Akkappiru Ewe Sense Mi Lapalap

“Oupwe feilo asoulangalo chon fonu meinisin . . . , oupwe afalafaler pwe repwe alleasochisi mettoch meinisin minne ua alluku ngenikemi.”​—MATTU 28:19, 20.

1, 2. (a) Ifa ussun kich meinisin sia ussun sense? (b) Ren porausen ewe angangen asukula aramas, ifa ewe wiis mi sokkolo aucheaan chon Kraist mi enlet ra wiiseni?

EN emon sense? Eli kich meinisin sia ussun sense. Ika sipwe aiti ngeni emon mi rukulo menni al epwe che won, are aiti ngeni emon chienach chon angang ifa ussun epwe fori och mettoch, are awewei ngeni emon kukkun ifa ussun an epwe ri selin ipwan suus, kich mi ussun sense. Ach alisi aramas lon ekkena mettoch a kan atoto pwapwa, ika met?

² Nge ren porausen ewe angangen asukula aramas, a nom ren chon Kraist mi enlet eu wiis mi sokkolo aucheaan. Wiisach ach sipwe “asoulangalo aramas . . . , [me] afalafaler.” (Mattu 28:19, 20) Lon pwal ewe mwichefel, epwe wor fansoun ach sipwe asukula aramas. Ekkan mwan mi wor tufichir ra kan seikita pwe repwe wiisen “chon mas me sense,” fan iten ar repwe aufichieta ewe mwichefel. (Efisus 4:​11-​13) Lon ar kewe foffor iteiten ran, fofforun chon Kraist, ekkewe fefin mi asimau repwe “afalafala ekkena mettoch mi murinno” ngeni ekkewe fopwul. (Taitos 2:​3-5) Ewe Paipel a peseikich meinisin pwe sipwe apochokkula chienach kewe chon luku, me sipwe tongeni apwonueta ena fon ren ach nounou ewe Paipel le aufichieta aramas. (1 Tesalonika 5:​11) A ifa me watteen ena wiis mi auchea, wiisen ach sipwe chon asukul fan iten ewe Kapasen Kot me awewei ekkewe poraus mi auchea lon pekin ngun, ekkewe mi tongeni atoto feioch ngeni aramas ren fansoun langattam!

³ Iwe nge, ifa ussun sipwe tongeni angochukich lon wiisach we, wiisen sense? Akkaewin, sipwe akkappiru ewe Sense mi Lapalap, Jises. Eli ekkoch repwe ekieki, ‘Nge ifa ussun sipwe tongeni akkappiru Jises? Atewe a unusoch.’ Pwungun pwe esap pwak ach sipwe sense mi unusoch. Nge ese lifilifil met sokkun tufich mi nom rech, sipwe tongeni achocho ngeni ach sipwe akkappiru lapalapen an Jises asukula aramas. Sipwe kaeo ifa ussun sipwe tongeni aea ruanu me lein an kewe minen asukula aramas​—aean kapas mi mecheres an aramas repwe weweitiir, kapas eis mi kku ewe letip, ewe sokkun tettel mi pwung, tettelin ekiek, me kapas awewe mi fichiiti eu me eu poraus.

Aean Kapas mi Mecheres ngeni Aramas Ar repwe Weweitiir

⁴ Sap minne mi alollol ekkewe populapen poraus mi enlet lon an Kot we Kapas. Iei alon Jises lon an we iotek: “Ua mwareituk, Semei, . . . pwe ka amonalo ekkeei mettoch seni chon tipatchem me chon wewe, nge ka pwarirelo ngeni monukol.” (Mattu 11:25) Jiowa a kan pwari an kewe kokkot ngeni chokewe mi eani letip mi wenechar me tekison. (1 Korint 1:​26-​28) Ina minne, kapas mi mecheres eu lapalap mi sokkolo lamotan ekkewe poraus mi enlet lon Paipel ra pwalo lon.

