Pwata A Lamot Epwe Wor Nöüch Puken Pwisin Käeö are Library?
A lamot ngeni Chon Pwäratä Jiowa ar repwe pwisin käeö. (Jon 17:3) Ika a wor library lon imwach, epwe mecheres ach sipwe pwisin kütta pworaus are pölüwen ekkoch kapas eis, me ammolnatä fän iten ach kewe mwich. A fokkun lamot sipwe eäni eü library mi ämecheresi ach weweiti pworaus seni Paipel.
Iei pwal eü popun a öch epwe wor ach library lon imwach, pun emön me emön Chon Kraist epwe “püsin mwärei wosan.” (Kal. 6:5) A lamot sipwe eöreni le akkomw pwisin kütta pworaus atun a ppiitä eü kapas eis, iwe mwirin, ika sise küna pölüwan, sipwap kapas eis ngeni emön pwiich. Sia tongeni alapalo miritich me weweöchüch ren ach achocho le käeöfichi ewe Kapasen Kot me äeäfichi ach na library lon imwach.—Ipru 5:11-14.
A lamot än Jiowa we manaman me än we mwicheich kewe minen älillis pwe sipwe weweöchüti ewe Kapasen Kot. (Fof. 8:30, 31) Ewe Leenien Mas, ina eü me lein ekkewe minen älillis mi lamot. Sipwe isoni eü me eü ekkena Leenien Mas lon ach we library. Atun sia käeö äweweei eü wokisin lon Paipel lon ewe Leenien Mas, sipwe makketiw pwinin maramen me pekin taropween ena puk ünükün ena wokisin pwe sipwe tongeni enniwilisefälli ena pworaus lon pwal eü fansoun.
Ekkoch sam me in ra fen älisi nöür kewe ar repwe pwisin för ar library, pun ra ekieki osupwanger iei me pwal lon fansoun mwer. Eli epwe mecheres ika a wor eü sälifen puk fän iten chon ewe famili pwe repwe käeö. Ese wor tipemwaramwar pwe mi aüchea an epwe wor eü library lon imwach kewe.