Watchtower ONLINE LIBRARY
Watchtower
ONLINE LIBRARY
Chuuk
  • PAIPEL
  • PUK
  • MEETINGS
  • w14 12/1 p. 18-22
  • Feffetál fán Tipeeú Ngeni Sópwólóón Ei Ótót

Ese wor video fán iten ei kinikin.

Omusaaló, a wor osukosuk le eppietá ewe video.

  • Feffetál fán Tipeeú Ngeni Sópwólóón Ei Ótót
  • Ewe Leenien Mas a Esilefeili án Jiowa We Mwú—2014
  • Itelap Kisikis
  • Pwal Ekkóch
  • RA PACHEÉCHFENGEN
  • TIPEEÚFENGEN MWEN WAROTOON RÁNIN JIOWA WE
  • “KIFET LON EU CHÖK INIS”
  • PWÁRAATÁ PWE SIA “KIFET LON EU CHÖK INIS”
  • Tipeeüin Chon Kraist A Elingalo Kot
    Ewe Leenien Mas a Esilefeili án Jiowa We Mwú—2010
  • An Jiowa Famili A Kan Pwapwaesini Tipeeu Mi Auchea
    Ewe Leenien Mas a Esilefeili án Jiowa We Mwú—1997
  • Tipeeüfengen A Esissillatä Fel Mi Enlet
    Ewe Leenien Mas a Esilefeili án Jiowa We Mwú—2010
  • Alukulukatiu Tipeeu Lon Ekkeei Ranin Le Sopwolon
    Ewe Leenien Mas a Esilefeili án Jiowa We Mwú—1997
Ewe Leenien Mas a Esilefeili án Jiowa We Mwú—2014
w14 12/1 p. 18-22

Feffetál fán Tipeeú Ngeni Sópwólóón Ei Ótót

“Kich kifetin eu chok inis.”​—EF. 4:25, Testament Mi Fö.

IFA USUN KOPWE PÉLÚWENI?

  • Menni ekiek ekkewe sáráfé repwe túmúnúúr seni, me pwata?

  • Pwata a lamot sipwe “nukucharfengen” lón ach tipeeú?

  • Ifa usun sipwe pwisin pwáraatá pwe sia mochen “kifet lon eu chök inis”?

1, 2. Met Kot a mochen sáráfé me watte mi fel ngeni repwe féri?

EN EMÉN sáráfé? Ika ina, kopwe lúkúlúk pwe en mi fókkun aúchea ngeni án Jiowa we mwichefel wóón unusen fénúfan. Lón sókkópaten fénú, chómmóng me lein chókkewe ra papatais, iir sáráfé. A mmen apéchékkúl le kúna chómmóng sáráfé ra fit lein chókkewe ra filatá le angang ngeni Jiowa!

2 Ika en emén sáráfé, ka pwapwaiti óm chiechi ngeni pwal ekkewe ekkóch sáráfé? Ese mwáál ka pwapwa. Sia pwapwa lupwen sia chiechi ngeni pilooch kewe. Iwe nge, ese lifilifil ika kich sáráfé are watte, are met nónnómuch, Kot a mochen sipwe tipeeúfengen lón ach fel ngeni i. Ewe aposel Paulus a makkeei pwe letipen Kot pwe “aramas meinisin repwe küna manau, repwe pwal silei ewe let.” (1 Tim. 2:3, 4) Lón Pwärätä 7:9 a áweweei pwe ekkewe chón fel ngeni Kot ra feito seni “sokopaten mwich, ainang, mwü me kapas meinisin.”

3, 4. (a) Ifa ewe ekiek mi chéúfetál lein chómmóng ekkewe sáráfé lón ei fansoun? (b) Ifa ewe ekiek mi tipeeú ngeni Efisos 4:25?

3 A ifa me watteen sókkofesenin néún Jiowa kewe chón angang sáráfé seni ekkewe sáráfé lón ei fénúfan! Chómmóng ekkewe rese angang ngeni Jiowa ra eáni ewe sókkun manaw mi chék ekieki pwisin iir me mocheniir. Ekkóch sousile ra apasa pwe ei táppin ra kon chék ekilapei me akkomwa pwisin iir. Ra pwáraatá lón napanapen ar fós me fouter pwe ra oput ekkewe ra mwukóló pwe me rer rese silei och mettóch.