⁵ Ika kopwe kaeo ngeni emon ussun Paipel lon imwan are liwiniti chon mochen auseling, ifa ussun kopwe tongeni asukuler ren om aea kapas mi mecheres? Iwe, met sia kaeo seni ewe Sense mi Lapalap? Ren an epwe ffatoch an kewe poraus ngeni chon auseling ngeni, nge chommong leir “rese kaeo lon sukul, o ir mi aramas kisikis,” Jises a aea kapas mi mecheres repwe muttir weweitiir. (Fofor 4:​13) Iwe, ren ach sipwe asukula aramas ren ach aea ewe esin poraus mi mecheres ngeniir ar repwe weweiti, akkom sipwe tumunu ewe sokkun kapas sipwe aea. Esor lamoten ach sipwe aea kapas alollol ren ach sipwe etipetipa aramas pwe repwe luku ekkewe poraus mi enlet lon ewe Kapasen Kot. Ena esin “kapasen lamalam tekia” epwe tongeni aosukosuka aramas, akkaewin, chokewe rese lien fiti sukul are mi kauk tufichir. (1 Korint 2:​1, 2) Fofforun Jises a pwarata pwe ach filiochu ewe esin kapas mi mecheres ngeni aramas ar repwe weweiti epwe tongeni wenewenen affataochu ngeniir poraus mi enlet.

⁶ Ren ach sipwe tufichin asukula aramas ren ach aea kapas mi mecheres, sipwe pwal tumunu pwe site kon achuukata won emon chon kaeo Paipel chommong sokkun poraus. Jises a afanni kaukun tufichin noun kewe chon kaeo. (Jon 16:12) Kich sipwe pwal afanni kaukun tufichin nouch kewe chon kaeo. Ren chok awewe, ika sipwe kaeo ngeni emon lon ewe puk Sile mi Emmwen ngeni Manau Esemuch, esor popun ach sipwe tichchiki sokkun poraus meinisin.a Ese pwal wor popun ach sipwe apachiki ach kaeo och poraus pwe epwe ussun ita nge a lamot ach sipwe awesi eu pinukun poraus lon chok fitu minich. Nge sipwe mirit ika sipwe mut ngeni osupwangen me tufichin ewe chon kaeo an epwe auku muttirin ewe kaeo. Iei ewe mettoch sia ekiekin apwonueta, ach alisi ewe chon kaeo pwe epwe emon chon appiru Kraist me emon chon fel ngeni Jiowa. A lamot ach sipwe anafa ewe fansoun pwe sipwe alisi ewe chon kaeo an epwe wesewesen weweiti minne a kakkaeo. Epwe ina ussun ekkewe poraus mi enlet repwe kku letipan me amwokutu i pwe epwe apwonueta wiisan.​—Rom 12:2.

⁷ Lupwen sipwe eani och afalafal lon ach mwichefel, nge akkaewin, ika a wor ekkoch minefo mi auseling, ifa ussun sipwe tongeni aea ewe sokkun kapas “mi mecheres an aramas weweiti”? (1 Korint 14:9, NW) Ekieki mwo ekkeei ulungat mettoch mi tongeni awora alillis. Aewin, sipwe awewei ewe sokkun kapas aramas rese lien rongorong. Mi sokkolo ekkan kapas sia kan aea pokiten ach weweiti ewe Kapasen Kot. Ika sipwe kapas ussun “ewe chon angang mi tuppwol me tipatchem,” “ekkewe pwal fitemon siip,” me “Papilon mi Lapalap,” eli epwe lamot ach sipwe aea kapas mi mecheres ren ach sipwe affata weween ekkena poraus. Oruuan, esap kon chommong ach kapas. Ika a kon chommong me ttam ach kapas, eli chon fiti mwich resap chuen auseling. Epwe ffatoch ach afalafal ika sipwe uwawu ekkewe kapas rese lien lamot. Aulungatin, esap kon chommong ekkewe poraus sipwe awewei. Eli sipwe kuna chommong poraus mi amwarar lupwen sipwe ammonlata ach afalafal. Nge epwe murinno ach sipwe akkota masouen ach afalafal lon ekkoch chok refiref, iwe, sipwe aea ekkewe chok poraus mi aufichieta eu me eu kinikin me ekkewe poraus sipwe tongeni affata lon ewe fansoun mi kauk ngenikich.

Angoch le Aea Kapas Eis

⁸ Chechchemeni mwo pwe Jises a mmen angoch le aea kapas eis pwe epwe amwokutu noun kewe chon kaeo ar repwe pwarata ar ekiek, me pwal fan iten an epwe achungu me emiriti ekiekir. Ren an kewe kapas eis, an Jises kewe afalafal ra tolong lon me kku letiper. (Mattu 16:13, 15; Jon 11:26) Ifa ussun sipwe tongeni angochulo le aea kapas eis, ussun chok Jises?

