Reap A Aopa Ekkewe Spai

Atun ekkewe spai seni Israel ra ló ngeni ewe telinimw Jeriko, ra nónnóm lón imwen emén fefin itan Reap. Ewe kingen Jeriko a silei me a tiinaaló soufiu ren imwen Reap. Reap a aopa ekkewe rúúemén spai wóón osen imwan we me a otupu ekkewe soufiu ar repwe chei ekkewe spai. A ereni ekkewe spai: ‘Úpwe álisikemi pokiten úa silei pwe Jiowa a nónnóm remi me oupwe liapeni ei leeni. Ouse mochen pwon ngeniei pwe oupwe amanawa chón ái we famili.’

Ekkewe spai ra ereni Reap: ‘Áúa pwon pwe esap wor emén lón imwom epwe feiengaw.’ Ra ereni: ‘Kopwe féétaatá efóch sáál mi par wóón asammwachom we, iwe en me óm we famili oupwe kúna manaw.’

Reap a áeá efóch sáál le atowu ekkewe spai me lón asammwachoon we. Ra ló ngeni ekkewe chuuk me op ikenan úkúúkún úlúngát rán me mwen ar liwiniti Josua. Mwirin ekkewe chón Israel ra pwereló epekin ewe Chénúpupu Jortan me ra mmólnetá le liapeni ewe fénú. Jeriko ina ewe áeúin telinimw ra liapeni. Jiowa a ereniir ar repwe karis me pwelli ewe telinimw fán eú lón eú rán ren úkúúkún wonu rán. Lón ewe efisuen rán, ra karis me pwelli ewe telinimw fán fisu. Mwirin ekkewe souasor ra ettiki néúr kewe rappwa me ekkewe soufiu ra léúwommóng le púchér. Iwe ttitin ewe telinimw a turuló! Nge imwen Reap we, ewe a kaútá wóón ttitin ewe telinimw a chúen nóm. Reap me chón an we famili ra kúna manaw pokiten a lúkúlúk wóón Jiowa.