Kaeo Le Silei An Jiowa Kewe Aal
“Kopwe aiti ngeniei om akot pwe upwe sileek.” —EKISTOS 33:13.
MOSES a maarita lon imwen Farao me a sukul me ren ewe tipatchem ekkewe nouwis lon Isip ra aucheaani. Nge, Moses a weweiti pwe i esap re Isip. Seman me inan ir chon Ipru. Lupwen a tori 40 ierin, a feilo pwe epwe afonua pwiin kewe, noun Israel kewe. Lupwen a kuna emon re Isip a eriaffou emon re Ipru, Moses a ningeringer. A nnielo ewe re Isip. Moses a filata an epwe peni noun Jiowa kewe aramas me a ekieki pwe Kot a nounou an epwe angasalo pwiin kewe. (Fofor 7:21-25; Ipru 11:24, 25) Lupwen ei poraus a pwalo, ekkewe nouwisin Isip ra ekieki pwe Moses emon chon atai alluk, iwe a ssu pwe esap ninniilo. (Ekistos 2:11-15) Ika Kot a nouni Moses noun chon angang, a lamot Moses epwe alapalo an kaeo an Jiowa kewe aal. Moses epwe tufichin kaeo?—Kol Fel 25:9.
2 Ren ekkewe 40 ier mwirin, Moses a wiliiti emon chon siamu lon eu fonu me emon chon masen siip. Moses ese song pokiten pwiin kewe chon Ipru rese aucheaani i, nge a anomu i fan letipen Kot. Inaamwo ika chommong ier ra lo me a ussun ita aramas rese ekieki ussun i nge, Moses a mut ngeni Jiowa an epwe alapalapa lapalapan kewe. Moses ese pwisin sikasini lapalapan kewe nge a mak fan nemenien an Kot ngun mi fel: “Moses eman mwan mi tipetekison, a fokun tipetekison seni aramasen fanufan meinisin.” (Numperis 12:3) Jiowa a nounou Moses le fori chommong mettoch mi amwarar. Ika sipwe amaaraata tipetekison, Jiowa epwe pwal efeiochukich.—Sefanaia 2:3.
Moses A Eani Eu Wiis
3 Eu ran, emon chonlangin Jiowa a kapas ngeni Moses lupwen a kan ngeni Chuuk Horep lon Sainai. A ereni Moses: “Ua kuna riafoun nei aramas mi nonom Isip o rongorong ar sio pokiten an chon Isip nemenemengau ngeniir, ua pwal silei ar weires meinisin. Iwe, ua feitiu pwe upwe angaseer seni chon Isip, upwe pwal emwenirewu seni ewe fanu o emwenirelong lon eu fanu mi och o watte, eu fanu mi pwuluoch o fanueras.” (Ekistos 3:2, 7, 8) Ina minne, mei wor angang Kot a awiisa ngeni Moses nge, epwe fori fan emmwenien Jiowa.
4 Ewe chonlangin Jiowa a pwal apasa: “Etto, upwe tinukela ren Farao pwe kopwe emwenawu nei kewe aramasen Israel seni lon Isip.” Moses a pireir. Ese meefi pwe a tufichin fori ei angang, me pwungun pwe ese fokkun tufichin fori ika a chok eani apilukuluk won an tufich. Iwe nge, Jiowa a alukuluku Moses: “Ngang upwe etuk.” (Ekistos 3:10-12) Jiowa a atufichi an Moses fori ekkewe esissin mi manaman pwe epwe anneta pwe a feito seni Kot. Pwiin Moses itan Arun epwe fiti i pwe epwe chon aueni auen Moses. Jiowa epwe aiti ngeniir met repwe apasa me fori. (Ekistos 4:1-17) Moses epwe apwonueta wiisan fan tuppwol?
