“Oupwe Filätä Iö Oupwe Angang Ngeni”

1. Ren ach sipwe enletin pwapwa, met a lamot sipwe féri, me pwata? (Aisea 48:​17, 18)

SEMACH we lón láng a fókkun tongekich, me a mochen ach sipwe pwapwaiti manawach iei me lón ekkan rán mwach. (SalAf. 3:​12, 13) A férikichetá fitifengen me tufichich le féri ekkewe mettóch mi amwarar. Iwe nge, ese ngenikich ewe tufich ach sipwe nemeni pwisin manawach are ewe tufich ach sipwe filaatá met mi pwúng me mwáál fán itach. (SalAf. 8:9; Jer. 10:23) A silei pwe ren ach sipwe enletin pwapwa, a lamot sipwe angang ngeni me etipeeúfengeni manawach ngeni an kewe allúk.—Álleani Aisea 48:​17, 18.

2. Met Setan a mochen án aramas repwe lúkú, me met Jiowa a féri?

² Setan a mochen án aramas repwe lúkú pwe ra tongeni pwapwa inaamwo iká rese angang ngeni Jiowa, me iir ra tongeni sópwéch le nemeni pwisin iir. (Ken. 3:​4, 5) Ren án Jiowa epwe ánneta pwe Setan i emén mi chofona, a mutatá án aramas repwe nemeni pwisin iir ren och fansoun. Sia fen kúna pwe án aramas nemenem a sópwongaw. Iwe nge, ewe Paipel a affata pwe chómmóng mwán me fefin ra pwapwa pokiten ra angang ngeni Jiowa. Jises Kraist, i ewe mi fókkun pwapwa seniir meinisin. Lón ei lesen, sipwe akkomw káé pwata Jises a filaatá an epwe angang ngeni Jiowa. Sipwe pwal káé pwata a fich ngeni Semach we lón láng ach sipwe fel ngeni. Mwirin, sipwe enniwili ekkóch ekkewe popun pwata sia filaatá le angang ngeni Jiowa.

POPUN ÁN JISES FILAATÁ LE ANGANG NGENI JIOWA

3. Met Setan a ereni Jises, me met Jises a filaatá le féri?

³ Atun Jises a nóm wóón fénúfan, a lamot an epwe filaatá ié epwe angang ngeni. Ekiseló mwirin án Jises papatais, Setan a ereni pwe epwe fang ngeni meinisin mwúún fénúfan iká e fel ngeni. Jises a apasa: “Súló Setan! Pún a makketiw: ‘Kopwe fel ngeni Jiowa óm Kot, me kopwe angang ngeni i chék.’” (Mat. 4:​8-10) Pwata Jises a eáni ena kefil? Sipwe ppii ekkóch popun.

4-5. Ikkefa ekkóch popun pwata Jises a filaatá an epwe angang ngeni Jiowa?

⁴ Ewe ákkáeúin popun pwata Jises a filaatá an epwe angang ngeni Jiowa, pokiten a tongei. A fókkun alóllóól an tong ngeni Seman na. (Jon 14:31) Pwal och, Jises a angang ngeni Jiowa pokiten ina eú mettóch mi múrinné an epwe féri. (Jon 8:​28, 29; Pwár. 4:11) A silei pwe Jiowa i a awora manaw me a alúkúlúk me fangafangéch. (Kölf. 33:4; 36:9; Jem. 1:17) Fansoun meinisin, Jiowa a kan wenechar ngeni Jises me meinisin met mi nóm ren, ra feito seni Jiowa. (Jon 1:14) Iwe nge, Setan a fókkun sókkóló seni Jiowa pwe a efisi án aramas repwe tipis me máló. I emén mi chofona, emén mi tipemmóng me a chék ekieki pwisin i. (Jon 8:44) Jises a silefichi Jiowa me a pwal silefichi Setan. Ese fókkun mochen an epwe ussun Setan le ú ngeni Jiowa.—Fil. 2:​5-8.

⁵ Pwal eú popun pwata Jises a filaatá an epwe angang ngeni Jiowa pún a mwétéresiiti ekkewe mettóch mi múrinné epwe fis ren an angang ngeni Jiowa fán túppwél. (Ipru 12:2) A silei pwe iká epwe chék túttúppwél, iwe epwe epinaaló iten Seman we me epwe amóeló meinisin ekkewe riáfféú ewe Tefil a efisi.

POPUN A FICH NGENI JIOWA ACH SIPWE FEL NGENI

6-7. Pwata chómmóng lón ei fansoun rese angang ngeni Jiowa, nge pwata a fich ngeni i ach sipwe fel ngeni?