4 Ena ekiek a chéúfetál. Ina minne, a weires ngeni ekkewe sáráfé mi angang ngeni Jiowa ar repwe ttii seniir ena esin ekiek me eáni ekiekin Kot. Pwal mwo nge lón fansoun ekkewe aposel, Paulus a kúna lamoten an epwe fénéú chienen kewe chón lúkú ar repwe túmúnúúr seni ewe ekiek “mi nemeni ekewe aramas mi aleasolap.” Nge me lóóm ra pwal “manaueni ewe manauen fanüfan mi ngau.” (Álleani Efisos 2:1-3.) A múrinné ekiekin ekkewe sáráfé mi mirititi lamoten ar repwe túmúnúúr seni ena ekiek me repwe angangfengen fán tipeeú ren pwiir kewe meinisin. Ei ekiek a tipeeú ngeni alon Paulus we lupwen a erá, “kich kifetin eu chok inis.” (Ef. 4:25, TF) Lón ei fansoun a chék arapakkanoto sópwólóón ei ótót, epwe fen kon lapóló lamoten ach sipwe angangfengen fán tipeeú. Sipwe ppii ekkóch pwóróus lón Paipel epwe álisikich le kúna lamoten ach sipwe pacheéchfengen lón ach tipeeú.

RA PACHEÉCHFENGEN

5, 6. Ifa ewe lesen sia káé seni pwóróusen Lot me néún kewe fépwúl?

5 Me lóóm, Jiowa a pwapwa le túmúnú néún kewe aramas lupwen ra álillisfengen fán tipeeú lón fansoun weires. Néún Kot kewe aramas ikenái, sáráfé are watte, ra tongeni káé seni ekkewe pwóróus lón Paipel. Áwewe chék ren pwóróusen Lot.

6 Lot me an famili repwe tongeni feiengaw pokiten Sotom, ewe telinimw ra nónnóm ie, epwele taló. Néún Kot kewe chónláng ra éúréúra Lot an epwe sútá wóón ekkewe chuuk ren ar ereni: “Kopwe kaila o süla.” (Ken. 19:12-22) Lot a álleasochis me néún kewe rúúemén fépwúl ra fitipachei semer le sú seni ena telinimw. Nge mi elichippúng, pún ekkóch lón ar famili rese. Ekkewe rúúemén alúwél, kófótun néún Lot kewe ra ekieki pwe ena chinnap “a chök urumwot.” Iwe a péút seniir manawer. (Ken. 19:14) Lot chék me néún kewe fépwúl iir kewe ra fitipachei semer we ra kúna manaw.

7. Ifa usun Jiowa a álisi chón Israel mi tipeeúfengen atun ar sú seni Isip?

7 Nengeni pwal eú pwóróus. Lupwen ekkewe chón Israel ra sú seni Isip, rese sú lón en me an kúmi me pwisin filatá menni al repwe aleni. Lupwen Moses a “aitiela pöün won ewe sät” me Jiowa a áimufeseni, Moses ese ákkáláemén are i me fitemén chék chón Israel ra fetáleló. Nge fan án Jiowa túmún, unusen ewe mwichen chón Israel ra fiti Moses le fetáleló. (Eks. 14:21, 22, 29, 30) Ra pwáraatá ar tipeeúfengen me “pwal chomong sokopaten mwichen aramas,” esap iir chón Israel ra etiir. (Eks. 12:38) Epwe fen eú alen tiparoch ika eú kúkkún kúmi me leir, neman kúmien sáráfé, repwe áimuroló me pwisin filatá menni al ra mochen aleni. Pwúngún pwe ar féri ena epwe ngeniir ar resap tongeni nóm fán án Jiowa túmún.​—1 Kor. 10:1.

8. Lón fansoun King Jehosafat we, ifa usun néún Kot kewe aramas ra pwáraatá tipeeúfengen?

8 Lón fansoun King Jehosafat we, néún Kot kewe aramas ra chuuri chón koputer mi péchékkúl, “eu mwichemongun aramas” seni ekkewe fénú únúkkúr. (2 Kron. 20:1, 2) A fókkun éch pwe néún Kot kewe aramas rese sótun okkufuur ren pwisin ar péchékkúl nge ra kul ngeni Jiowa. (Álleani 2 Kronika 20:3, 4.) Emén me emén chón Israel rese féri minne ra meefi pwe a éch. Ewe Paipel a erá: “Ekewe re Juta meinisin, pwülüer me nöür kewe ra ütä me fän mesen ewe Samol mi Lapalap.” (2 Kron. 20:13) Iir meinisin sáráfé are watte ra achochofengen lón ar lúkú pwe repwe fiti án Jiowa emmwen, iwe Jiowa a túmúnúúr seni chón koputer kewe. (2 Kron. 20:20-27) Ei pwóróus a eú leenien áppirú mi múrinné ren ifa usun sipwe tipeeúfengen usun eú mwichen néún Kot aramas le pworacho fán ekkewe osukosuk.

