“Ami Meinisin Pwipwi Eu Chok”

“Nge ami ousap eiten ngenikemi Rappai, pun mi wor emon chok noumi sense, nge ami meinisin pwipwi eu chok.”​—MATTU 23:8.

1. Menni poraus a fich ngeni ach sipwe ekekieki?

“ION lein emon misineri me emon Chon Bethel epwe fich ngeni ach sipwe sufoliiti akkom?” emon fin Esia a eisini emon misineri seni Australia. Neminnan a mochen silei ika menni lein emon misineri seni pwal eu fonu are emon mi angang lon ewe ofesin Watch Tower Society lon pwisin fonuan we a fich ngeni an epwe sufoliiti akkom. Ewe misineri a ekis mairu lupwen a rong ei kapas eis mi pwaraalo ekiekin aramas lon ekkoch fonu ikewe ie a fokkun lamot ukuukun tekian aramas. Ena kapas eis ussun menni aramas a lapalap, a pop seni an aramas mochen silei ukuukun an emon manaman me foummong.

2. Epwe ifa ussun sipwe ekieki ussun chienach kewe chon luku?

² Ei kapas eis esap eu poraus mi fo. Pwal mwo nge noun Jises kewe chon kaeo ra akkanini ussun io leir a lapalap. (Mattu 20:20-​24; Mark 9:33-​37; Luk 22:24-​27) Aramaser, Chon Jus lon ewe aewin senturi, ra pwal ekkekieki ukuukun tekian emon. Jises a chechchemeni ei sokkun aramas lupwen a awora fon ngeni noun kewe chon kaeo: “Nge ami ousap eiten ngenikemi Rappai, pun mi wor emon chok noumi sense, nge ami meinisin pwipwi eu chok.” (Mattu 23:8) Ewe sou kaeo Paipel itan Albert Barnes a fos ussun ekkewe itelap lon pekin lamalam, ussun chok “Rappai,” weween “Sense,” ren ewe awewe pwe ra “kan efisi an emon lamalam tekia me an ekiek pwe a tekia seni chokkewe esor itelaper, me lolowo me an aramas ekiek pwe ra kisikis fan chokkewe mei wor itelaper; me ena esin ekiek a u ngeni ‘ewe kokkot mi murinno ren Kraist.’” Pwungun pwe Chon Kraist rese kori chokkewe mi awora emmwen ren ewe itelap “Elter” fiti iter, a ussun ita pwe ewe kapas “elter” eu minen alingalo aramas. (Hiop 32:21, 22) Iwe nge, ekkewe elter mi apwonueta alon an Jises fon, ra asamolu chon ewe mwichefel, ussun chok Jiowa a asamolu noun kewe chon fel mi tuppwol me Jises Kraist a pwal asamolu noun kewe mi tuppwol.

An Jiowa Me Jises Leenien Appiru

3. Ifa ussun Jiowa a asamolu noun kewe chonlang?

³ Inaamwo ika Jiowa ewe mi “Tekia Seni Meinisin,” nge, me le poputaan, Jiowa a asamolu forian kewe ren an etiweer le fiti i lon an kewe angang. (Kol Fel 83:18) Lupwen a forata ewe aemonun aramas, Jiowa a etiwalong noun we Alaemon, ussun chok “eman sousile angang.” (An Salomon Fos 8:27-​30; Keneses 1:26) Jiowa a pwal etiwa noun kewe chonlang le apasawu ar ekiek ussun ewe kokkot epwe efisi maloon ewe king mi ngau itan Ahap.​—1 King 22:19-​23.

4, 5. Ifa ussun Jiowa a asamolu noun kewe chon fonufan?

⁴ Jiowa ewe Epinikepiisom won unusen lang me fonufan. (Tuteronomi 3:24) Ese osupwangen an aramas alillis. Iwe, nge a ussun ita a atekisonatiu pwisin i ren an epwe nengeni ekkewe aramas. Emon sou mak kol a kolwu: “Io mi usun chok ewe Samol, ach Kot, ewe mi mottiu won ewe leeni mi tekia, ewe mi nennetiu won ekkewe lang o pwal fonufan? A apwatai ekkewe aramas mi woungau seni lon pwul moromor.”​—Kol Fel 113:5-8.

⁵ Mwen an ataielo Sotom me Komora, Jiowa a auselinga an Eperiam kewe kapas eis me a alukuluku letipen Eperiam pwe met epwe fis eu foffor mi pwung. (Keneses 18:23-​33) Inaamwo ika Jiowa a fen silei me mwan mwiriloon an Eperiam kewe tingor, a mosonottam le auseling me a etiwa an Eperiam poraus.