⁹ Lupwen sipwe afalafal imw me imw, sipwe tongeni aea kapas eis le luki letipen aramas, iwe, epwe tongeni suuk ewe al fan iten ach sipwe kapas ussun an Kot we Muu. Ifa ussun sipwe tongeni filata eu kapas eis mi weneiti minne a lamot ngeni emon sipwe chuuri lon imwan? Sipwe pi ika mei fet ewe imw. Lupwen sipwe fetal ngeni eu imw, sipwe nengeni met a nom lukun. A wor omocha? Ina eu mettoch mi affata pwe a wor semirit lon ewe imw. Ika ina, eli sipwe tongeni eis, ‘Ka fen ekieki ika epwe fet lapalapen fonufan lupwen noum kewe repwe watteta?’ (Kol Fel 37:10, 11) A wor chommong lok won ewe asam, are ekkan minen eppetin chon sola? Eli sipwe tongeni eisini: ‘Ka ekieki pwe epwe wor eu fansoun lupwen sipwe tongeni meefi nukunukoch lon imwach me pwal lukun?’ (Mika 4:​3, 4) A wor eu minen tota ren chon wawa kuruma? Sipwe tongeni eis: ‘Epwe wor eu fansoun lupwen epwe pochokkul inisin aramas meinisin?’ (Aisea 33:24) Sipwe tongeni kuna chommong minen alillis lon ewe puk Reasoning From the Scriptures.b

¹⁰ Ifa ussun sipwe tongeni aeafichi kapas eis lupwen sipwe kaeo ngeni aramas lon Paipel? Sise ussun Jises, pun sisap tongeni silei masouen letipen aramas. Iwe nge, kapas eis mi fichiiti ewe chon kaeo epwe tongeni alisikich le ‘ufata’ ekiekin me meefian. (An Salomon Fos 20:5) Ren chok awewe, sipwe era pwe sia kaeo lon ewe sopwun itan “Ewe Popun Ach Manaueni ewe Manau mi Ammafel epwe Atoto Pwapwa,” lon ewe puk itan Sile. A awewei ekiekin Kot ussun tipewenechar, lisowu mwaal, me pwal fitu mettoch. Eli epwe pwung an ewe chon kaeo polueni ekkewe kapas eis mi mak lon ena sopwun, nge a ita tipeeu ngeni minne a kaeo? Sipwe tongeni eisini: ‘Me reom a pwung ekiekin Jiowa ussun ekkena mettoch?’ ‘Ifa ussun kopwe tongeni apwonueta ekkena kapasen alongolongun alluk seni Paipel lon manauom?’ Nge kopwe chechchemeni lamoten om kopwe mafeniiti ewe chon kaeo. Sisap mochen eani ewe sokkun kapas eis mi asaua are aletipengaua ewe chon kaeo.​—An Salomon Fos 12:18.

¹¹ Ir mi eani ewe public talk repwe pwal tongeni aeafichi kapas eis. A wor ewe sokkun kapas eis chon auseling repwe chok polueni lon letiper, iwe, epwe tongeni alisiir ar repwe aea ar tufichin ekieki me atittina poraus. Fan ekkoch Jises a aea ena esin kapas eis. (Mattu 11:​7-9) Mwirin an eani kapasen suukun poraus, emon chon afalafal epwe pwal tongeni aea kapas eis pwe epwe affata ekkewe menlapen poraus epwe afalafal ussun. Epwe tongeni apasa: “Lon ach porausfengen ikenai, sipwe kaeo poluen ekkeei kapas eis . . .” Iwe, le muchuloon, epwe tongeni eppietasefalli ekkena kapas eis fan iten an epwe enniwili ekkewe menlapen poraus.