5 Le poputaan, ekkewe souakkomwen aramasen Israel ra luku alon Moses me Arun. (Ekistos 4:29-31) Iwe nge, mwirin ekis chok fansoun “ekewe souemwenin angang seni Israel” ra tipi ngeni Moses me pwiin we pwe ra ‘apwongaueer’ mwen mesan Farao me noun kewe chon angang. (Ekistos 5:19-21; 6:9) Lupwen ekkewe chon Israel ra su seni Isip, ra niuokkus lupwen ra kuna pwe ekkewe chon Isip ra cheer won waar kewe woken. Ekkewe chon Israel ra meefi pwe ra ssar pokiten ewe Setipar a nom mwer me ekkewe waa fan iten maun ra tapweer. Ra tipi ngeni Moses. Ita epwe fet meefiom? Inaamwo ika esor waar kewe fan iten ar repwe sai won saat nge, Moses, fan emmwenien Jiowa, a pesei ekkewe aramas ar repwe ammonlata le feilo. Mwirin Kot a kinifeseni ewe Setipar, me ewe matau a wiliiti fonuepwas pwe ekkewe chon Israel ra tongeni fetalelong lon.—Ekistos 14:1-22.
Eu Popun Alongolongun Kapwung Mi Lamot Lap Seni Ngaselo
6 Jiowa a menlapei ewe lamoten ewe it mi pin lupwen a awiisa ngeni Moses wiisan. Sufol ngeni ena it me fan iten ewe Emon a iteni ena it a fokkun lamot. Lupwen Moses a eisini Jiowa ussun itan, a polueni: “Ngang ngang echok.” Pwal och, Moses epwe ereni noun Israel kewe: “Jiowa, an ami kewe lewo Eperiam, Aisak me Jekop we Kot a tinieito remi.” Jiowa a pwal apasa: “Iei itei tori feilfeilochok, nge ren ei it oupwe chechemeni seni eu tappin aramas tori eu tappin.” (Ekistos 3:13-15, NW) Jiowa ewe it Kot a chuen sinnelo ren lein noun kewe chon angang won unusen fonufan.—Aisea 12:4, 5; 43:10-12.
7 Mwen mesen Farao, Moses me Arun ra esilei ar poraus fan iten Jiowa. Nge Farao a lamalam tekia, iwe, a apasa: “Io na Jiowa pwe upwe auselinga alon o tinalo Israel? Use silei Jiowa, usap pwal mut ngeni Israel pwe repwe feilo.” (Ekistos 5:1, 2, NW) Farao a pwarata an tipeforea me likotupotup nge, Jiowa a pese ngeni Moses le chuuri Farao fan chommong pwe epwe esile ngeni an kewe poraus. (Ekistos 7:14-16, 20-23; 8:1, 2, 20) Moses a kuna pwe Farao a song. Epwe wor lamoten an chuurisefalli Farao? Israel ra mochen ngaselo. Farao ese fokkun mochen angaseerelo. Ika en Moses, met kopwe fen fori?
8 Moses a esilei pwal eu poraus ngeni Farao: “Iei alon ewe Samol mi Lapalap [Jiowa, NW] an chon Ipru we Kot, ‘Kopwe mwut ngeni nei aramas pwe repwe feila o fel ngeniei.’ ” Kot a pwal apasa: “Ua fen tongeni aitiela pei o afeiengauok me noum kewe aramas ren matter, pwe manauemi epwe muchula me won fanufan. Nge ua mwut ngonuk pwe kopwe manau tori ikenai pwe upwe pwari ngonuk ai manaman, pwe itei epwe foula won unusen fanufan.” (Ekistos 9:13-16) Ren an apwungu ewe Farao mi tipeforea, iei ussun Jiowa a mochen pwaralo an manaman me awora minen ourour ngeni chokkewe mi u ngeni i meinisin. Epwe kapachelong Setan ewe Tefil, ewe emon Jises Kraist a eita ngeni ewe “samolun fonufan.” (Jon 14:30; Rom 9:17-24) Ussun chok a fen piin oesini, iten Jiowa a esilesilfeil won unusen fonufan. An mosonottam a amanaua ekkewe chon Israel pwal “chomong sokopaten mwichen aramas” ra fitiir le fel ngeni i. (Ekistos 9:20, 21; 12:37, 38) Seni ena fansoun, esileifeiliin iten Jiowa a efeiochu pwal fite milion aramas mi etiwa ewe fel mi enlet.
