Ewe Ttitin Jeriko

MET a ataietiw ei ttitin Jeriko? Usun itá eféú féúmmongun pakutang a kkúú. Nge lón ena fansoun, ese mwo wor pakutang, ese pwal wor nikásúk. Nge, ina pwal eú manaman seni Jiowa! Sipwe káé ifa usun a fis.

Aúseling ngeni met Jiowa a ereni Josua: ‘Ámi me noum kewe soufiu, oupwe kakkaris le pwelli ewe telinimw. Oupwe pwelli ewe telinimw fán eú iteiten rán ren úkúkún wonu rán. Oupwe ekii ewe pworofel. Fúmén ekkewe souasor repwe akkomwóló mwan, iwe repwe oopu néúr kewe rappwa.

‘Lón ewe efisuen rán oupwe kakkaris le pwelli ewe telinimw fán fisu. Mwirin oupwe oopummóngu néúmi kewe rappwa, iwe ámi meinisin oupwe eáni eú púchér mi lap, púchérún maun. Iwe, ewe ttit epwe turutiw!’

Josua me ekkewe aramas ra féri minne Jiowa a apasa. Lupwen ar ra kakkaris, meinisin ra fanafaneló. Ese wor e kapas. Ra chék tongeni rong ekkewe rappwa me púngúpúngún pecher ren ar kakkaris. Ese mwáál ra niwokkus ekkewe chón Jeriko mi oput néún Kot kewe aramas. En mi tongeni kúna ena sáál mi parapar mi ititiw me lón ena asammwacho? Asammwachoon menni imw ena? Rahap a féri minne ekkewe rúúemén spai ra ereni an epwe féri. Meinisin chón an we famili ra nóm lón ena imw me kakkatol minne a fis.

Iwe lón ewe efisuen rán, mwirin ar kakkaris le pwelli ewe telinimw fán fisu, a ttik ekkewe rappwa me ekkewe soufiu ra púchér, iwe ewe ttit a turutiw. Iwe Josua a apasa: ‘Ou nieló meinisin lón ewe telinimw me keni. Keni mettóch meinisin. Isoni chék ewe silifer, kolt, kapa me mechá, iwe ou uwei ngeni ewe leenien isoisen moni lón án Jiowa we imwenfel mangaku.’

Josua a ereni ekkewe rúúemén spai: ‘Ou tolong lón imwen Rahap we me panawu Rahap me meinisin chón an we famili.’ Rahap me an we famili ra manaw, usun chék minne ekkewe spai ra fen pwon ngeni neminna.