Ifa Usun ewe Library lón ewe Leenien Mwich Epwe Tongeni Álisikich?

En mi pwapwaiti le kútta sókkópaten pwóróus pwe epwe lapoló óm sile lón Paipel? Ka fen ekieki usun eú wokisin lón Paipel, are emén aramas, eú leeni are och mettóch mi mak lón Paipel? Are ka fen ekieki ika án Kot we Kapas a tongeni álisuk lón ekkewe mettóch ka lólilen usur? Iwe, ka tongeni néúnéú néúch kewe puk mi iseis lón ewe library lón ewe Leenien Mwich.

A kawor ekkewe minen álillis le kútta pwóróus. Ese mwáál, ese nóm reom meinisin néún Chón Pwáraatá Jiowa kewe puk mi lóngólóng wóón Paipel a kawor lón pwisin fósun fénúom. Nge lap ngeni néúch kewe puk mi kerán katowu ra nóm lón ewe library lón ewe Leenien Mwich. A pwal tongeni wor sókkópaten afféún Paipel, dictionary mi éch, me pwal ekkóch puken áweween pwóróus. A suuk ngonuk óm kopwe áeá ewe library mwen are mwirin mwich. Ika a wor computer lón, eli epwe wor ewe Watchtower Library lón. A chómmóng néúch kewe puk mi iseis lón ena prokram lón computer me a ámecheresi óm kopwe kútta pwóróusen eú itelap, eú wokisin lón Paipel are áweween eú kapas.

Mi álilliséch ngeni chókkewe mi fiti ewe Manawach me Ach Angangen Afalafal Mwich. Ika ka fen fiti ei sukul, ewe library lón ewe Leenien Mwich a tongeni álisuk lón óm ammolnatá óm kewe afalafal. Ewe chón túmúnú ena sukul a wisen túmúnú ewe library. A piiéchú pwe ekkewe puk mi kerán katowu repwe nóm lón ewe library me iir meinisin repwe kókkótéch. Ena chón túmún are ewe chón káé ngonuk epwe tongeni áituk ifa usun kopwe kútta pwóróus mi lamot ngonuk. Iwe nge, sisap uwei ekkewe puk seni ewe Leenien Mwich. Sia pwal mochen túmúnú ekkewe puk me sisap makkeei lón.

Ewe Paipel a áweweei pwe ren ach sipwe “silei Kot,” mi lamot sipwe achocho le kútta ena sile usun chék ach “kütta pisek aüchea mi monomon.” (Än Salomon Fos 2:1-5) Ewe library lón ewe Leenien Mwich a tongeni álisuk le poputá kútta ena sile.

• Met sókkun puk me minen álillis a nóm lón ewe library lón ewe Leenien Mwich?

• Ié epwe tongeni álisuk óm kopwe áeáfichi ewe library?