Angangfengen Me Aramas Mi Tipepochokkul
9 Ekkewe chon Ipru ra silei ewe it mi pin. Moses a nounou ena it lupwen a fos ngeniir, nge rese pwarata sufol fansoun meinisin ngeni ewe Emon a iteni ena it. Ekiselo chok mwirin Jiowa a angaseerelo seni Isip, met a fis lupwen rese muttir kuna unumer konik? Ra ngunungunungau ngeni Moses. Mwirin, ra ngunungunungau ussun ewe mongo. Moses a ouroureer pwe rese chok ngunungunungau ngeni i me Arun nge ngeni Jiowa. (Ekistos 15:22-24; 16:2-12) Won ewe Chuuk Sainai, Jiowa a ngeni ekkewe chon Israel ewe Alluk, me a pwar ngeniir an manaman mi amwarar. Iwe nge, ekkewe aramas ra alleasolap ren ar fori emon kou mi ffor seni kolt pwe repwe fel ngeni me ra apasa pwe ra pwapwaesini “eu chulap fan iten ewe Samol mi Lapalap.”—Ekistos 32:1-9.
10 Ifa ussun Moses epwe angang ren aramas mi uloforea me ren Jiowa? Moses a tingormau ngeni Jiowa: “Ika ua kuna umoumoch me reom, kopwe aiti ngeniei om akot pwe upwe sileek o kukuna umoumoch me reom.” (Ekistos 33:13) Lupwen ekkewe overseer chon Kraist ra tumunu noun Jiowa kewe Chon Pwarata ikenai, ra mammasa eu mwich mi tipetekison lap seni muun Israel. Nge, ra chuen appiru Moses le tingor: “SAMOL, kopwe esinei ngeniei lapalapen om kewe fofor; kopwe chok aiti ngeniei om kewe al.” (Kol Fel 25:4) An ekkewe overseer silei alen Jiowa kewe a atufichiir le pwakini ekkewe osukosuk lon eu lapalap mi tipeeu ngeni an Kot we Kapas me ngeni lapalapan kewe.
Met Jiowa A Kutta Seni Noun Kewe Aramas
11 Jiowa a aporausa ngeni noun kewe aramas lon ewe Chuuk Sainai met a kutta seniir. Mwirin, Moses a angei ruuacho sileit fau mi mak won ekkewe Engol Alluk. Lupwen a feitiu me won ewe chuuk, a kuna ekkewe chon Israel mi feffel ngeni ewe kou mi ffor seni kolt me a oturatiu ekkewe sileit fau ren song, iwe ra mokkukisetiu. Jiowa a makkeisefalli ekkewe Engol Alluk won ekkewe sileit fau Moses a fen falei. (Ekistos 32:19; 34:1) Ekkeei alluk rese siwil seni ewe fansoun Kot a akkom ngeniir. Moses epwe alleasochisiir. Kot a pwal affata ngeni Moses sorosorun we, pwe epwe pwari ngeni Moses ifa ussun epwe mwokutukut lupwen a tupuni Jiowa. Chon Kraist rese nonnom fan ewe Allukun Moses, nge met Jiowa a ereni Moses a kapachelong chommong kapasen alongolongun alluk rese fen siwil me ra chuen weneiti meinisin mi fel ngeni Jiowa. (Rom 6:14; 13:8-10) Sipwe kaeo ekkoch me lein ekkeei alluk.
