Sufol Ngeni Nemenem Met Popun A Lamot?

IO leich esap kilisou ren an ekkewe polis liapeni chon atai alluk lupwen ra solani pisekich are amosoku chon imwach? Me sise pwal kilisou ren manamanen ekkewe sou kapwung le apwungu ekkewe chon atai alluk ren ar repwe tumunu leeniach kewe?

Pwal chechchemeni mwo ekkewe minen alillis mi kawor pokiten monien takises, ussun chok forun aal mi ta, sewer, me sukul. Chon Kraist mi enlet repwe akkom le apasa pwe sufol ngeni nemenem a lamot. Nge ifa watteen ei sufol? Me sufol ngeni nemenem a mmen lamot lon menni kinikinin manauach?

Nemenem Won Sopw

Me ren ewe Paipel, aramas meinisin, ika ra luku are rese luku, repwe sufoliiti ewe nemenem mi angang ngeni okkochuloon ewe sopw are fonu. Ewe aposel Paul a mak ngeni chienan kewe chon luku lon Rom ussun ei mettoch, me epwe alisikich ika sipwe ekieki ussun met a fen apasa lon Rom 13:1-7.

Paul i wiliposun Rom, me Rom ewe nemenem mi pochokkul seni meinisin won fonufan lon ena fansoun. Paul a makkei noun we taropwe orun 56 C.E., me a fonou Chon Kraist ngeni ar repwe wiliiti chon wilipos mi murinno. A makkei: “Aramas meinisin repwe alleasochisi ewe mu mi nemeni ir. Pun esor an mu nemenem are esap seni Kot, nge ekkewe mu mi wor ra chok popu seni Kot.”

Paul a awewei pwe esap wor an aramas nemenem ika Kot ese mutata. A ina ussun a wor wiisen ekkewe muu lon fisitaan letipen Kot. Ina ewe popun “ir mi lukumach ngeni ewe mu ra lukumach ngeni minne mi popu seni Kot.”

Sou nemenem repwe mwareiti wiliposun fonuer mi fofforoch nge ra pwuungun apwungu chon fofforingau. Mei wor popun chokkewe mi fofforingau repwe niueiti an ekkewe sou nemenem “forata an [Kot] we liwinin ingau,” pun ekkewe muu ra wiisen fori ina ussun ir noun Kot “chon angang.”

Paul a amuchalo an ekiek ren ekkeei kapas: “Iei minne, sipwe alleasochisi, sap pokiten chok an Kot we liwinin ingau, nge pokiten miritin letipach. Iei minne, oupwe pwal isetiu ami takises pun ekkewe chon nemenem ir mi noun Kot chon angang, o ra achocho le fori ei sokkun angang.”

Wiisen nounoun ewe monien takises a nom ren ekkewe sou nemenem nge esap ren ewe chon mooni takises. Pokiten i emon chon wilipos mi wenechar, emon Chon Kraist a tumunuochu mwenien letipan. A silei pwe an anomu pwisin i fan nemenemen ekkewe sou nemenem me an mooni takises esap chok alisata sopwun me fonuan we nge a pwal wewe ngeni an manaueni manauan me ren ekkewe alluk seni Kot.

Nemenem Me Ewe Famili

Ifa ussun nemenem lon ewe famili? Le poputaan manauan, emon monukol epwe eriani aramas le fori alon pwisin letipan ren an kechiu are puchor. Nge sam me in mi tipatchem repwe miritiiti minne a wesewesen lamot ngeni ewe monukol nge resap mut ngeni fisitaan letiper pokiten ar fares chok. Atun ar mammaarita, a mumu ngeni ekkoch semirit repwe pwisin filata pwung me mwaal. Pokiten esaamwo watte kunaen manauer, repwe tongeni atai alluk are fori pwal och sokkun foffor mwaal me ar kewe foffor ra ataielo kinamween ar famili me sopwur are fonuer. Iei och poraus ekkewe sou nemenem ra fokkun silei.

