Ewe Akkar A Kaúló

NENGENI Josua. A erá: ‘Akkar, kaúló mwo!’ Iwe, ewe akkar a wesewesen kaúló. A chék nónnóm lukanapen láng unusen eú rán. Jiowa a efisi ei mettóch! Nge sipwe ppii pwata Josua a mochen án ewe akkar epwe chék tittin.

Lupwen ekkewe nimmén king mi ngaw seni Kanaan ra poputá le maunei ekkewe chón Kipeon, ekkewe chón Kipeon ra tiinaaló emén mwán pwe epwe tingor álillis seni Josua. A apasa: ‘Ou mwittirito rem! Ou selánikem! Meinisin ekkewe king seni ewe fénú mi ppanetá ra fen feito pwe repwe fiu ngeni noum keei chón angang.’

Josua me meinisin néún kewe soufiu ra mwittir ló. Ra fetál unusen ewe pwin. Lupwen chón Josua ra tori Kipeon, néún ekkewe nimmén king kewe soufiu ra niwokkus, iwe ra poputá le sú. Iwe, Jiowa a oturatiw ekkewe sno faú mi féúmmong seni láng, iwe chómmóng ekkewe soufiu ra máló ren ekkewe sno faú lap seni ekkewe mi máló ren néún Josua kewe soufiu.

Josua a kúna pwe ewe akkar epwele tuputiw. Epwele roch, nge chómmóng néún ekkewe nimmén king kewe soufiu repwe tongeni sú. Ina minne Josua a iótek ngeni Jiowa, iwe mwirin a apasa: ‘Akkar, kaúló mwo!’ Iwe lupwen ewe akkar a chúen tittin, ekkewe chón Israel ra tongeni unusen áwesi ewe maun me win.

Mei chúen wor chómmóng king mi ngaw lón Kanaan, iir kewe mi oput néún Kot kewe aramas. Josua me an we mwichen sounfiu ra akkufu ilik me emén king lón ena fénú ren órun wonu ier. Lupwen a wes ar maun, Josua a eineti ewe fénú Kanaan ngeni ekkewe einang ese mwo wor inetiir.

Mwirin fitu, fitu ier, Josua a máló lupwen a tori 110 ierin. Atun iir me chienan kewe ra manaw, ekkewe aramas ra álleasochisi Jiowa. Nge lupwen ekkeei mwán mi múrinné ra máló, ekkewe aramas ra poputá le féri mettóch mi ngaw me tolong lón fitikoko. Ikkeei ekkewe fansoun a kon watte lamoten án Kot álillis ngeniir.