9. Met sia tongeni káé seni an ekkewe popun Chón Kraist tipeeúfengen lón ar féffér me ekiek?

9 Ekkewe popun Chón Kraist ra pwal silleló ren ar akkangangfengen. Áwewe chék, lupwen chómmóng chón Jus me ekkewe esap iir chón Jus ra wiliti Chón Kraist, iir ra likiitú “le kaiö seni mine ekewe soukünö ra aiti ngeniir, ra likitü lon ar chiechifengen o mongöfengen . . . me ikiotekfengen.” (Föf. 2:42) Ei tipeeúfengen a ákkáeúin pwáló lupwen ra kúna riáfféú mwáál nge a lamot ngeniir ar repwe álillisfengen. (Föf. 4:23, 24) Kese tipeeú pwe a lamot ach sipwe tipeeúfengen me álillisfengen lón ei fansoun mi áweires?

TIPEEÚFENGEN MWEN WAROTOON RÁNIN JIOWA WE

10. Ineet epwe fókkun lamot tipeeúfengen?

10 Epwele war ewe fansoun mi fókkun áweires lap seni meinisin. Ewe soufós Sowel a erá pwe ena rán “epwe eu ränin rochopwak me toputop.” (Sow. 2:1, 2; Sef. 1:14) Epwe lamot pwe néún Kot kewe aramas repwe fókkun tipeeúfengen lón ena atun. Chechchemeni alon Jesus ei: “Are eü mwü a kinikinfesen o fiufengen, ei mwü esap tongeni nonomola.”​—Mat. 12:25.

11. Ifa ewe kapas áwewe a mak lón Kölfel 122:3, 4, TF a tongeni weneiti néún Kot kewe aramas lón ei fansoun? (Ppii ewe sasing lepoputáán ei lesen.)

11 Atun epwele tori ena fansoun fitikoko ngeni ei ótót, mi lamot sipwe wesewesen tipeeúfengen. Ewe sókkun tipeeúfengen lón pekin lúkú a lamot sipwe eáni lefilach epwe usun etieppachfengenin ekkewe imw lón Jerusalem lóóm. Lupwen ra aúetá imwer kewe ra etieppachafengeniir ina popun ewe soumak kél fel a apasa pwe Jerusalem “eu telinim mi auta nukucharfengen.” Ena mettóch a atufichi chón ewe telinimw ar repwe álillisfengen me túmúnúfengeniir. Pwal och, ar etieppachfengen a tongeni liosuetá ewe tipeeúfengen, an unusen ewe mwú lupwen “ekkewe einangen ewe SAMOL” ra mwichfengen pwe repwe fel ngeni. (Álleani Kölfel 122:3, 4, TF.) Lón ei fansoun me lón ewe fansoun weires epwele feito mi lamot sipwe pwal “nukucharfengen” lón ach tipeeú.

12. Met epwe álisikich le kúna manaw lupwen Kok epwe maunei néún Kot kewe aramas?

12 Pwata a fókkun lamot ach sipwe “nukucharfengen” lón ach tipeeú lón ena fansoun? Isikiel sópwun 38 a oesini usun án “Kok . . . lon ewe fanü Makok” maunei néún Kot kewe aramas. Esap ina ewe fansoun sipwe mut ngeni och mettóch an epwe etipefesenikich. Sise fókkun mochen kútta álillis seni ei fénúfan nge sia mochen pacheéchfengen me pwiich kewe. Nge sap minne sipwe kúna manaw pokiten chék sia chóni eú mwichen aramas. Jiowa me Néún we repwe túmúnú chókkewe ra pani itan Jiowa we me emmweniirewu seni ena fansoun mi áweires. (Sow. 2:32; Mat. 28:20) Nge óm lúkú pwe chókkewe rese mochen fitipachei néún Kot kewe siip, iir kewe ra pwisin atowauereló repwe kúna manaw?​—Mik. 2:12.

