“Oupwe Chok Mamasa”

“Iei minne oupwe chok mamasa, pun ouse sinei ranin an noumi Samol epwe feito.”​—MATTU 24:42.

1. Met meefien noun Jiowa kewe chon angang mi fen akkangang ngeni ren chommong ier? Awewe mwo.

CHOMMONG noun Jiowa kewe chon angang mi fen angang ngeni fansoun langattam ra fen kaeo ewe enlet lupwen ra chuen aluwon me fopwul. Ussun chok ewe chon amomo mi amomolo pisekin meinisin le mooni ewe fau mi auchea a kuna, ekkena chon kaeo Paipel mi meseik ra pennuku me fangelo manauer ngeni Jiowa. (Mattu 13:45, 46; Mark 8:34) Met meefier ussun ar wikitiwit ren och fansoun mi ttam seni minne ra ekieki ren ar repwe kuna pwonuetaan an Kot kokkot ngeni fonufan? Rese niamam! Ra tipeeu ngeni alon Brother A. H. Macmillan, emon mi fen angang ngeni Kot ren arapakan 60 ier: “Ua fen uppos le likiitu lon ai luku. Pokiten ena, manauei mei wor lamotan. Tori iei a alisiei pwe usap niueti met epwe fis lon mwach kkan.”

2. (a) Ifa ewe emmwen mi fich Jises a ereni noun kewe chon kaeo? (b) Ikkefa ekkewe kapas eis sipwe fos ussun lon ei lesen?

² Ifa ussun en? Ese lifilifil fite ierum, ekieki an Jises kewe kapas: “Iei minne oupwe chok mamasa, pun ouse sinei ranin an noumi Samol epwe feito.” (Mattu 24:42) Ekkena kapas mi mecheres a masou ren enlet mi alollol. Sise silei ineet ewe Samol epwe apwungu ei otot mi ngau, me ese pwal lamot ach sipwe silei. Nge mi lamot ach manaueni manauach pwe lupwen a feito, sisap niamam. Iwe, ikkefa ekkewe poraus lon ewe Paipel repwe alisikich le mammasa? Ifa ussun Jises a awewei won? Me ifa ewe pisekin annet ikenai mi anetata pwe sia manau lon ekkewe sopwoloon ranin ei fonufan mi towau seni Kot?

Eu Minen Ourour

3. Ifa ussun chommong aramas ikenai ra ussun chok ekkewe lon ranin Noa we?

³ Lapalapen chommong aramas ikenai a ussun lapalapen ekkewe mwan me fefin mi manau lon ranin Noa we. Lon ena atun ewe fonufan a ur ren mwaneson, me ekiekin leluken aramas mi “chok ngauala fansoun meinisin.” (Keneses 6:5) Chommong ra osukosuk iteiten ran. Iwe nge, mwen an Jiowa tinato ewe Nooter, a suuk ngeni aramas ewe tufichin aier. A awiisa ngeni Noa epwe afalafal, me Noa a alleasochis​—ren an angang ussun “ewe sounpetak mi pung” ukuukun 40 are 50 ier are lap seni. (2 Piter 2:5) Iwe nge, ekkewe aramas ra tunalo an Noa kapasen ourour. Rese mammasa. Iwe, le sopwoloon, Noa chok me an we famili ra manau lupwen a fis an Jiowa we kapwung.​—Mattu 24:37-​39.

4. Ifa ussun sipwe tongeni apasa pwe Noa a sopwoch lon an angangen afalafal, me ifa ussun sipwe pwal apasa ina ussun ren ach angangen afalafal?

⁴ Noa a sopwoch lon an we angangen afalafal? Kesap apwungu i pokiten mi chok chokkukun ekkewe mi auseling ngeni. Pwata? Pokiten a atufichi an aramas filata ika repwe are resap angang ngeni Jiowa. Nge ifa ussun om leenien afalafal? Inaamwo ika ese chommong mi mochen auseling, nge ka sopwoch lon om angang. Pwata? Pokiten ren om afalafal, ka esilefetalei an Kot ourour me ka apwonueta ewe angang Jises a awiisa ngeni noun kewe chon kaeo.​—Mattu 24:14; 28:19, 20.

Amonungau Seni Noun Kot Kewe Soufos

5. (a) Met sokkun foffor ra choufetal lon Juta lon ranin Apakuk, me met meefien aramas ussun an Apakuk kapasen oesini? (b) Ifa ussun ekkewe aramas lon Juta ra pwarata ar oput noun Jiowa kewe soufos?