⁶ Lón ei fansoun, chómmóng aramas rese angang ngeni Jiowa pokiten rese silei ussun napanapan kewe mi múrinné me rese silei meinisin ekkewe mettóch a féri fán iter. A ina ussun ekkewe aramas Paul a afalafal ngeniir me lón Aten.—Féf. 17:​19, 20, 30, 34.

⁷ Paul a áweweei ngeni ekkewe chón aúseling ngeni pwe ewe Kot mi enlet “a awora ngeni meinisin aramas manaw, me ngasangas me mettóch meinisin.” A pwal apasa: “Pún ren i, sia manaw me mwékútúkút, me nónnóm.” Kot i ewe Chón Féraatá, ewe “a féri seni emén mwán iteiten einangen aramas,” ina popun a fich ngeni i chék ach sipwe fel ngeni.—Féf. 17:​25, 26, 28.

8. Met Jiowa esap fókkun féri? Áweweei.

⁸ Pokiten Jiowa i ewe Chón Féraatá me Sounemenemen unuselapen láng me fénúfan, a tongeni eriáni aramas ar repwe angang ngeni. Iwe nge, Jiowa esap fókkun tongeni féri ena. Nge a fen awora ngenikich chómmóng pisekin pwáraatá pwe i wesewesen emén me a fókkun tongei emén me emén kich. A mochen pwe kich meinisin sipwe chiechian tori feilfeiló. (1 Tim. 2:​3, 4) Ina popun, Jiowa a áiti ngenikich ifa ussun sipwe áiti ngeni aramas met a tipeni me ereniir ekkewe mettóch mi múrinné epwe féri fán iter. (Mat. 10:​11-13; 28:​19, 20) A pwal awora ngenikich ach kewe mwichefel pwe sipwe tongeni fel ngeni i ie me angei álillis seni ekkewe mwán mi ásimaw mi tongekich.—Féf. 20:28.

9. Ifa ussun Jiowa a pwáári an tong?

⁹ Jiowa a pwáári an tong ren an fang ekkewe mettóch mi múrinné pwal mwo nge ngeni chókkewe rese mochen lúkú i. Ekieki ei: Ren fitengéréú ier, chómmóng aramas ra chék pwisin filaatá le féri met ra ekieki pwe mi pwúng me mwáál lap seni ar repwe fen álleasochisi Jiowa. Ikáámwo ina, nge Jiowa a chúen úméúméch ren an fang ngeniir met mi lamot ngeniir pwe repwe manaw me pwapwaiti manawer. (Mat. 5:​44, 45; Féf. 14:​16, 17) Pokiten i, iwe a tongeni wor chiechier me ar famili mi tongeer, me a tongeni wor néúr, me ra tongeni kúna uwaéchún ar angang weires. (Kölf. 127:3; SalAf. 2:24) Ekkena mettóch ra pwáári án Semach we lón láng tongei aramas meinisin. (Eks. 34:6) Iei sipwe ppii ekkóch ekkewe popun pwata sia filaatá ach sipwe angang ngeni Jiowa me ifa ussun Jiowa a efeiéchúkich ren ach angang ngeni.

POPUN SIA FILAATÁ ACH SIPWE ANGANG NGENI JIOWA

10. (a) Ifa ewe ákkáeúin popun sia angang ngeni Jiowa? (Mattu 22:37) (b) Ifa ussun ka kúna feiéch seni án Jiowa mosonottam? (Kölfel 103:​13, 14)

¹⁰ Sia ákkáeúin angang ngeni Jiowa pokiten sia fókkun tongei i, ussun chék Jises. (Álleani Mattu 22:37.) Sia ririéch ngeni Jiowa atun sia káé ussun napanapan kewe. Áwewe chék, ekieki ussun án Jiowa mosonottam ngenikich. Atun ekkewe chón Israel ra álleasolapa, a tingormaw ngeniir: “Oupwe kul seni ämi föför mi ngau.” (Jer. 18:11) Jiowa a chemeni pwe kich sise unuséch, me sia ussun súsúún pwúl. (Álleani Kölfel 103:​13, 14.) Atun ka ekilonei ussun án Jiowa mosonottam me napanapan kewe mi múrinné, ese mwékút letipom óm kopwe mochen angang ngeni tori feilfeiló?