“Sam me in ra kon mmang le poputa ar emiriiti nour kewe.” Ina alon Rosalind Miles, ewe fefin a makkei ewe puk Children We Deserve. “Fansoun ar uputiu ina ewe fansoun oupwe poputa le emiriitiir.” Ika, seni le poputaan, ekkewe sam me in repwe pwaralo ren ngingin ar fos me foffor eu nemenem mi kirokiroch me tong, me rese wiliwilikis lon ar kewe foffor, nour kewe repwe muttir etiwa ena nemenem me ewe emirit mi tong a pop seni.

A mmen watte ewe poraus lon Paipel ussun nemenem lon famili. Lon ewe puken An Salomon Fos, ewe mwan mi tipatchem, Solomon, a awewe won ewe tipeeu epwe nom ren ekkewe sam me in mi niueiti Kot: “Nei kopwe auselinga an semom kewe kapasen ourour, nge kosap aleasolap ngeni mine inom a aiti ngonuk.” (An Salomon Fos 1:8) Lupwen ekkewe sam me in ra tipeeu, ekkewe nau ra weweiti wiiser. Neman repwe sotun efisi anini lefilen iner me semer ren ar kutta ifa ussun epwe fisita pwisin letiper, nge an sam me in tipeeu lon lapalapen ar nemeni ir epwe tumunu ekkewe nau.

Ewe Paipel a awewei pwe ewe mwan a wiisen tumunu an noun kewe me puluwan we pochokkul lon pekin ngun. Ina popun a mak pwe i mokuren ewe famili. Ifa ussun ewe mwan epwe apwonueta wiisan we? Paul a achema ngenikich pwe ussun chok Kraist Mokuren ewe mwichefel, iwe, ewe mwan mokuren puluwan we. Paul a pwal apasa: “Ami mwan kena, oupwe tongei puluemi, usun chok Kraist a pwal tongei ewe mwichefel, o a pwisin fangelo manauan fan asengesin i.” (Efisus 5:25) Lupwen emon mwan a appiru ifa ussun Jises a eani wiisan ren tong, epwe fich ngeni an puluwan we “meniniiti i.” (Efisus 5:33) Ekkewe nau repwe kuna aucheaan ei kkotun nemenem seni Kot me epwe amecheresi ar etiwa ena nemenem.​—Efisus 6:1-3.

Ifa ussun, ekkewe famili mei wor chok sam are in, kapachelong ekkewe famili ia emon me leir a fen malo, repwe tongeni sopwoch? Sam are in mi tongeni kuna alillis seni nemenemen Jiowa Kot me Jises Kraist. An Jises kewe kapas ra alongolong won nemenemen Seman we me ewe Paipel mi pop seni ngunun Kot.​—Mattu 4:1-​10; 7:29; Jon 5:19, 30; 8:28.

Ewe Paipel a awora chommong kapasen emmwen mi weneiti ekkewe osukosuk semirit repwe kuna. Lupwen a kuna ekkena kapasen emmwen me angang me rer, emon sam are in epwe awora ngeni noun kewe ewe fon mi tong mi alillisoch. (Kenesis 6:22; An Salomon Fos 13:20; Mattu 6:33; 1 Korint 15:33; Filipai 4:8, 9) Sam me in mi pwal tongeni aloni alon ekkewe poraus mi alongolong won ewe Paipel mi mak fan iten kaworen alillis ren ar repwe alisata an nour kewe aucheani ekkewe feioch repwe kuna seni ar sufoliiti nemenemen ewe Paipel.a

Nemenem Me Ewe Mwichefelin Kraist

“Iei nei at mi achengicheng rei, ua unusen pwapwa ren. Oupwe auselinga i.” (Mattu 17:5) Ekkeei kapas, seni auen Jiowa Kot, ra anneta pwe Jises a fos ren nemenemen lang. Met Jises a fen apasa a makketiu lon ekkewe ruaanu puken kapas allim me a mecheres ach alleaniir.

