Jesus A Tongei Ekkewe Kúkkún Semirit

NENGENI Jesus me ikeei ie an ei foropachei ei kúkkún át. Ka tongeni esilla pwe Jesus a wesewesen tongei ekkewe semirit. Ekkeei mwán mi nengeniir, iir néún kewe aposel. Met ei Jesus a ereniir? Sipwe ppii.

Jesus me néún kewe aposel ra kerán liwin seni ar sáittam. Lón ar sái, a fis eú ánini lefilen ekkewe aposel. Ina minne mwirin ar we sái, Jesus a eisiniir: ‘Met oua ánini usun wóón ewe al?’ Ren enletin Jesus a fen silei met ra ánini wóón. Nge a eisiniir pwe epwe ppii ika ekkewe aposel repwe akkaffat.

Ekkewe aposel rese pélúweni och, pún ra fen ánini wóón ewe al usun ién leir a lapalap. Ekkóch aposel ra mochen ar repwe itetekia mwen ekkewe ekkóch. Epwe ifa usun Jesus epwe ereniir pwe ese pwúng ar mochen lapalap seni meinisin?

A kérato ewe kúkkún át, iwe a aútáái mwen meser meinisin. Mwirin a apasa ngeni néún kewe chón káé: ‘Ua mochen ámi oupwe wesewesen silei ei mettóch: Ika ousap kulsefál o wewe ngeni emén semirit, ousap fókkun tongeni tolong lón mwúún Kot. Iei minne ié epwe usun ei semirit, i ewe mi lap seni meinisin lón ewe mwú.’ En mi silei ika pwata Jesus a apasa ena?

Pún wesewesen ekkewe kúkkún semirit rese ekieki usun ar repwe lapalap are itetekia mwen ekkewe ekkóch. Iwe, ekkewe aposel repwe itá káé pwe repwe usun ekkewe semirit lón ei napanap me resap ánini usun ar repwe lapalap are itetekia.

Iwe, mi pwal wor ekkóch fansoun lupwen Jesus a pwáraatá úkúkún watteen an tongei ekkewe kúkkún semirit. Fitu maram mwirin, ekkóch aramas ra panato néúr kewe semirit pwe repwe chuuri Jesus. Ekkewe aposel ra sótun tiiniireló. Nge Jesus a ereni néún kewe aposel: ‘Oupwe mut ngeni ekkewe semirit ar repwe feito rei, nge ousap pineir, pún iir kewe mi napanapeni napanaper repwe mwúúni ewe mwúún Kot.’ Mwirin, Jesus a foropachei ekkewe semirit me a efeiéchúúr. Esap pwe a mmen múrinné ach sia silei pwe Jesus a tongei ekkewe kúkkún semirit?