6. Met a fis pokiten Jiowa a asamolu Apakuk lupwen a eani kapas eis?

⁶ Jiowa a pwal auselinga an Apakuk kapas eis: “Ai Samol mi Lapalap, ifa ukukun fansoun ai upwe sio ngonuk pwe kopwe awora om alilis, nge kopwap auselinga?” An Jiowa ekiek pwe Apakuk a u ngeni an nemenem ren an kapas eis? Aapw. Jiowa a luku pwe mi murinno an Apakuk kewe kapas eis me a pwaraalo ngeni Apakuk an we kokkot ren an epwe nounou ekkewe Chon Kaltia ar repwe apwonueta an kapwung. Jiowa a alukuluku ewe soufos pwe ‘ei kapwung epwe fokkun pwonueta.’ (Apakuk 1:1, 2, 5, 6, 13, 14; 2:2, 3) Ren an wesewesen auselinga minne Apakuk a loliileniasini, Jiowa a asamolu ewe soufos. Ina popun ewe soufos mi letipengau a tongeni pochokkul me pwapwa sefal, ren an unusen lukuluk won Jiowa ewe Koten an amanau. Ei poraus a mak lon ewe puken Apakuk a chuen apochokkula ach lukuluk won Jiowa ikenai.​—Apakuk 3:18, 19.

7. Met popun wiisen Piter lon ewe ranin Pentekos 33 C.E. a lamot ngenikich?

⁷ Jises Kraist pwal i ewe emon leenien appiru mi murinno ren an pwarata sufol ngeni aramas. Jises a ereni noun kewe chon kaeo pwe “are emon epwe amam ngang mwen mesen aramas, iwe, ngang upwe pwal amam i mwen mesen Semei mi nom lon lang.” (Mattu 10:32, 33) Iwe nge, lon ewe pwinin a fangema noun kewe chon kaeo meinisin ra su seni, me ewe aposel Piter a amam Jises fan ulungat. (Mattu 26:34, 35, 69-​75) Jises ese chok atola met Piter a fori nge a nengeni alollolun letipen Piter me a kuna pwe Piter a wesewesen aier. (Luk 22:61, 62) Lime me eu chok ran mwirin, Kraist a asamolu Piter ren an awiisa ngeni wiisen sou fos fan iten noun Jises kewe 120 chon kaeo lon ewe ranin Pentekos me a mut ngeni Piter nounoun ewe aewin “ekkewe kien ewe muun lang.” (Mattu 16:19; Fofor 2:14-​40) Piter a angeisefalli ewe tufich le ‘liwinsefal me apochokkulata pwiir kewe.’​—Luk 22:31-​33.

Asamolu Chon Om Famili

8, 9. Ren an epwe asamolu puluwan we, ifa ussun emon mwan pupulu epwe tongeni appiru Jiowa me Jises?

⁸ Mwan pupulu me sam me in repwe feioch ika ra appiru Jiowa me Jises Kraist lupwen ra anganga ewe nemenem Kot a awiisa ngeniir. Piter a peseer: “Ami mwan kena, oupwe nonnom ren puluemi ren ach tipatchemen Soulang; oupwe asamolu ir, pun fefin mi apwangapwang senikemi.” (1 Piter 3:7) Anchangei mwo pwe ka kamwoch le poum eu kap kilas mi ling. Ese pochokkul ussun eu kap mi for seni ira. Kesap fen kon tumunuochu? Emon mwan pupulu mi tongeni fori ussun we chok ren an appiru Jiowa. Epwe auselingaochu ekiekin puluwan we lupwen ra pwungupwungfengen ussun mettoch mi lamot ngeni ewe famili. Chechchemeni Jiowa a awora fansoun le auselinga me awewe ngeni Eperiam. Pokiten ese unusoch, neman emon mwan pupulu esap kuna ekkewe poraus meinisin mi lamot ren ewe mettoch ra pwungupwung won. Ina popun epwe tipatchemen ewe mwan ika epwe asamolu puluwan we ren an ekiekifichi mefian kewe.

