Alen Ach Sipwe Tongeni Kúna Manaw Esemuch

EN MI tongeni esilla ika met ena kúkkún nengngin me chienan kana ra ákkállea? Ewer, ina ewe chék puk ka ákkállea iei Nei Puken Pwóróusen Paipel. Iwe, ra pwal ákkállea ewe chék sópwun ka pwal álleani iei “Alen Ach Sipwe Tongeni Kúna Manaw Esemuch.”

Ka silei met ra káé usun? Ra káé pwe mi lamot ngenikich ach sipwe silei usun Jiowa me Néún we Jesus, pwe sipwe manaw tori feilfeiló. Ewe Paipel a apasa: ‘Iei ewe al ngeni manaw esemuch. Sipwe káé usun ewe emén chék Kot mi enlet me ewe Nau mi tiinaato ngeni fénúfan, Jesus Kraist.’

Epwe ifa usun ach sipwe tongeni káé usun Jiowa Kot me Néún we Jesus? Iei eú, sipwe álleani ei Nei Puken Pwóróusen Paipel seni lepoputáán tori lesópwólóón. A áiti ngenikich chómmóng mettóch usun Jiowa me Jesus, ika met? Iwe, a pwal áiti ngenikich ekkewe mettóch ra fen féri me ekkewe mettóch repwap féri. Iwe nge, ese naf ach sipwe chék álleani ei puk pwe mi wor pwal och mettóch sipwe féri.

En mi kúna ena puk mi nónnóm fan? Ina ewe Paipel. Kopwe tingorei emén an epwe állea ngonuk ekkewe kinikin seni ewe Paipel, ikewe ie ekkewe pwóróus lón ei puk ra popu seni. Ewe Paipel a awora unusen meinisin ekkewe pwóróus mi lamot ngenikich ren ach sipwe tongeni angang ngeni Jiowa lón ewe napanap mi pwúng me pwal kúna manaw esemuch. Iwe sipwe eérenaaló le káé ewe Paipel iteitan.

Nge ese naf ach sipwe chék káé usun Jiowa Kot me Jesus Kraist. Sia tongeni silei chómmóng, chómmóng mettóch usur me ar kewe afalafal, nge ese naf ach sipwe kúna manaw esemuch. En mi silei met epwe pwal lamot?

A pwal lamot ach sipwe etipeeúfengeni manawach ngeni ekkewe mettóch sia káé. En mi chechchemeni Jutas Iskariot? I emén me lein ekkewe engol me rúúemén Jesus a filatá pwe repwe néún aposel. A watte án Jutas silei usun Jiowa me Jesus. Nge met a fis ngeni? Mwirin och fansoun, a wiliiti emén mi kútta chék pwisin letipan me a afangemá Jesus wóón 30 féún silifer ngeni chón oput. Iwe Jutas esap kúna manaw esemuch.

Ka chechchemeni Kehasi, ewe mwán sia káé usun lón Pwóróus 69? A mochen úfeni ekkóch úf me néúni och moni, nge esap an ekkewe pisek. Iwe a kapas chofona ren an epwe angei ekkeei mettóch. Nge, Jiowa a apwúngú. Iwe epwe pwal apwúngúkich ika sise álleasochisi an kewe allúk.

Nge mi fen wor chómmóng aramas mi angang ngeni Jiowa fansoun meinisin fán tuppwél. Sia mochen ach sipwe usur, ika met? Ewe kúkkún át Samuel, i eú leenien áppirú mi múrinné ach sipwe áppirú. Chechchemeni pwe a chék rúáánú are nimu ierin lupwen a poputá le angang ngeni Jiowa lón an we imwenfel, usun sia fen kúna lón Pwóróus 55. Iwe ese lifilifil ika fite ierum, nge ka tongeni angang ngeni Jiowa.

Ren enletin, oukich meinisin sia mochen áppirú Jesus Kraist. Leátin we, a fen nónnóm lón ewe imwenfel, a kakkapas ngeni aramas usun Seman we lón láng, usun met a fen pwá lón Pwóróus 87. Sipwe áppirú an féffér. Sipwe ereni chómmóng aramas ren úkúkún ach tufich usun ach we Kot mi amwarar Jiowa me Néún we Jesus Kraist. Ika pwe sia féri ekkeei mettóch, iwe sipwe tongeni kúna manaw esemuch lón án Kot we paratis mi fé wóón fénúfan.