni chon oruch kkewe. Epwe ussun ita nge a mecheres ach sipwe chok alaemon. Iwe nge, ewe Paipel a apasa pwe “feiochun liffang mi lap seni feiochun angei.” (Foffor 20:35) Ina minne, emon mi murinno ngeni chon orun kkewe epwe achocho le silei ekkewe aramas lon leenian we. Inaamwo ika esap ekiekin chiechi ngenir, nge fan ekkoch epwe sotun fos ngeniir, poputa ren an emelimel are kapong ngeniir.
Ekkewe kukkun minen alillis aramas repwe fori fan iten chon orur kkewe ra foratiu me apochokkula ar chiechifengen. Ina minne, epwe murinno ach sipwe kutta met sokkun foffor mi kirokiroch sipwe tongeni foffori ngeni emon chon oruch we, pun fan chommong epwe efisata eu ngunun alillisfengen me sufolfengen. Pwal eu, ren ach sipwe fori ena, sipwe apwonueta an ewe Paipel kapasen pesepes, a era: “Kosap amwochu minne mi murinno seni aramas mi fich ngeni ar repwe kuna, lupwen ka tufich ngeni.”—Proverbs 3:27; Jemes 2:14-17.
Ewe Foffor-Murinno ngeni Chon Oruch mi Lap Seni Meinisin
Emon chon oruch mi murinno epwe akkaeuin auchea lon fansoun efeiengau are weires. Lon fansoun weires, epwe pwapwalo ewe ngunun alillisfengen lefilen chon eu sopw. Mei wor chommong poraus ussun ekkewe fofforun alillisfengen lon ekkena sokkun fansoun. An aramas nomfengen fan eu sokkun weiresin manauer a kkan amwokutur ar repwe alillisfengen me awattei ar kkewe foffor-murinno lefiler.
An aramas selani aramas mwirin eu fansoun efeiengau, ina eu fofforun alillis mi murinno me pwora. Iwe nge, ach sipwe selani manauen emon chon oruch ren ach sipwe ouroura i me mwen an epwe fis ewe feiengau epwe eu fofforun alillis mi fokkun auchea seni. Nge iei eu poraus mi alolilen pwe uruwo a pwarata pwe aramas rese nguuri chokkewe mi ourourer ussun eu minen efeiengau epwe toriir, pun atun a katou ewe kapasen ourour, esaamwo wor minen pwarata pwe epwele fis ewe feiengau. Fan chommong, aramas resap luku ekkewe chon ourourer. A lamot ngeni ir mi ekiekin alisi chokkewe rese silei ussun kanotoon ewe minen efeiengau ar repwe likiitu me pennukuolo pwisin letiper.
Ikenai, eu mettoch mi lapalap seni eu molumol are kiteter epwele tori aramas. Ina eu foffor mi fen oesini pwe ewe Kot mi Unusen Tekia epwe tolu seni fonufan atai alluk, fofforingau, me ekkewe osukosuk mi popu seni. (Pwarata 16:16; 21:3, 4) Epwe wesewesen fis ena fansoun! Ukukun ar tufich, Chon Pwarata Jiowa ra fokkun mochen uwei ngeni aramas ewe sokkun sile mi lamot fan iten aramas repwe ngaselo seni minne epwe fis won fonufan. Ina pwata ra tinikken lon ewe angangen afalafal aramas won unusen fonufan ra kkan sinnelo ren. (Mattu 24:14) Ra achocho ar repwe foffor-murinno ngeni chon orur kkewe.