13. Ren met sia fen pwóróusfengen wóón, ikkefa ekkewe lesen sáráfé ra tongeni káé seni?

13 A ffat pwe esap eú alen tipachem le fiti ekkewe sáráfé ra pwisin áimuroló seni néún Kot kewe aramas. Epwele tori ewe fansoun mi fókkun lamot ngenikich meinisin, sáráfé me watte, ach sipwe álillisfengen lefilach! Ewer, iei ewe fansoun sipwe angangfengen, apéchékkúla ach tipeeúfengen pwe a fókkun lamot ena lón ekkan fansoun epwe feito.

“KIFET LON EU CHÖK INIS”

14, 15. (a) Met popun Jiowa a asukula ekkewe sáráfé me ekkewe watte lón ei fansoun? (b) Ikkefa ekkewe kapasen fén Jiowa a awora pwe sipwe achocho lón ach tipeeúfengen?

14 Jiowa a ákkálisikich pwe sipwe ‘angang ngeni fän tipeeu.’ (Sef. 3:8, 9) A ákkáitikich fán iten mwachkkan lupwen epwe pwénútá minne a tipeni. Met a kapachelong lón minne a tipeni? An epwe “achufengeni förian meinisin lon läng me fanüfan, pwe repwe nonom fän nemenien Kraist.” (Álleani Efisos 1:9, 10.) Ewer, Kot a mochen ochufengeni meinisin chón fel ngeni lón láng me fénúfan, nge letipan na epwe pwénútá. Ika en emén sáráfé, ei mettóch ese álisuk le mirititi lamoten óm kopwe angangfengen me án Jiowa we mwicheich fán tipeeú?

15 Jiowa a asukulakich ach sipwe tipeeúfengen iei pwe sipwe tongeni manaw fán tipeeú tori feilfeiló. Fán chómmóng ewe Paipel a pesekich le ‘chüngüfengeni lefilach,’ eáni ‘tongen pwipwi lon Kraist epwe pwichikar lefilach,’ ‘echipafengenikich’ me ‘alilisfengen lefilach.’ (1 Kor. 12:25; Rom 12:10; 1 Tes. 4:18; 5:11) Jiowa a silei pwe ekkewe Chón Kraist rese unuséch, ena mettóch epwe tongeni áweiresi an epwe wor tipeeúfengen. Ina minne a lamot ach sipwe achocho le “amusamusfengen.”​—Ef. 4:32.

16, 17. (a) Ifa eú popun a kawor án Chón Kraist kewe mwich? (b) Met ekkewe sáráfé ra tongeni káé seni án Jesus leenien áppirú me lekúkkúnún?

16 Jiowa a pwal awora án Chón Kraist kewe mwich pwe repwe álisikich ach sipwe pacheéchfengen. Fán chómmóng sia álleani ewe pesepes lón Ipru 10:24, 25. Eú popun a kawor ekkewe mwich pwe sipwe “ekiekifengeni usun ach sipwe tongeni alollolätai chienach ren ach eäni chen me föför mürina” nge a pwal menlapei pwe sipwe “apöchökülafengenikich lefilach, pun sia silei pwe Ränin ach Samol a arapoto.”

17 Le kúkkúnún Jesus, i a isetiw eú leenien áppirú ren an aúcheani ekkena kókkótun mwich. Lupwen a 12 ierin, a fiti seman kewe me inan ngeni eú mwichelap pwe repwe fel ngeni Jiowa. A wor atun Jesus a mworuk seni seman me inan nge Jesus ese feiló kukkunou ren chienan kewe. Nge Josef me Maria ra kúna me lón ewe imwenfel an a fósfengen me ekkewe sense usun ewe Paipel.​—Luk. 2:45-47.

18. Ifa usun ach kewe iótek a tongeni álisatá ach tipeeúfengen?

18 Me lúkún ach ámááraatá ach tongfengen me áeá ewe fansoun mwich le apéchékkúla ach ririin tipeeú, sia pwal tongeni iótek fán iten emén me emén lefilach. Ach eáni ewe sókkun iótekin tingor mi tichik fán ásengesin pwiich kewe a apéchékkúla ach tongfengen lefilach. Esap chék ekkewe mi watte ra tongeni féri ekkena mettóch. Ika en emén sáráfé, ka kan alamota ekkewe alen óm kopwe ámááraatá ewe ririéch lefilom me chón ewe mwichefel? Óm féri ena epwe tongeni álisuk le túmúnú pwe kesap fitipachei án Satan ei ótót lupwen epwe taló.

