LESEN 11

Mwasangasang

Föför 18:24, 25

MENLAPAN: Apwapwatáái me amwékútú letipen chón aúseling ren óm kapas fán mwasangasang.

Mut ngeni ewe pwóróus epwe achchúngú letipom. Atun óm ammólnatá óm afalafal, ekiekifichi lamoten ewe pwóróus kopwe atoura. Achocho le sileéchú pwe kopwe tongeni eáni seni lón letipom.
Ekieki ekkewe chón aúseling. Ekilonei ifa usun ewe pwóróus kopwe álleanawu are asukula epwe álilliséch ngeni ekkewe ekkóch. Ekieki ifa usun kopwe eáni óm afalafal lón ewe napanap epwe alapaaló ar aúcheani ewe pwóróus.
Afalafal fán mwasangasang. Kopwe féri ena lón óm kapas, pwal lón pwomwen inisum me wówóón wóón mesom pwe epwe pwáraawu meefiom.

Túmúnú pwe kosap orukaló ekkewe chón aúseling ren óm enniwili me enniwili och pwoomw ka eérenaaló le pwomweni. Kopwe áeá pwoomw mi álilliséch. Kopwe ákkáeúin mwasangasang atun ka asukula ekkewe menlapen pwóróus me atun ka amwékútú letipen ekkewe chón aúseling pwe repwe anganga met ra káé. Kosap efisi ar repwe pekkusuló ren óm mwasangasang lón unusen óm we afalafal.