⁹ Lon ekkewe fonu ikkewe ie nemenemen ewe mwan a fokkun pochokkul, ewe mwan pupulu epwe chechchemeni pwe neman epwe weires ngeni ewe fefin le apasawu minne a nom lon letipan. Appiru Jises lupwen a nonnom won fonufan, ren lapalapen an nemeni noun kewe chon kaeo, chokkewe repwe kinikinin ewe mwichen aramas a ussun chok noun Jises we fin apupulu. A tongeer me mwen repwe apasa ar osupwang Jises a fen ekieki ukuukun ar pochokkul me apwangapwang lon pekin ngun me lon pekin aion. (Mark 6:31; Jon 16:12, 13; Efisus 5:28-​30) Pwal och, atola met puluwom we a foffori fan iten en me noumi kewe, me pwaraalo om kilisou ren kapas me foffor. Jiowa me Jises ra afanni, apunga, me efeiochu chokkewe mi fich ngeni. (1 King 3:10-​14; Hiop 42:12-​15; Mark 12:41-​44; Jon 12:3-8) Mwirin puluwan we a wiliiti Chon Pwarata Jiowa, emon Fin Kraist lon Esia a apasa: “Me loom, puluwei we epwe fetal akkom mwei me ese alisiei le uwei pisekim kewe meinisin. Nge iei, puluwei we a alisiei le eki ekkewe pisek me a pwarata an aucheani minne ua fori lon ewe imw!” Eu kapasen kilisou seni ewe letip epwe fokkun alisata an ewe fefin meefi auchean.​—An Salomon Fos 31:28.

10, 11. Sam me in repwe kaeo met seni an Jiowa emiriiti Muun Israel mi u ngeni I?

¹⁰ Lon emiritiin nour kewe, akkaeuin ika mi lamot ar repwe kuna kapwung, mi lamot sam me in repwe appiru an Kot leenien appiru. “Nge ewe Samol mi Lapalap a tinala noun kewe soukuno me soufos ren ekewe chon Israel me chon Juta” pwe repwe likitalo ar kewe foffor mi ngau nge rese “aleasochis pwe ra tipeforea.” (2 King 17:13-​15) Chon Israel ra pwal mwo nge sotun “otupu i ren auer; ra kapas chofona ngeni i ren chon-mongor.” Neman chommong sam me in ra luku pwe nour kewe ra ussun we chok. Chon Israel ra “sotuni i” me ra akinasa letipan Jiowa. Iwe nge, Jiowa “mi kirokiroch, a fen omusalo ar kewe fofor ingau o esemo atailo ir.”​—Kol Fel 78:36-​41.

¹¹ Jiowa a tingorei Israel: “Ou etto, ousipwe pwungupwungfengen. Oua limengau ren tipis usun eman a limengau ren cha. Nge ngang upwe limetikemi pwe oupwe limoch usun pwechepwechen sno.” (Aisea 1:18) Inaamwo ika Jiowa esap ewe emon a mwaallilo nge, a chuen etiwa ena muu mi lukumach ar repwe feito me awenechara mettoch lefiler. A ifa me murinnoon ena ekiek. Sam me in repwe appiru Jiowa lupwen ra sotun alisi nour kewe! Lupwen a fich ngeni, asamoluur ren an auselinga ar poraus, me awewe ngenir ewe popun a lamot ar repwe wiisen siwil.

12. (a) Met popun sisap asamolu nouch kewe lap seni sia asamolu Jiowa? (b) Met sipwe chechchemeni ika sipwe asamolu nouch kewe lupwen sia emiritiir?

¹² Pwungun pwe, fan ekkoch, ekkewe nau ra osupwangen fon mi pochokkul. Sam me in resap appiru an Eli ‘asamolu noun kewe mwan lap seni Jiowa.’ (1 Samuel 2:29) Nge, a fakkun lamot pwe ekkewe nau repwe kuna ewe tong a fen amwokutu semer me iner le apwunguur. Repwe chechchemeni pwe iner me semer ra tongeer. Paul a pesei ekkewe sam: “Ousap asonga noumi, pwe oupwe foleniochu ir ren sokkun amirit me fonou me ren ewe Samol.” (Efisus 6:4) Mei wor och nemenem ren sam me in, nge ewe sam epwe chuen chechchemeni wiisan le asamolu noun kewe ren an esap asongeer pokiten an kapwung mi kon ssenuk. Pwungun pwe an sam me in asamolu nour kewe epwe wewe ngeni watte fansoun me achocho, nge ewe uwa repwe kini mwirin a mmen apwapwa seni meinisin.