PWÁRAATÁ PWE SIA “KIFET LON EU CHÖK INIS”

19-21. (a) Ifa usun sia fókkun pwáraaló pwe sia “kifet lon eu chök inis.” Áweweei. (b) Menni lesen ka káé seni ekkóch pwiich kewe ra awora álillis lón ewe feiengaw watte?

19 Néún Jiowa kewe aramas ra akkapwénúetá ewe kapasen emmwen lón Rom 12:5 pwe kich “kifet lon eu chök inis.” A pwáló ena lupwen a fis feiengaw watte. Lón December 2011, eú taifun a efisatá watteen lélétáán konik lón eú fénú lón Philippine itan Mindanao. Lón chék eú pwin, lap seni 40,000 imw ra taló, kapachelong chómmóng imwen pwiich kewe. Iwe nge, ewe keangen ofesilap a repotei pwe “pwal mwo nge me mwen an a poputá angangen ach mwicheich kúmiin ataween osukosuk, pwiich kewe Chón Kraist seni ekkóch leeni ra fen poputá le awora álillis.”

20 Pwal ina chék usun atun a tori Japan eú ló watte pokiten eú chechchechin fénú mi fókkun péchékkúl, iwe a péút seni chómmóng pwiich kewe pisekiir. Ekkóch me leir, meinisin pisekiir kewe rese chúen nóm. A ta seni Yoshiko imwan we, i a nónnóm 25 mwail seni ewe Leenien Mwich. Iei alon: “Mwirin, ám aua máirú pwe eú chék rán mwirin ewe chechchech, ewe mwán mi ásimaw mi wisen sáifetál me pwal emén pwiich ra etto kúttakem.” Yoshiko a fókkun emelimel me apasa: “Ám aua fókkun kilisou pwe a taweéch ám kewe osupwang lón pekin lúkú ren ewe mwichefel. Me lúkún ena, ra pwal ngenikem sekit, úféúfen annut, suus me pwotou.” Emén chón ewe kúmiin ataween osukosuk a erá: “Pwiich kewe seni sokopaten leeni lón Japan ra tipeeúfengen lón ar achocho le álillisfengen. Pwal mwo pwiich kewe seni Merika ra etto pwe repwe awora álillis. Lupwen ekkóch ra eisiniir ika pwata ra etto seni fénú towau ren ar repwe álillis, ra erá: ‘Ám eú chék me pwiim keei lón Japan me iir ra osupwangen álillis.’” Kese pwapwa pwe ka chóni ei mwicheich mi kan tongfengen? Ka tongeni lúkúlúk pwe Jiowa a fókkun pwapwa le kúna ei esin tipeeúfengen.

21 Ach tipeeúfengen iei epwe álisikich le likiitú fán ekkewe weires epwe torikich lón mwach inaamwo ika neman pwiich kewe seni ekkewe pwal ekkóch fénú resap chúen tongeni tikerikich. Enlet, ei sókkun tipeeúfengen epwe eú minen ammólnakich fán iten ekkewe fansoun weires epwe tongeni torikich lón ei ótót epwele taló. Fumiko, emén mi riáfféú ren ewe taifun lón Japan a erá: “A fókkun kkan ewe sópwólóón. Mi lamot sipwe ákkálisi chienach kewe chón lúkú atun sia witiwiti ewe fansoun esap chúen wor feiengaw watte.”

22. Án Chón Kraist tipeeúfengen a tongeni atoto met sókkun feiéch lón mwachkkan?

22 Ekkewe sáráfé me watte mi achocho iei an epwe wor tipeeúfengen ra wesewesen ammólneeretá pwe repwe manawewu seni talóón ei ótót mi ngaw me tipefesen. Ach Kot epwe pwal amanawa néún kewe aramas usun me lóóm. (Ais. 52:9, 10) Kopwe chechchemeni iteitan pwe ka tongeni kúna manaw ika ka achocho le fiti néún Kot kewe aramas mi tipeeúfengen. Pwal eú mettóch epwe álisikich, ina ach alapaaló le aúcheani minne sia fen angei. Ach lesen mwirin epwe pwóróus usun ena.

    Meinisin mi Peres lón Fósun Chuuk (1987-2025)
    Log Out
    Log In
    • Chuuk
    • Share
    • Preferences
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share