Ewe Mwú A Kinikinfesen

Iká Salomon a chék sópweeló le fel ngeni Jiowa, iwe epwe wor kinamwe lón Israel. Nge Salomon a pwúlúweni chómmóng fefin seni ekkóch leeni, me pwúlúwan kena ra fel ngeni uluulun. Ekis me ekis, Salomon a siwil, me poputá le fel ngeni ekkewe uluulun. Jiowa a song, me a ereni Salomon: ‘Israel esap chúen nóm fán nemenien óm famili me epwe kinikinitiw lón ruu mwú. Úpwe ngeni emén me lein noum kewe chón angang ewe watteen mwú nge óm we famili epwe chék nemeni ewe kúkkún mwú.’

Jiowa a affata met a filaatá lón pwal eú napanap. Emén me lein néún Salomon kewe chón angang itan Jeropoam a chuuri ewe soufós Ahia atun a sái wóón ewe al. Ahia a kamwetiw úfan we lón 12 kinikin me a ereni Jeropoam: ‘Jiowa epwe angei ewe mwúún Israel seni án Salomon we famili me kinietiw lón ruu mwú. Kopwe angei engol kinikin pokiten kopwe kingen ekkewe engol einang.’ King Salomon a rong ussun ena me a mochen nieló Jeropoam! Iwe, Jeropoam a sú ngeni Isip. Mwirin och fansoun, Salomon a máló me néún we át itan Reopoam a wiliiti king. Iwe, Jeropoam a meefi pwe iei a tongeni liwiniti Israel.

Ekkewe chinnapen Israel ra ereni Reopoam: ‘Iká ka kirekiréch ngeni ekkewe aramas, repwe túppwél ngonuk.’ Nge táppin Reopoam kewe ra erá: ‘Kopwe áweiresi ekkewe aramas! Kopwe alapaaló weiresin ar angang!’ Reopoam a fiti án táppin kana éúréúr. A arochongaw ngeni ekkewe aramas, me ra ú ngeni. Ra seikaatá Jeropoam an epwe kingen ekkewe engol einang, iwe ra eita ngeni ewe mwúún Israel. Ekkewe lusun ruu einang ra iteni ewe mwúún Juta, me ra túppwél ngeni Reopoam. Iwe, ekkewe 12 einangen Israel ra kinikinfesen.

Jeropoam ese mochen án néún kewe aramas repwe feiló fel lón Jerusalem, ewe mi nóm fán nemenien mwúún Reopoam. Ka silei pwata? Jeropoam a niwokkus iká repwe likitaaló me álisaatá Reopoam. Ina popun, a féri rúúemén kou seni kolt me ereni néún kewe aramas: ‘Jerusalem a kon towaw. Oua tongeni féri ámi fel ikeei.’ Ekkewe aramas ra poputá le fel ngeni ekkewe kou mi ffér seni kolt me ra ménúkaaló Jiowa sefál.