Arap ngeni Kot
Emön Sou Amanauasefälli Ekkewe mi Mälo
A FEN mä sonuk emön attongom? Ika ina, ka fen meefi ewe sokkun letipechou mi watte seni meinisin. Ewe Sou Förikich a weweiti om letipechou. Lap seni ena, a tongeni försefälli minne a pöütülo pokiten mälo. Lon ewe Paipel, a makketiu pworausen iir kewe mi manausefäl pwe epwe affata pwe esap chök I ewe Sou Liffangoto manau nge pwal I ewe Sou Amanauasefälli. Sipwele käeö ussun eü me lein ekkewe fansoun Jiowa a ngeni Nöün we, Jises Kraist, manamanen an epwe amanauatä emön. Pworausen ena manaman a mak lon Luk 7:11-15.
Lon ewe ier 31 C.E., Jises a säi ngeni ewe telinimw itan Nein lon Kalili. (Wokisin 11) Eli a tori Nein lekuniolun ena rän. Ewe Paipel a apasa: “Lupwen a arap ngeni asamen titin ewe telinim, nengeni, ra pwisauu emon mi malo, i chok noun inan we aluwol, nge inan we a ma puluan. O chommong aramas ra eti neminewe seni ewe telinim.” (Wokisin 12) Ka tongeni anchangei ükükün watteen än inan we letipeta? Lupwen nöün we äläemön a mä seni, ina ewe oruuen fansoun a pöüt seni neminnewe chon ataweei an kewe osupwang me chon tüttümünü i.
Jises a chök afota neminewe mi feffetäl ünükkün pworun ewe somä. Paipel a erä: “Lupwen ewe Samol a kuna neminewe, a fakkun tongei i, o a apasa ngeni i, ‘Kete kechiu.’” (Wokisin 13) Jises a fokkun chchüngü osukosuken ena fefin mi mä seni pwülüwan me nöün. Neman a ekieki ussun pwisin inan we, pun eli a fen pwal mä seni pwülüwan we, nge ekiselo chök, epwe pwal kechiueiti Jises atun epwele mälo.
Jises a kine ngeni, nge esap fän iten an epwe fitiir. Ren pwomwen emön meilap, a “attapa pworun ewe monuma” me ekkewe aramas ra ülo. Ren leüwen emön mi wor an manaman woon mälo, a apasa: “‘Aten, upwe eronuk, pwe kopwele pwata!’ O atewe mi malo a motteta, o a popueta fofos. Iwe, Jises a ngeni inan we.” (Wokisin 14, 15) Lupwen ena alüwöl a mälo, ese chüen wor nöün inan we. Ina minne, lupwen Jises “a ngeni inan we,” ra wilisefäliti eü famili. Ese mwääl, letipechoun ena fefin mi mä seni pwülüwan a wililo ngeni meseik chapur.
Kese pwal mochen küna ena esin pwapwa me chuurisefälli attongom we mi mälo? Kopwe chök lükülük pwe Kot a tongeök. Än Jises tongeäsini ena fefin a pwäralo än Kot tong, pun Jises a unusen napanapeni napanapen Seman we. (Jon 14:9) Ewe Paipel a äiti ngenikich pwe Kot a fokkun mochen amanauasefällietä chokkewe mi mälo, iir kewe Kot a chechchemeniir. (Hiop 14:14, 15) An we Kapas, ewe Paipel, a ngenikich eü äpilükülük allim mi amwarar, pwe sipwe tongeni manau lon paratis woon fönüfan me küna manausefällin attongach kewe mi mä senikich. (Luk 23:43; Jon 5:28, 29) Pwata kese alapalo om sile ussun ewe Sou Amanauasefälli ekkewe mi mälo me käeö ifa ussun kopwe tongeni eäni ena äpilükülük allim?
[Sasing lón pekin taropwe 29]
“Atewe mi malo a motteta, o a popueta fofos. Iwe, Jises a ngeni inan we”