12 Fel ngeni Jiowa chok. Muun Israel a rongorong lupwen Jiowa a apasa pwe repwe fel ngeni i chok. (Ekistos 20:2-5) Ekkewe chon Israel ra kuna chommong pisekin annet mi annetata pwe Jiowa ewe Kot mi enlet. (Tuteronomi 4:33-35) Jiowa a affata ngeniir pwe ese lifilifil met ekkewe ekkoch muu ra fori nge, esap mutata fel ngeni lios are angangen roong lein noun kewe aramas. Ar tong fan itan esap chok pwalo ren ekkoch fofforun lamalam. Ir meinisin repwe tongei Jiowa ren unusen leluker, ren unusen ngunur, pwal unusen tufichiir. (Tuteronomi 6:5, 6) Epwe kapachelong ar fos, ar foffor—ren enletin, unusen manauer meinisin. (Lifitikos 20:27; 24:15, 16; 26:1) Jises Kraist a pwal affata pwe Jiowa a mochen pwe aramas repwe fel ngeni i chok.—Mark 12:28-30; Luk 4:8.
13 Unusen alleasochisi an Jiowa kewe alluk. A lamot pwe ekkewe chon Israel repwe chechchemeni pwe lon ewe atipeeu lefiler me Jiowa, ra pwon pwe repwe unusen alleasochisi i. Ra tufichin pwisin filata ren chommong mettoch nge, lon ekkewe mettoch Jiowa a alluk ngeniir, repwe unusen alleasochis. Ar fori ena epwe annetata pwe ra tongei Kot me epwe alisiir me nour kewe pokiten an Jiowa kewe alluk meinisin ra fisita pwe repwe alisi aramas.—Ekistos 19:5-8; Tuteronomi 5:27-33; 11:22, 23.
14 Akkomwa ekkewe mettochun ngun. Ewe muun Israel esap mut ngeni kuttaen minne mi lamot lon pekin aion an epwe akkom mwen ekkewe mettochun ngun. Ekkewe chon Israel resap akkomwa ekkewe mettochun fonufan lon manauer. Jiowa a akkota och fansoun mi pin iteiten wiik, fansoun fan iten chok ekkewe mettoch mi weneiti fel ngeni ewe Kot mi enlet. (Ekistos 35:1-3; Numperis 15:32-36) Iteiten ier, mei pwal wor ekkoch fansoun fan iten mwichelap mi pin. (Lifitikos 23:4-44) Ekkeei fansoun epwe atufichiir le porausfengen ussun an Jiowa kewe foffor mi amwarar, chechchemenien an Jiowa kewe aal, me pwarataan ar kilisou ngeni i fan iten an kirokiroch. Lupwen ekkewe aramas ra pwarata ar tuppwol ngeni Jiowa iei ussun, ar niueiti me tongei Kot epwe lapelo me epwe alisiir le feffetal lon an kewe aal. (Tuteronomi 10:12, 13) Ekkewe kapasen alongolongun alluk mi limoch lon an kewe emmwen ra efeiochu noun Jiowa kewe chon angang ikenai.—Ipru 10:24, 25.
Weweochun Lapalapen Jiowa Kewe
15 An Moses weweiti lapalapen Jiowa kewe epwe alisi i lon an foffor ngeni ekkewe aramas. Ekistos 34:5-7 a apasa pwe Kot a lu seni Moses me a apasa: “Ngang ewe Samol mi Lapalap, ngang ewe Samol mi Lapalap, ngang eman Kot mi eani umoumoch me kirikiroch, ua songomang, ua pwal woun tong me allukuluk. Ua eani tong ngeni ngerou o amusala foforingau me pupungau me tipis. Nge usap amusafatei chon tipis, pwe ua liwini an samasam tipis won nour me noun nour tori aulungatin me aruanun tettelin aramas.” Ekkekieki ussun ekkena kapas. Pwisin eisinuk: ‘Met weween eu me eu lapalap? Ifa ussun Jiowa a pwaralo ewe lapalap? Ifa ussun ekkewe overseer chon Kraist ra tongeni pwaralo ei lapalap? Ita ifa pochokkulen ena lapalap lon fofforun emon me emon leich?’ Ekieki ussun ekkoch chok poraus ussun ena.
