LESEN 18

Alapaaló Sileien Chón Aúseling

1 Korint 9:19-23

MENLAPAN: Álisi ekkewe chón aúseling ar repwe pwisin anganga ar tufichin ekiek pwe repwe meefi pwe ra kerán káé och mettóch mi aúchea.

Ekieki met ekkewe chón aúseling ra fen silei. Álisiir le alapaaló ar weweiti ewe pwóróus ren óm eáni pwal och áweween, nge kosap chék ekkenniwili ekkewe ra fen piin rong.

Lupwen ka fós wóón ekkewe mineféén pwóróus, kopwe akkammang. Nge ekkewe ra fen piin sissilei, ese pwal lamot kopwe attama óm fansoun wóór.
Kútta pwóróus me ekilon. Atun óm áweweei ekkewe menlapen pwóróus, neman ka tongeni apachaalong ekkewe pwóróus chón aúseling rese kan rorrong usun are ekkewe mettóch mi kerán fis. Nge kopwe ekiekifichi óm afalafal me ekkena pwóróus me túmúnú pwe repwe wesewesen ririfengen.

Atun óm etittina ekkewe mettóch óm afalafal a lóngólóng wóón, anganga ekiekum ren óm pwisin eisinuk ekkeei esin kapas eis: ‘met, pwata, ineet, ia, ié, me ifa usun.’ Amwasangasanga óm asukul ren óm eppiietá me pélúweni ekkena kapas eis atun óm we afalafal.
Pwári álilliséchún ewe pwóróus. Áweweei ngeni ekkewe chón aúseling ifa usun minne ka áiti ngeniir seni Paipel a tongeni álisiir lón manawer rán me rán. Pwóróus wóón ekkewe mettóch mi weneiti manawen ekkewe chón aúseling.