⁵ Fitepuku ier mwirin ewe Nooter, muun Juta a kuna osukosuk watte. Fel ngeni uluulun, pwungungau, aweiresi aramas, me pwal mwo nge nni manau a choufetal. Jiowa a autai Apakuk pwe epwe ouroura ekkewe aramas pwe ika rese aier, feiengau epwe toriir seni Chon Kaltia, are Chon Papilon. (Apakuk 1:5-7) Nge ekkewe aramas rese mochen auseling. Eli ra ekieki, ‘Maa, lap seni ipuku ier loom, ewe soufos Aisea a fen apasawu eu ourour mi wewe chok, nge tori iei esaamwo wor mettoch a fis!’ (Aisea 39:6, 7) Chommong lein ekkewe nouwisin Juta rese chok mochen auseling ngeni ewe poraus nge ra pwal oputa ekkewe chon uwei ewe poraus. Fan eu, ra sotun nnielo ewe soufos Jeremaia, me repwe fen ita apwonueta ika Ahikam ese pineer. King Jehoiakim a efisata nninniloon ewe soufos Urijah pokiten an song lupwen a rongorong pwal eu poraus seni Kot.​—Jeremaia 26:21-​24.

6. Ifa ussun Jiowa a apochokkula Apakuk?

⁶ An Apakuk we poraus a pwal pochokkul, me aramas ra oput ussun chok ar oput an Jeremaia we, inaamwo ika Kot a awiisa ngeni Jeremaia pwe epwe oesini pwe Juta epwe tatakkis ren ukuukun 70-ier. (Jeremaia 25:8-​11) Ina popun, sia tongeni weweiti an Apakuk lolilen lupwen a apasa: “Ai Samol mi Lapalap, ifa ukukun fansoun ai upwe sio ngonuk pwe kopwe awora om alilis, nge kopwap auselinga? Ifa ukukun fansoun ai upwe sio ngonuk fan iten ewe angangen mwanewus, nge kopwap amanauakem?” (Apakuk 1:2) Jiowa a kapas pwotete le apochokkula Apakuk ren ekkeei kapas: “Pun mine upwe pwari ngonuk epwap pwonueta lon eu fansoun mi kefilita. Nge fansoun an epwe pwonueta epwe fokun muttir, nge esap chofona. Are epwe mang le pwonueta, kopwe chok witiwit. Epwe fokun pwonueta, nge esap mang.” (Apakuk 2:3) Iwe, mei wor an Jiowa “fansoun fich” fan iten an epwe awesalo pwungungau me ekkewe mettoch mi aweiresi aramas. Ika epwe mmangolo, Apakuk esap letipengau, are esap pwal ekisalo an angang. Nge, epwe “chok witiwit,” me manaueni manauan iteiten ran ren ngunun atapwalapwal. Ranin Jiowa we esap mmang!

7. Met popun Jerusalem epwe talo sefal lon ewe aewin senturi C.E.?

⁷ Orun 20 ier mwirin Jiowa a fos ngeni Apakuk, Jerusalem, iolapen ewe telinimwen Juta a talo. Mwirin a forsefal, me a awenecharelo chommong mettoch mi ngau mi fen aletipengaua Apakuk. Iwe nge, lon ewe aewin senturi C.E., ewe telinimw epwe tasefalilo pokiten lukulukummangen ekkewe aramas lon. Nge ren an Jiowa umoumoch, a akkota pwe ekkewe mi pwung repwe manau. Lon ei atun, a tiinalo Jises, ewe soufos mi murinno seni meinisin, le uwei ewe poraus. Lon 33 C.E., Jises a ereni noun kewe chon kaeo: “Nge are oupwe kuna ekkewe mwichen sounfiu ra pwellifeili Jerusalem, iwe, oupwe sinei pwe an we tatakkis a arapoto. Lon ewe fansoun, ir mi nonnom Jutia repwe suta won chukuchukuta.”​—Luk 21:20, 21.

8. (a) Eli met a fen fis ngeni ekkoch Chon Kraist lon ekkewe fansoun mwirin maloon Jises? (b) Ifa ussun an Jises oesini ussun Jerusalem a pwonueta?

⁸ Lo, lo, lo, eli ekkoch Chon Kraist lon Jerusalem ra ekieki ineet an Jises oesini epwe pwonueta. Ekieki mwo ekkewe mettoch ekkoch leiir ra fen asorata. Eli ekkoch ra fangeta winner lon pekin business pokiten ar uppos le mammasa. Lo, lo, lo, ra molululo? Meefier pwe ra fen asolapa ar fansoun, me ra eani ekiek pwe an Jises we kapas ese weneiti ar fansoun nge a weneiti ekkewe tappin aramas lon mwach kkan? Lon 66 C.E., an Jises oesini a poputa le pwonuta lupwen sounfiuen Rom ra rokopwalli Jerusalem. Ekkewe mi mammasa ra esinna ewe esissin, ra su seni ewe telinimw, me rese feiengau lupwen Jerusalem a talo.