¹² Lon ar angangen mammasa aramas, chon Kraist mi wiisen elter repwe tongeni aea kapas eis le alisi emon mi ‘letipechou’ pwe epwe kuna ewe sokkun kapas mi aururu letipan seni an Jiowa we Kapas. (1 Tesalonika 5:​14, NW) Ren chok awewe, ren an epwe alisi emon mi letipeta, emon elter epwe tongeni eppieta Kol Fel 34:18. Iei alon: “Ewe SAMOL a chok arap ngeni chon letipeta, a pwal amanaua ekkewe mi ta lon ngunur.” Ren an epwe pi ika ewe emon mi letipeta a weweiti ifa ussun ena wokisin a weneiti manauan, eli ewe elter epwe tongeni eisini: ‘Jiowa a arap ngeni io? Fan ekkoch en mi meefi “letipeta” me a ussun ita a ‘ta ngunum’? Ussun an ewe Paipel apasa, ika Jiowa a arap ngeni chokena, esap weween pwe a arap ngonuk?’ Ena sokkun kapasen anukunuk epwe tongeni amanauasefalli ngunun emon mi letipechou.​—Aisea 57:15.

Ekiek mi Tetteloch me Pwung

¹³ Lon ach angangen afalafal, sia mochen emiriti letipen aramas ren ach aea poraus mi tetteloch me pwung. (Fofor 19:8; 28:23, 24) A ita wewe ngeni pwe sipwe kaeo ifa ussun sipwe aea ewe sokkun tettelin poraus mi fokkun alollol ren ach sipwe anneta ngeni aramas pwe mi enlet ekkewe poraus lon ewe Kapasen Kot? Aapw. Esor popun an epwe sokkolo alollolun ewe sokkun ekiek mi tetteloch me pwung. Fan chommong, a nampa eu an a kku letipen aramas ach sipwe aea poraus mi tetteloch lon eu lapalap mi mecheres ar repwe weweiti. Nengeni mwo eu ena esin poraus mi tetteloch me pwung.

¹⁴ Met sipwe tongeni apasa ika emon epwe era pwe ese luku nge a wor emon Kot pun ese tongeni kuna i? Sipwe tongeni awewei ngeni pwe a wor eu alluk mi era pwe a wor och popun ren fisitaan mettoch meinisin. Lupwen sia kuna fisitaan och mettoch, sia luku pwe a wor popun are emon chon efisata. Eli sipwe tongeni apasa: ‘Ika ka nom lon eu fonu mi poon me kopwe sereni eu imw mi fokkun lapoch me a masou ren mongo (ina eu mettoch mi fen fisita), esap wor om tipemwaramwar pwe emon (ewe chon efisata) a aueta ena imw me a amasoua ekkewe kapet ren mongo. Iwe, lupwen sia kuna lapalapochun masouen lang me fonufan me ekkewe chommong sokkopaten mongo won fonufan (mettoch mi fen fisita), esap ita pwung ach sipwe luku pwe ekkena mettoch ra fisita pokiten fofforun Emon (ewe chon efisata)? A nampa eu an Paipel awewei ena mettoch: “Ren im meinisin mi wor chon auta, nge ewe mi auta mettoch meinisin, iei i Kot.” (Ipru 3:4) Iwe nge, inaamwo ika a fokkun pwung tettelin ach poraus, nge sap minne meinisin repwe luku. Ewe Paipel a achchema ngenikich pwe chokewe chok mi ‘tipemecheres ngeni’ repwe wiliiti chon luku.​—Fofor 13:​48, NW; 2 Tesalonika 3:2.

¹⁵ Lon ach asukula aramas lon ewe angangen afalafal are lon ewe mwichefel, sipwe tongeni aea ekiek mi tetteloch me pwung le menlapei lapalapen me fofforun Jiowa. A akkaewin murinno och tettelin kapas Jises a aea fan ekkoch, a era ‘ifa me watten.’ (Luk 11:13; 12:24) Ena sokkun tettelin kapas a longolong won poraus mi polufesen, iwe, a tongeni achungu letipen aramas. Ren ach sipwe pwarata pwe ese pwung ewe afalafal ussun ekkein ell, eli sipwe tongeni apasa: ‘Emon sam mi uren tong esap apwungu noun we ren an minalong poun lon ekkei. Epwe ifa me watteen announ ewe poraus ussun ekkein ell me ren Semach we lon lang, ewe mi uren tong!’ (Jeremaia 7:​31) Ren ach sipwe aiti ngeni emon pwe Jiowa a tongei emon me emon noun kewe chon angang, sipwe tongeni apasa: ‘Ika Jiowa a silei iten eu me eu ekkewe fite pilion fuu, epwe ifa me watteen an acheni ekkan aramas mi tongei i, nge ir mi fen kamoto ren chcha mi auchea, chchaan Noun we!’ (Aisea 40:26; Fofor 20:28) Ena sokkun tettelin kapas mi wenewenen pwung epwe tongeni alisikich le emiriti letipen aramas.