Mwen chok an feita lang, Jises a ereni noun kewe chon kaeo: “Nemenem meinisin lon lang o pwal won fonufan a fen ngeniei.” (Mattu 28:18) Jises Mokuren an we mwichefel. A atolafichi noun kewe mi kepit won fonufan. Seni fansoun ewe ngun mi fel a fen niinatiu atun Pentakos 33 C.E., Jises a pwal nounou noun kewe mi kepit ussun chok eu paip ewe enlet mi tongeni pupu lon. Ir ewe “chon angang mi tuppwel o tipatchem.” (Mattu 24:45-​47; Fofor 2:1-​36) Met a fen fori ren an epwe apwonueta ei angang mi apochokkula ewe mwichefelin Chon Kraist? “Lupwen a feita won . . . a liffangelo mwan ngeniir.” (Efisus 4:8, New World Translation) Ekkeei “liffang” ekkewe Chon Kraist elter, mi seikita me ren ngun mi fel me ra angei nemenem ren ar repwe tumunu chiener chon luku lon pekin ngun.​—Fofor 20:28.

Ina ewe popun Paul a awora ei fon: “Oupwe chechemeni ekkewe chon emmwenikemi, ir mi fen apasa ngenikemi ewe kapasen Kot. Oupwe ekieki usun uwan manauer, o oupwe appiru ar luku.” Pokiten ir aramas mi tapwelo lon ipwen Jises kewe, sipwe tipatchem ika sipwe appiru ar luku. Paul a pwal apasa: “Oupwe alleasochisi ekkewe chon emmwenikemi, o nonnom fan nemenier, [“fansoun meinisin etiwa ar nemenem womi,” The Amplified Bible] pun ra mamasa ngunumi usun chok ir ekkewe repwe pwarata usun ar angang. Iwe, repwe fori ar angang ren pwapwa, sap ren letipechou, pun are ra letipechou ren ar angang, ami ousap feioch ren.”​—Ipru 13:7, 17.

Met a fis lupwen aramas ra tunalo ena emmwen? A ina met ekkoch aramas lon ewe mwichefel loom ra fori me ra wiliiti chon rikilo. Ruuemon mi ataielo lukuen ekkoch me “aingaualo minne mi pin” ren ar kapas mi poon iter Aiminios me Filitus. Eu me lein ar kewe poraus pwe a fen fisita ewe manausefal me a wewe ngeni eu manausefal lon pekin ngun are eu chok lios, me esap wor eu manausefal lon mwach kkan fan nemenemen an Kot we Muu.​—2 Timoti 2:16-​18.

Ewe nemenem mi seikita a awora alillis. Ekkewe elter Chon Kraist ra tongeni affata mwaallin ekkewe afalafal pokiten ir chon tupuni Jises Kraist mi nounou nemenemen ewe Paipel. (2 Timoti 3:16, 17) A ussun we chok lon ewe mwichefel ikenai, me ewe mwichefel a ussun chok “uralapen o pwal longolongun ewe enlet.” (1 Timoti 3:15) Afalafal mi chofona esap ataielo “ekkewe sokkun kapas mi murinno,” ra nonnom lon ewe Paipel.​—2 Timoti 1:13, 14.

Atun sufol ngeni nemenem a mommorolo lon ei fonufan, pokiten kich Chon Kraist, sia silei pwe nemenem won sopw are fonu, lon ewe famili, me lon ewe mwichefelin Kraist, a fen kawor ren an epwe efeiochukich. Sufol ngeni nemenem a lamot fan iten ach pochokkul lon pekin aion, memmeef, me ngun. Ren ach etiwa me sufoliiti ena esin nemenem seni Kot, sipwe kuna tumun seni ekkewe sou nemenem mi lap seni meinisin​—Jiowa Kot me Jises Kraist.​—Kol Fel 119:165; Ipru 12:9.

[Pworous fan]

[Blurb on page 5]

Chommong poraus ussun nemenem lon ewe famili a mak lon ewe Paipel

[Sasing lon pekin taropwe 6]

Emon sam are emon in mi tongeni achema ngeni nour kewe ussun nemenemen Jiowa Kot me Jises Kraist

[Ekkewe sasing lon pekin taropwe 7]

Chon Kraist mi silei pwe nemenem mi pwung lon ewe famili, lon ewe mwichefelin Chon Kraist me won sopw me fonu a fen kawor pwe epwe alisiir

[Picture Credit Line on page 4]

Sasing a for ren Josh Mathes, An ewe Supreme Court of the United States