16 Jiowa a “umoumoch me kirikiroch.” Ika a nom reom ewe puk Insight on the Scriptures, pwata kese alleaani met a apasa fan ewe itelap “Mercy”? Are fori research ussun ena poraus ren om nounou ewe Watch Tower Publications Index are ewe Watchtower Library (CD-ROM).a Nounou eu concordance ren om kopwe kuna ekkewe wokisin mi weneiti umoumoch. Kopwe kuna pwe Jiowa ese chok akukkunaalo liwinin eu kapwung nge, an umoumoch a kapachelong kirikiroch. A amwokutu Kot an epwe angasalo noun kewe aramas. Iei ussun, Kot a awora met ekkewe chon Israel ra osupwang ren lon pekin aion me pekin ngun lupwen ra fetal ngeni ewe Fonu Mi Pwonetiu. (Tuteronomi 1:30-33; 8:4) Jiowa a umoumoch le omuseerelo lupwen ra mwaallilo. A umoumoch ngeni noun kewe aramas loom. Ina popun noun kewe chon angang ikenai repwe pwal pwarata kirikiroch lefiler!—Mattu 9:13; 18:21-35.
17 An Jiowa umoumoch a fiti kirikiroch. Ifa ussun kopwe awewei weween “kirikiroch?” Alollo ei kapas ren ekkewe wokisin mi apasa pwe Jiowa a kirikiroch. Ewe Paipel a pwarata pwe an Jiowa kirikiroch a kapachelong an ekilapei me tongei chokkewe mi osupwang lein noun kewe aramas. (Ekistos 22:26, 27) Ese lifilifil lon menni fonu, ekkewe mi eolo me pwal ekkewe ekkoch aramas ra tongeni osupwang watte. Lupwen a aiti ngeni noun kewe aramas pwe resap lifilifil me repwe kirikiroch ngeni ena esin aramas, Jiowa a achema ngeniir pwe ir pwal chon eolo lon Isip. (Tuteronomi 24:17-22) Nge ifa ussun oukich, noun Kot aramas ikenai? Ach kirikiroch a atipeeufengennikich me a lukeato aramas le fel ngeni Jiowa.—Fofor 10:34, 35; Pwarata 7:9, 10.
18 Iwe nge, an Israel ekilapei aramas seni pwal eu fonu esap lap seni ar tong fan iten Jiowa me an kewe minen aukuk ussun minne mi pwung me mwaal. Ina popun, ekkewe chon Israel ra kaeo pwe resap lapalapeni lapalapen ekkewe muu mi pwellifeiliir, resap appiru ar kewe oereni lon lamalam me manauer mi limengau. (Ekistos 34:11-16; Tuteronomi 7:1-4) Ena poraus a pwal weneitikich ikenai. Oukich meinisin, aramas mi pin, ussun chok ach Kot, Jiowa, mi pin.—1 Piter 1:15, 16.
19 Pwe Moses epwe weweiti An kewe aal, Jiowa a affata pwe inaamwo ika ese tipeeu ngeni tipis nge, a songommang. A mut ngeni och fansoun pwe noun kewe aramas repwe kaeo an kewe alluk me apwonuureta. Lupwen emon a aier, Jiowa a omusalo tipisin nge, ese likitaalo kapwung fan iten tipis watte. A ouroura Moses pwe met ekkewe chon Israel ra fori a tongeni efeiochu are efeiengaua ekkewe tappin aramas mwirin. Ika noun Kot kewe aramas ra weweiti an Jiowa kewe aal, ena weweoch epwe tumunuur seni ar tipi ngeni Kot lupwen osukosuk ra pwisin efisata a toriir are seni ar eani ewe ekiek pwe Kot mi mmang.