Kapas Awewe mi Fichiiti Eu me Eu Poraus

¹⁶ Ewe sokkun kapas awewe mi lapoch aramas a ussun och nofitin mongo mi tongeni awilalo ach afalafal pwe aramas repwe efich. Pwata kapas awewe a fokkun lamot lon ach angangen asukula aramas? Iei alon emon chon asukul: “Eu me lein ekkewe mettoch mi kon weires ngeni aramas ar repwe fori, iei ar ekieki och poraus nge esap wor och lios are kapas awewe lon tupuwer ren.” Kapas awewe a kan ffotukalong lon ekiekich lios mi lamot, iwe, a alapalo ach tufichin weweiti minefoon poraus. A sokkolo angochun Jises le aea kapas awewe. (Mark 4:​33, 34) Sipwe pi ifa ussun sipwe tongeni aea ena minen asukula aramas.

¹⁷ Mei fet ewe sokkun kapas awewe mi lapoch? Aewin, epwe fichiiti chon auselingakich, weween, epwe longolong won minne chon auselingakich repwe mecheresin miritiiti. Sia chechchemeni pwe chommong an Jises kewe kapas awewe ra longolong won minne a fis lon nonnomun aramas ran me ran. Oruuan, eu kapas awewe epwe fitipachei ewe lesen sia mochen affata. Ika rese lien poluoch, eli ewe kapas awewe epwe och minen orukoruk ngeni chon auselingakich. Aulungatin, esap kapachelong lon eu kapas awewe kapas tichchik ese lamot. Chechchemeni mwo pwe Jises a awora kapas tichchik mi lamot nge a likitalo ekkewe rese lamot. Aruanuun, lupwen sipwe aea eu kapas awewe, sipwe pi pwe a ffat ewe lesen seni. Ika esap ina ussun, eli ekkoch resap weweiti ewe lesen.

¹⁸ Ifa ussun sipwe tongeni ekiekieta kapas awewe mi fichiiti ach afalafal? Esor lamoten ach sipwe ekiekieta ekkan tutulap mi ttam. Kapas awewe mi mwoch epwe tongeni achungu ewe letip. Sipwe chok ekieki minne a ussun chok ewe poraus sia mochen affata. Ren chok awewe, sipwe era pwe sia kapas ussun an Kot pwarata omusomus, me sia mochen awewei ewe poraus lon Fofor 3:​19, ewe mi apasa pwe Jiowa a kan ‘tolu,’ are amoielo, ach kewe tipis. Ina eu kapas mi wesewesen ffatoch, nge met sipwe tongeni aea pwe sipwe awewei ewe lesen​—ita efoch tottolun mak are och ammat? Eli sipwe tongeni apasa: ‘Lupwen Jiowa a omusalo ach kewe tipis, a amoiirelo ussun an aea eu ammat (are efoch tottolun mak).’ A mecheres ngeni meinisin ar repwe weweiti ena sokkun kapas awewe.

¹⁹ Kopwe tongeni kuna me ia kapas awewe mi lapoch, nge mi kapachelong minne a wesewesen fis lon manauen aramas? Ke le kutter lon pwisin manauom are lon sokkopaten nonnomun me kunaen chienach kewe chon luku. Sipwe tongeni fili kapas awewe seni chommong mettoch, nge mi kapachelong masouen lang me fonufan, pisekin lon imwach, are och poraus mi choufetal lon sopwuch. Eu minen alillis mi watte fan iten ach sipwe kunakun kapas awewe mi murinno, iei ach “nennengeni” ekkewe mettoch mi fiffis iteiten ran lon leeniach. (Fofor 17:22, 23) Iei alon eu puk ussun ewe fofforun afalafala aramas: “Emon chon afalafal mi nennengeni nonnomun aramas me ar kewe angang mi sokkopat, me a kapas ngeni sokkun aramas meinisin, me a annefota mettoch meinisin me a eis ussur tori an epwe weweitiir, epwe ionfengenni chommong poraus fan iten kapas awewe, iwe, epwe kuna watte alillis seni lupwen epwe wor lamotan.”