13. Ifa ewe poraus lon ewe Paipel ussun ekkewe chinnap lon eu famili?

¹³ Asamoluun chon om famili ese chok wewe ngeni an ewe mwan asamolu puluwan me noun kewe. Iei eu mwiitun seni Japan. “Lupwen ka chinnap, kopwe alleasochisi noum kewe.” Weween ei mwiitun pwe emon chinnap epwe aukuku an nemeni noun kewe watte me auselinga met ra apasa. Me ren ewe Paipel, sam me in repwe asamolu nour kewe ren ar repwe auselingeer, me ekkewe nau resap sufolungaua ekkewe chinnap lon ewe famili. Alon ewe puken An Salomon Fos 23:22 “Kosap aucheangaua inelapom, lupwen a chinlap.” King Solomon a apwonueta alon ei mwiitun me a asamolu inan lupwen a feito tingor. Solomon a uwato eu leenien mot fan iten Patsipa lepelifichin pwisin an we leenien motun king, me mwirin a auselinga an inan we tingor.​—1 King 2:19, 20.

14. Ifa ussun sipwe tongeni asamolu ekkewe chinnap lon ewe mwichefel?

¹⁴ Lon ach we eterenges lon pekin ngun, sia tufich le achocho ngeni ach sipwe asamolu ekkewe chinnap lon ewe mwichefel. (Rom 12:10) Neman rese chuen tufichin fori watte angang ussun me loom, me ra mangngau. (An Salomon Afalafal 12:1-7) Emon Chon Kraist mi kepit mi chinnap a awewei watten an mangngau lupwen a kokkol won pet lon eu pioing: “Ua chok mochen malo pwe upwe tongeni feilo angang sefal.” Ach fos ngenir me ach asamoluur mi tongeni alisi ekkeei chinnap. Iei ewe alluk fan iten Chon Israel: “Kopwe uta me mwen eman mi pwech mokuran o asamolu ekewe chinlap.” (Lifitikos 19:32) Asamoluur ren om alisiir le meefi lamoteer me aucheaar. Om ‘uta’ mi tongeni kapachelong om momot rer me om auselinga porausen ar angang me loom. Ei sokkun foffor a asamolu ekkewe chinnap me epwe feioch manauom lon pekin ngun.

‘Oupwe Achocho le Asamolufengennikemi’

15. Ifa ussun ekkewe elter mi tongeni asamolu chon ewe mwichefel?

¹⁵ Aramas lon eu mwichefel repwe maaroch lon pekin ngun lupwen ekkewe elter ra isetiu eu leenien appiru mi murinno. (1 Piter 5:2, 3) Inaamwo ika ra osukosuk, ekkewe elter mi eani tong repwe feilo fos ngeni ekkewe sarafo, mokuren famili, in esor puluwer, fefin mi tumunu imwer, me chinnap, ika mei wor ar osukosuk are esor. Ekkewe elter repwe auselinga meefian chon ewe mwichefel me repwe mwareiti ar angang me tufich. Emon elter mi kukkutta mettoch mi murinno aramas ra fori me fos ngeniir ussun, a appiru Jiowa, emon Kot a wesewesen aucheani noun kewe aramas won fonufan.

16. Met popun sipwe ekieki pwe ekkewe elter me chon mwichefel ra fich ngeni ach asamoluur?

¹⁶ Lupwen ra appiru Jiowa, ekkewe elter repwe isetiu eu pisekin nengeni ren apwonuetaan an Paul we fon: “Oupwe tongfengen lefilemi usun chok pwipwi eu; oupwe achocho le asamolufengenni-kemi.” (Rom 12:10) Neman epwe weires ar fori ena ika ra nonnom lon ekkewe fonu a wor tettelin aramas ie. Ren chok awewe, lon eu fonuen Esia mei wor ruu kapas fan iten “brother,” eu fan iten nouwis me ewe eu fan iten aramas ese lifilifil. Me loom, chon ewe mwichefel ra nounou ewe kapas brother fan iten nouwis lupwen repwe fos ngeni emon elter are ngeni emon mi ekis chinnap me ewe eu fan iten ekkewe lusun lon ewe mwichefel. Nge iei ra nounou ewe kapas “brother” mi weneiti ekkewe lusun aramas, fan iten aramas meinisin, ussun chok Jises a fen ereni noun kewe, “ami meinisin pwipwi eu chok.” (Mattu 23:8) Inaamwo ika ei sokkun alefila aramas ese kon lien pwalo lon ekkoch fonu nge, mi lamot ach sipwe tumunu seni pun aramas ra kan pae ngeni ena esin ekiek.​—Jemes 2:4.