Menlapei ewe Lamoten Ach Mammasa

9, 10. (a) Ifa ussun kopwe menlapei an Jises Kapas awewe ussun ewe chon angang mi wikitiwiti liwintoon nour we masta mwirin an apupulu? (b) Ifa ewe popun eli epwe weires ngeni ekkoch chon angang ar repwe witiwiti waretoon nour masta? (c) Pwata epwe lamot ngeni ekkewe chon angang ar repwe mosonottam?

⁹ Lupwen Jises a menlapei ewe lamoten ach mammasa, a alollofengenni noun kewe chon kaeo ngeni ekkewe chon angang mi witiwiti liwinsefallin nour we masta mwirin an apupulu. Ra silei pwe epwe liwinto le pwin​—nge lon menni kulok? Atun ewe aewin kinikinin pwin? Ewe oruuan? Ewe aulungatin? Rese silei. Jises a apasa: “Are atewe epwe feito lon aruuen kinikinin pwin, are aulungatin, o epwe kuna pwe ra mammasa, iwe, ekkewe chon angang repwele feioch.” (Luk 12:35-​38) Anchangei mwo meseiken ekkena chon angang. Akurang meinisin, ngunuan mettoch ese lifilifil epwe alapalo ar mwasangasang le witiwit: ‘Esap iei nouch masta?’

¹⁰ Nge epwe ifa ussun ika ewe masta a liwin lon oruuan kinikinin pwin, a wewe ngeni kulok 9 tori 12 lukenipwin? Ekkewe chon angang meinisin, kapachelong meinisin mi angang weires seni lesossor, repwe mmonleta le kapong ngeni, are repwe fen onnut? Nge epwe ifa ussun ika ewe masta a liwin atun ewe aulungatin kinikinin pwin​—seni kulok 12 lukenipwin tori kulok ulungat lesossor? Ekkewe ekkoch chon angang repwele fen letipengau, pwal mwo nge chipwangelo pokiten mmangen nour we masta?a Ekkewe chok mi mammasa lupwen ewe masta a liwin repwe feioch. Ekkewe kapas lon An Salomon Fos 13:12 epwe weneitiir: “Are an eman apilukuluk a mang le pwonueta, i epwe letipengau, nge are an eman mochen a pwonueta, iei apochokulen manauan.”

11. Ifa ussun iotek epwe alisikich le mammasa?

¹¹ Lon ewe atun a mmangoto, met epwe alisi noun Jises kewe chon kaeo le mammasa? Lupwen Jises a nonnom lon ewe malamalen Ketsemeni mwen an ares, a ereni ulumon noun kewe aposel: “Oupwe mamasa o iotek, pwe oute tolong lon sosot.” (Mattu 26:41) Fitu ier mwirin, Piter, emon mi pwal nonnom lon ena atun, a awora emmwen mi wewe chok ngeni chienan kewe Chon Kraist. A makkei: “Sopolon mettoch meinisin a fen arapoto; iwe, oupwe tipatchem o ononoto ngeni iotek.” (1 Piter 4:7) A ffat pwe iotek epwe eu kinikin mi lamot lon an Chon Kraist kokkot. Pwungun pwe mi lamot ach sipwe tittingorei Jiowa pwe epwe alisikich le mammasa.​—Rom 12:12; 1 Tesalonika 5:17.

12. Met sokkofesennin ach pwisin anchang me ach mammasa?

¹² Nengeni mwo pwe Piter a pwal apasa: “Sopolon mettoch meinisin a fen arapoto.” Ifa ukuukun arapoto? Aramas rese tongeni esissinata titchikin ewe ran are ewe kulok. (Mattu 24:36) Nge mei wor sokofesennin an emon pwisin anchangei ineet epwe fis sopwoloon, eu mettoch ewe Paipel ese peseekich le fori, me an emon mammasa warotoon ewe sopwoloon, eu mettoch a peseekich le fori. (Alollo ngeni 2 Timoti 4:3, 4; Taitos 3:9.) Ifa ussun sipwe tongeni mammasa warotoon ewe sopwoloon? Ren ach ekilapei ewe pisekin annet pwe ewe sopwoloon mi arapoto. Iwe, sipwe enniwili wonu sokkun pisekin pwarata mi anetata pwe sia manau le sopwoloon ei fonufan mi towau seni Kot.