11. Ikkefa pwal ekkóch popun pwata sia filaatá ach sipwe angang ngeni Semach we lón láng?

¹¹ Sia pwal mochen angang ngeni Jiowa pokiten ina met mi pwúng ach sipwe féri. (Mat. 4:10) Nge lap seni ena, sia silei pwe iká sia túppwél ngeni Jiowa, iwe epwe wor chómmóng mettóch mi múrinné epwe fis ngenikich. Ach angang ngeni Jiowa fán túppwél a epinaaló itan we, a ánneta pwe ewe Tefil i emén mi chofona, me sia apwapwaai Semach na. Iká sia filaatá le angang ngeni Jiowa iei, sia tongeni angang ngeni tori feilfeiló!—Jon 17:3.

12-13. Met sia káé seni pwóróusen Jane me Pam?

¹² Atun sia chúen kúkkún are sáráfé, sia tongeni ámááraatá ach tongei Jiowa me epwe péchékkúleló atun sia mámmááritá. Sipwe ppii pwóróusen rúúemén pwipwi iter Jane me Pam.a A 11 ierin Jane me 10 ierin Pam atun ra kerán poputá le káé ewe Paipel. Inaamwo iká semer kewe me iner rese mochen káé, nge ra mut ngeniir ar repwe chiechi ngeni Chón Pwáraatá iká repwe fiti ar we famili le fál lón weekend. Iei met Jane a erá, “Met ekkewe Chón Pwáraatá ra áiti ngeniei seni Paipel, a álisiei ái úpwe ú ngeni án táppi kewe etipetipaei ái úpwe fitiir le áeá drugs me féri féfférún lisowu.”

¹³ Mwirin fitu ier, Jane me Pam ra wiliiti chón afalafal. Ekiseló, ra pioneer me ra pwal túmúnú semer kewe me iner mi chinnap. Iei met Jane a erá ussun met Jiowa a féri fán iter: “Úa kúna pwe Jiowa a túppwél le túmúnú chiechian kewe me ussun met 2 Timoty 2:19 a apasa, ‘Jiowa a silei ié kewe iir néún.’” A fókkun ffat pwe Jiowa a tongei chókkewe iir mi tongei i me filaatá le angang ngeni!

14. Ifa ussun sia tongeni penaatá iten Jiowa we lón ach kapas me féffér? (Pwal ppii ekkewe sasing.)

¹⁴ Sia mochen án aramas repwe silei pwe ekkewe mettóch mi ngaw ra rongorong ussun Kot ese fókkun pwúng. Áwewe chék, ekieki emén chiechiom mi kirekiréch, fangafangéch, me a kan omusaaló tipisin aramas. Lón eú atun, ka rong án emén tipimwáál ngeni pwe a kirikiringaw me ese wenechar. Met kopwe féri? Ka penaatá chiechiom na. Pwal ina chék ussun ren Jiowa, atun Setan me chienan kewe ra eitengawa ren ar achéúfetálei pwóróus mi chofona fán itan, sia apwóróusa ewe enlet ussun i me unusen penaatá itan we. (Kölf. 34:1; Ais. 43:10) Sia pwáári pwe sia mochen unusen angang ngeni Jiowa ren ach kapas me féffér.

15. Ifa ussun ewe aposel Paul a kúna feiéchún an féri siwil ren met a mochen féri lón manawan? (Filipai 3:​7, 8)

¹⁵ Sia tipemecheres le féri siwil ren met sia mochen féri lón manawach pwe sipwe tongeni apwapwaai Jiowa me alapaaló ach angang ngeni. Áwewe chék, ewe aposel Paul a fangetáni itéchún me ren aramasen lón leenian we ren an epwe tongeni tapweló mwirin Kraist me angang ngeni Jiowa. (Kal. 1:14) Pokiten ena, iwe a wor chómmóng mettóch mi múrinné a fis ngeni lón an angang ngeni Jiowa me a ketiw an epwe nemenem ren Kraist lón láng. Ese fókkun niamam ren an filaatá an epwe angang ngeni Jiowa, iwe, epwe pwal ina ussun kich sisap pwal niamam.—Álleani Filipai 3:​7, 8.