17. (a) Met popun ekkewe elter repwe eani ewe sokkun lapalap mi amecheresi ach chuuriir? (b) Ifa ussun ekkewe elter repwe appiru Jiowa lon ar kewe foffor ngeni chon ewe mwichefel?

¹⁷ Enlet pwe Paul a peseekich le ‘sufoliiti ekkewe elter ukuukun ewe sufol fan ruu,’ nge ir mi chuen pwiich kewe. (1 Timoti 5:17) Ika sipwe chok “pworacho le arap ngeni an we leenien motun chen” an ewe Epinikepiisom, ita sipwe fen tongeni fos ngeni ekkewe elter mi appiru Jiowa. (Ipru 4:16; Efisus 5:1) Ekkewe elter mi tongeni silei ukuukun mecheresin an aramas mochen le fos ngeniir ren ar ekieki ika fan fitu aramas ra kutta fon seniir are uwau meefier ussun met epwe aochu ewe mwichefel. Kaeo seni an Jiowa apachalong ekkewe ekkoch lon an kewe angang. A asamolu aramas ren an awiisa ngeniir wiiser kewe. Inaamwo ika met pwiich we a mochen fori esap kon lien sopwoch, ekkewe elter repwe kilisou pwe ewe emon a mochen alisaata pochokkulen ewe mwichefel. Chechchemeni mwo ifa ussun Jiowa a auselinga an Eperiam kewe kapas eis me an Apakuk sio.

18. Ifa ussun ekkewe elter repwe appiru Jiowa lupwen repwe alisi ekkewe mi osupwangen alillis?

¹⁸ Ekkoch Chon Kraist ra osupwangen fon. (Kalesia 6:1) Nge ra chuen auchea ngeni Jiowa, mi fich ngeni ach sipwe asamoluur. “Lupwen ena emon a awora fon mi pwarata an sufoliitiei, a mecheres ai upwe fos ngeni,” emon Chon Pwarata a apasa. Lape ngeni aramas repwe achocho le apwonueta ewe fon ika lapalapen ewe fos a pwarata sufol. Neman epwe watte ewe fansoun sipwe awora, nge ach awora ena fansoun le auselingaochu porausen ewe mi mwaallilo epwe amecheresi an ewe emon etiwa ewe fon. Chechchemeni mwo fan fitu Jiowa a kapas eis me auselinga Chon Israel pokiten a tongeer. (2 Kronika 36:15; Taitos 3:2) Fon mi kawor seni emon a tongei me meefieni meefien ewe chon auseling epwe achungu letipen chokkewe ra osupwangen alillis.​—An Salomon Fos 17:17; Filipai 2:2, 3; 1 Piter 3:8.

19. Ifa ussun ach ekiek ussun chokkewe rese eani ach luku?

¹⁹ Ach asamolu aramas epwe kapachelong chokkewe mi tongeni wiliiti pwiich kkewe lon mwach kkan. Neman ekkoch ra mmang le etiwa ach we poraus iei. Sipwe mosonottam rer me asamoluur pokiten ir aramas. Jiowa “ese mochen pwe emon epwe poutmwalilo, pwe aramas meinisin repwe tori aier.” (2 Piter 3:9) Sisap pwal eani an Kot ekiek? Sipwe tongeni amecheresi ach afalafaleer ika sipwe ekis chiechi ngeniir. Iwe nge, sipwe tumunu pwe ena esin chiechi esap efeiengauakich lon pekin ngun. (1 Korint 15:33) Nge, sipwe “kirokiroch,” me sisap oputa chokkewe rese eani ach luku.​—Fofor 27:3.

20. An Jiowa me Jises Kraist leenien appiru epwe amwokutukich le fori met?

²⁰ Ewer, Jiowa me Jises Kraist ra asamolu kich meinisin. Amwo sipwe chechchemeni ar kewe foffor me achocho ngeni ach asamolufengennikich. Amwo sipwe pwal chechchemeni kapasen ach we Samol Jises Kraist: “Ami meinisin pwipwi eu chok.”​—Mattu 23:8.

Ifa Ussun Kopwe Polueni?

• Epwe ifa ussun om ekiek ussun chienom kewe chon luku?

• Ifa ussun an Jiowa me Jises leenien appiru epwe amwokutuk le asamolu aramas?

• Ifa ussun mwan pupulu me sam me in repwe asamolu aramas?

• Lupwen ekkewe elter ra chechchemeni pwe chiener Chon Kraist ir pwiir epwe alisata ar eani met sokkun foffor?