20 Ika en mi mochen alapalo om sile ussun Jiowa me an kewe aal, sopweilo om fori research me om ekkekieki met ka alleaani lon ewe Paipel. Atittinafichi ekkewe sokkopaten lapalapen Jiowa. Ekieki fiti iotek ifa ussun kopwe appiru Kot me atipeeufengenni manauom ren an kokkot. Om fori ena epwe alisuk le ti seni sossot, fofforoch ngeni chienom chon luku, me om alisi aramas le silei me tongei ach we Kot mi amwarar.
[Footnotes]
a Meinisin forien Chon Pwarata Jiowa.
Met Ka Fen Kaeo?
• Met popun tipetekison a lamot ngeni Moses, me met popun a lamot ngenikich?
• Ifa aucheaan an Farao rongorong an Jiowa kapas fan chommong?
• Ikkefa ekkoch kapasen alongolongun alluk Moses a kaeo me ra pwal weneitikich?
• Ifa ussun sia tongeni alapalo ach weweiti lapalapen Jiowa kewe?
[Ekkewe kapas eis fan iten ewe lesen]
1, 2. (a) Met popun a ina ussun met Moses a fori lupwen a kuna pwe emon re Isip a eriaffou emon re Ipru? (b) Ren an Moses epwe fich ngeni an epwe angang ngeni Jiowa, met a lamot an epwe kaeo?
3, 4. (a) Ifa ewe wiis Jiowa a awiisa ngeni Moses? (b) Ifa ewe alillis a tori Moses?
5. Met popun ekiekin Israel a aosukosuka Moses?
6. Met Jiowa a menlapei lupwen a awiisa ngeni Moses wiisan?
7. Met Kot a pese ngeni Moses inaamwo ika Farao a lamalam tekia?
8. Ifa ewe alillis seni ifa ussun an Jiowa a pwakini ewe osukosuk ren Farao, me ifa ussun ekkena poraus repwe kku kich?
9. Ifa ussun noun Moses kewe aramas ra osufolungaua Jiowa?
10. Met popun pwe ekkewe overseer chon Kraist ikenai repwe ekilapei an Moses we tingor mi mak lon Ekistos 33:13?
11. Ikkefa ekkewe minen emmwen Jiowa a ngeni Moses, me met popun sia mochen silei ussuur?
12. Ita ifa ussun an Jiowa alluku ngeniir pwe repwe fel ngeni i chok epwe kku ekiekin Israel?
13. Met popun Israel epwe alleasochisi Kot chok, me met epwe amwokutukich le alleasochisi i? (An Salomon Afalafal 12:13)
14. Ifa ussun Kot a apochokkula ewe lamoten an Israel akkomwa ekkewe mettoch lon pekin ngun?
15. (a) Met popun an Moses alamota lapalapen Jiowa kewe mi alisi i? (b) Ikkefa ekkewe kapas eis a tongeni alisikich le ekiekifichi ussun lapalapen Jiowa kewe meinisin?
16. Ifa ussun sipwe alapalo ach weweiti an Kot umoumoch, me met popun a lamot ach fori ena?
17. Ifa ussun ach weweiti an Jiowa kirikiroch a alisata fel mi enlet?
18. Met sia kaeo seni ekkewe mettoch Jiowa a pinei seni Israel lon ar foffor ngeni aramas seni pwal eu fonu?
19. Ifa ussun ar weweiti ekiekin Jiowa ussun fofforingau a tumunu noun kewe aramas?
20. Met a tongeni alisikich le fofforoch ngeni chienach chon luku me chokkewe sia chuuri lon ach angangen afalafal? (Kol Fel 86:11)
[Lios lon pekin taropwe 7]
Moses a tuppwol le esile ngeni Farao an Jiowa kapas fan tuppwol
[Lios lon pekin taropwe 9]
Jiowa a pwari an kewe alluk ngeni Moses
[Lios lon pekin taropwe 10]
Ekkekieki ussun lapalapen Jiowa kewe