16. Met sia káé seni pwóróusen Julia? (Pwal ppii ekkewe sasing.)

¹⁶ Iká sia akkomwa ach angang ngeni Jiowa, sia tongeni kúna pwapwa lón manawach iei me lón mwachkkan. Ekieki pwóróusen emén Chón Kraist fefin itan Julia. Me mwen án Julia káé ewe enlet, a kan fiti eú kúmiin chón kél lón an we fál atun a chúen kúkkún. A fókkun ngiiéch ina popun a poputá le angei train an epwe wiliiti emén chón kél. Ekiseló mwirin, Julia a iteféúló me a kan kél lón ekkewe leeni mi iteféúló. Atun a fiti eú sukulen kél mi iteféúló, emén chienan chón sukul a poputá le fós ngeni ussun Kot me ereni pwe mi wor iten Kot, itan Jiowa. Mwittir chék, Julia a poputá le káé Paipel fán ruu lón eú wiik. Ekiseló mwirin, a filaatá an epwe nefótófót wóón an angang ngeni Jiowa lap seni an epwe emén chón kél. Ese mecheres ena kefil. Iei met a apasa: “Chómmóng aramas ra erá pwe úa asolapa liffangei na, nge úa mochen áeá manawei le unusen angang ngeni Jiowa.” Met meefian iei ussun ena kefil a féri lap seni 30 ier a ló? Iei met a erá: “Úa pwapwa ren ái filaatá le angang ngeni Jiowa me úa silei pwe lón mwachkkan epwe fang ngeniei meinisin met mochenin letipei.”—Kölf. 145:16.

SÓPWEELÓ LE ANGANG NGENI JIOWA

17. Pwata a mmen lamot án chókkewe resaamwo angang Kot silei pwe sia manaw arapakkan ngeni lesopwuchikin ei ótót, me pwata a pwal lamot ena ngeni chókkewe ra fen filaatá le angang ngeni?

¹⁷ Sia manaw arapakkan ngeni lesopwuchikin ei ótót. Ewe aposel Paul a erá: “Pún ‘ekiseló chék,’ ‘ewe emén epwe feito epwele war me esap mmang.’” (Ipru 10:37) Ifa ussun ena a weneiti aramas? Ren chókkewe rese angang ngeni Jiowa, a chék mwochomwoch ewe lusun fansoun ar repwe filaatá le angang ngeni, ina popun repwe mwittir mwékút úkúúkún ar tongeni. (1 Kor. 7:29) Nge iká sia fen filaatá le angang ngeni, sia silei pwe “ekiseló chék” sipwele ngaseló seni ekkewe weires sia kan likiitú faar.

18. Met Jises me Jiowa ra mochen ach sipwe féri?

¹⁸ Jises a pesei ngeni néún kewe chón káé ar repwe tapweló mwirin me repwe sópweeló le féri ena. (Mat. 16:24) Iwe, iká sia fen angang ngeni Jiowa ren fite fite ier, amwo sipwe úppós ach sisap fangetá. A lamot sipwe angang weires pwe sipwe sópwósópwoló lón ach angang ngeni. Eli esap mecheres ach féri ena, nge sia tongeni pwapwa me kúna chómmóng feiéch ren ach angang ngeni pwal mwo nge lón ei fansoun!—Kölf. 35:27.

19. Met sia káé seni pwóróusen Gene?

¹⁹ Ekkóch ra meefi pwe iká ra angang ngeni Jiowa, iwe ese apwapwa manawer. Iká en emén kúkkún are sáráfé, ka meefi pwe a weires óm kopwe angang ngeni Jiowa? Emén Chón Kraist át itan Gene a apasa: “Úa ekieki pwe úse tongeni féri ekkewe mettóch mi apwapwa pokiten ngang emén Chón Pwáraatá Jiowa. Úa meefi pwe chómmóng ekkewe semirit áúa mááritáfengen ra féri pari, date, are play ekkewe game mi wor féfférún akkachofesá lón, nge ngang úa chék fiti mwiich me ewe angangen afalafal.” Met a fis ngeni Gene ren an eáni ena esin ekiek? Iei met a apasa: “Úa poputá le féri ekkewe mettóch mi ngaw ekkóch sáráfé ra kan féfféri, me úa pwapwa ren ekis fansoun. Nge ese atoto ái enletin pwapwa. Úa poputá le ekieki feiéchún ach álleasochisi met ewe Paipel a apasa me úa filaatá ái úpwe angang ngeni Jiowa seni unusen letipei. Seni ena atun, úa meefi pwe Jiowa a fen pélúweni meinisin ái kewe iótek.”

20. Met sipwe úppós le féri?

²⁰ Iei met ewe soumakken kélfel a kélú ngeni Jiowa: “Feiöchün chokewe ka filiretä o emwenireto pwe repwe nom lon leniom mi pin.” (Kölf. 65:4) Amwo sipwe úppós le angang ngeni Jiowa me meefieni meefien Josua ei: “Ngang me chon leimwei, äm aipwe angang ngeni ewe Samol mi Lapalap.”—Jos. 24:15.