Wonu Sokkun Pisekin Pwarata Mi Alukuluk

13. Ifa ussun an Paul we oesini lon 2 Timoti sopwun 3 a alukulukukich pwe sia manau lon “ewe ranin sopwoloon”?

¹³ Aewin, sia fataffatoch le kuna pwonuetaan an ewe aposel Paul oesini ussun “ewe ranin sopwoloon.” Paul a makkei: “Fansoun weires epwe waroto lon ekkewe ran le sopolon. pun aramas repwe tongei pwisin ir, repwe tongei moni, repwe sikasini, lamalam tekia, esiita, alleasolapa semer kewe me iner; resap meefi kilisou, o manauer esap fel, esap wor ar chen, repwe pwisin nemenemenir, repwe luapas, resap mosonoson, repwe mocho, repwe oput minne mi murinno; repwe chon afangema, repwe tumunungau, angolsa, repwe aucheani chok minne repwe pwisin pwapwa ren, nge resap tongei Kot; repwe amwochu pwomen ewe manau mi fich ngeni Kot, nge repwe amam manamanan. Iwe, kopwe pwisin imu seni ekkeei sokkun aramas. O ekkewe aramas ingau, pwal ekkewe chon likotuputup, repwe chok alapalo ar fofor-ingau, ra otupu ekkoch, nge ekkoch ra pwal otupu ir.” (2 Timoti 3:1-5, 13) Sia kuna pwonuetaan ei oesini lon ach keei ran? Ekkewe chok aramas mi tunalo ekkewe pisekin pwarata repwe apasa aapw!b

14. Ifa ussun ekkewe kapas lon Pwarata 12:9 ussun ewe Tefil a pwonueta ikenai, me met epwele fis ngeni ekiselo chok?

¹⁴ Oruuan, sia kuna met a fisita lupwen Setan me noun kewe timon ra turutiu seni lang, ren pwonuetaan Pwarata 12:9. Ikena ie, sia alleani: “Iwe, ewe traikon mi lap a turutiu, ewe serpentin lom lom, ewe a iteni Tefil me Satan, ewe mi otupu fonufan meinisin. Ra oturatiu i won fonufan, o noun kewe chonlang ra pwal eti i.” Ei mettoch a efisata riaffou mi watte ngeni ewe fonufan. Pwungun pwe, a fen watte ewe osukosuk fan iten aramas, akkaewin seni 1914. Nge ewe oesini lon Pwarata a pwal apasa pwe lupwen ewe Tefil a turutiu won fonufan, a silei pwe “an we fansoun a chok mochomoch.” (Pwarata 12:12) Lon ei atun, Setan a maun ngeni noun Jises kewe chon kaeo mi kepit. (Pwarata 12:17) Sia fen kuna liwiningauen an maun lon ach ei fansoun.c Iwe nge, ekiselo chok, Setan epwele kalapus lon ewe apis pwe “esap chuen otupu ekkewe mu.”​—Pwarata 20:1-3.

15. Ifa ussun Pwarata 17:9-​11 a awora pisekin pwarata pwe sia manau lon fansoun sopwoloon?

¹⁵ Aulungatin, sia manau lon fansoun ewe awoluen me saingoon “king” ewe oesini mi mak lon Pwarata 17:9-​11 a fos ussun. Ikei ie ewe aposel Jon a fos ussun fumon king, mi wewe ngeni fisu muun fonufan​—Isip, Asiria, Papilon, Meto-Persia, Kriis, Rom, me ewe muu mi pochokkul itan Anglo-America. A pwal kuna ewe ‘awalumonun king’ nge “a chok kifetin ekkewe fumon.” Ei awalumonun king​—ewe saingoon Jon a kuna lon an we langepwi​—a wewe ngeni ewe United Nations. Jon a apasa pwe ei awalumonun king a “feilo ngeni kiteter,” nge mwirin ese chuen fos ussun emon king seni fonufan.d

16. Ifa ussun met a fiffis me ren pwonuetaan ewe uluulun lon an Neputkanessar ttan a pwarata pwe sia manau lon ewe ranin sopwoloon?

¹⁶ Aruaanun, sia manau lon ewe fansoun mi liosueta ren pechen ewe uluulun lon an Neputkanessar we ttan. Ewe soufos Taniel a awewei ei ttan ussun eu uluulun aramas mi fokkun watte. (Taniel 2:36-43) Ekkewe ruaanu kinikinin ewe uluulun mi ffor seni mecha a weneiti sokkopaten muu mi pochokkul, poputa ren ewe mokur (ewe Muun Papilon) me tori pechen me autun pechen (ekkewe muu mi nemenem iei). Ekkewe muu mi pochokkul ena uluulun a liosueta ra fen nemenem. Sia manau iei lon ewe fansoun pechen ewe uluulun a liosueta. Ese pwal wor porausen eu muu mi pochokkul epwe nemenem mwirin.e

17. Ifa ussun ach angangen afalafala ewe Muu a awora pwal ekkoch pisekin pwarata pwe sia manau lon ewe fansoun sopwoloon?

¹⁷ Alimuen, sia kuna pwonuetaan ewe angangen afalafal won unusen fonufan, Jises a apasa epwe fisita me mwen sopwoloon ei otot. Jises a apasa: “Ei kapas allim usun ewe mu epwe esineifeili won unusen fonufan, pwe epwe pwar ngeni einang meinisin. Iwe, ina sopolon.” (Mattu 24:14) Ikenai, ena oesini a pwonueta lon eu lapalap ese mwo fis seni loom. Pwungun pwe, mi chuen wor ekkoch leeni sisaamwo afalafal ie, me eli lon ewe fansoun Jiowa a filata, eu asam lap ngeni angang mi lamot epwe suuk. (1 Korint 16:9) Ewe Paipel ese apasa pwe Jiowa epwe witiwit tori ekkewe chon afalafal ra fen chuuri aramas meinisin won fonufan. Nge, ewe kapas allim epwe arongorongfetal tori Jiowa a menemenoch. Iwe, ewe sopwoloon epwe fis.​—Alollo ngeni Mattu 10:23.

18. A ffat pwe ekkkoch aramas mi kepit repwe foffori met le poputaan ewe riaffou mi lapalap a poputa, me ifa ussun sipwe miritiiti ei mettoch?

¹⁸ Awonuan, chochoon noun Jises kewe chon kaeo mi kepit a kisikisilo, inaamwo ika ekkoch leir repwe chuen nonnom won fonufan lupwen ewe riaffou mi lapalap epwe poputa. Lape ngeni ekkewe lusun mi kepit ra chinnap, me lon ekkewe ier a fen lo, chochoon ekkewe mi enletin kepit a fen kisikisilo. Nge, lupwen Jises a fos ussun ewe riaffou mi lapalap, a apasa: “Ika esap mochomochelo ekkewe ran, esor emon epwe manau; nge epwe mochomochelo ekkewe ran pokiten chon filita.” (Mattu 24:21, 22) Iwe, a ffat pwe ekkoch lein noun Jises “chon filita” repwe chuen nonnom lon fonufan le poputaan ewe riaffou mi lapalap.f

Met Epwe Fis Lon Mwach Kkan?

19, 20. Met popun mi lamot iei lap seni me loom ach sipwe nennelo me mammasa?

¹⁹ Met epwe fis lon mwach kkan fan itach? Fansoun mi ameseik epwe chuen fisita. Paul a ouroura pwe “ranin ewe Samol epwe waroto usun chok warawaren emon chon sola lepwin.” Lupwen a fos ussun ekkewe mwan mi nikinikin tipatchem ren tipatchemen fonufan, Paul a apasa: “Lupwen aramas repwe apasa, ‘Kinamwe pwal nukunukoch,’ iwe, kiteter epwe muttir feilo wor.” Ina popun, Paul a pese ngeni aramas mi alleani makkean we: “Sisap okonnut usun ekkewe ekkoch, nge sipwe mamasa o forfichi.” (1 Tesalonika 5:2, 3, 6) Pwungun pwe, ekkewe mi eani apilukuluk won mwicheichen aramas pwe repwe wato kinamwe me lukulukoch ra oputalo ekkewe pisekin pwarata. Ekkena aramas ra onnut!

²⁰ Taloon ei otot epwe fisita lupwen sise ekieki. Ina popun, sipwe mwotores le wikitiwiti ranin Jiowa we. Kot a ereni Apakuk: “Esap mang”! Pwungun pwe a fokkun lamot ach sipwe mammasa lap seni loom.

[Ppii ekkewe pwóróus fan]

En Mi Chechchemeni?

• Menni kapas awewe lon Paipel epwe alisikich le mammasa?

• Ifa ussun Jises a awewei ewe lamoten ach mammasa?

• Ikkefa ekkewe wonu pisekin pwarata mi anetata pwe sia manau lon ranin sopwoloon?

[Sasing lon pekin taropwe 21]

A. H. Macmillan a angang ngeni Jiowa ren tuppwol ren arapakan 60 ier

[Sasing lon pekin taropwe 22]

Jises a alollofengenni noun kewe chon kaeo ngeni ekkewe chon angang mi mammasa