²⁰ A wor pwal och watteen minen awora alillis fan iten ach sipwe kuna kapas awewe mi murinno​—weween, Ewe Leenien Mas, Awake!, me ekkewe pwal fitu puk forien Chon Pwarata Jiowa. Kopwe tongeni silei chommong mettoch seni om nennengeni ifa ussun ekkena chassi me puk ra aea kapas awewe.c Ren chok awewe, a wor eu kapas awewe lon wokisin 11 lon sopwun 17 lon ewe Sile puk. A alollofengenni ekkewe aramas mi sokkopat lapalaper lon ewe mwichefel me ekkewe sokkopaten waa mi ssa unukkum won efoch al. Pwata a murinno ena? Nengeni mwo pwe a longolong won och mettoch mi fiffis iteiten ran, me a fitipachei ewe lesen, iwe, a ffat weween. Sipwe tongeni aea ekkewe kapas awewe seni nouch kewe chassi me puk lon ach angangen asukula aramas, me eli sipwe tongeni alapalaper pwe repwe awora minne mi lamot ngeni emon chon kaeo are sipwe tongeni ekis siwiliir fan iten eu ach afalafal.

²¹ A mmen watte ekkewe feioch mi toto ren emon sense mi lipwakoch. Lupwen sipwe asukula aramas, a ussun ita sipwe uwei ngeniir liffang; weween, sipwe kan aea minne a nom rech pwe sipwe alisiir. Ena esin fofforun liffangelo a kan atoto pwapwa pun iei alon Paipel: “Pwapwaan liffangelo a lap seni pwapwaan angei.” (Fofor 20:​35, NW) Ren ekkewe sense mi asukula aramas ussun ewe Kapasen Kot, ena pwapwa a popu seni ach silei pwe sia kan aiti ngeni aramas och mettoch mi nomottam, iwe, a wesewesen auchea​—weween, poraus mi enlet ussun Jiowa. Sipwe pwal tongeni meefi pwapwa pokiten ach silei pwe sia akkappiru ewe Sense mi Lapalap, Jises Kraist.

[Footnotes]

En mi Chechchemeni?

• Ifa ussun sipwe tongeni asukula aramas ren ach aea kapas mi mecheres lupwen sipwe kaeo ngeni emon ussun Paipel lon imwan we are lupwen sipwe eani eu afalafal lon ach mwichefel?

• Ifa ussun sipwe tongeni aeafichi kapas eis lupwen sipwe afalafal imw me imw?

• Ifa ussun sipwe tongeni aea ewe sokkun kapas mi tetteloch me pwung ren ach sipwe menlapei lapalapen me ekiekin Jiowa?

• Sipwe tongeni kuna me ia kapas awewe mi fichiiti ach afalafal?

3. Ifa ussun sipwe tongeni alapalo angochuch lon wiisach we, wiisen sense?

4, 5. (a) Pwata a lamot pwe ekkewe poraus mi enlet lon Paipel a pwalo lon kapas mi mecheres ngeni aramas ar repwe weweiti? (b) Ren ach sipwe amecheresi an aramas repwe weweiti minne sipwe asukuler ussun, pwata a lamot sipwe tumunu ewe sokkun kapas sipwe aea?

6. Ifa ussun sipwe tongeni tumunukich pwe site kon achuukata won emon chon kaeo Paipel ekkewe poraus sipwe sotun awewei ngeni?

7. Met sokkun emmwen epwe tongeni alisikich pwe sipwe tufichin asukula aramas ren ach aea poraus mi mecheres lupwen epwe wor ach afalafal lon ach mwichefel?

8, 9. Ifa ussun sipwe tongeni filata eu kapas eis mi fichiti minne mi auchea ngeni emon sipwe chuuri lon imwan? Uwawu mwo ekkoch ena esin kapas eis.

10. Ifa ussun sipwe tongeni aea kapas eis le ‘ufata’ ekiekin me meefien emon chon kaeo Paipel, nge met sipwe chechchemeni?

11. Ifa ussun chokewe mi eani ewe public talk repwe tongeni aeafichi kapas eis?

12. Awewei mwo eu poraus mi affata ifa ussun ekkewe chon Kraist mi wiisen elter repwe tongeni aea kapas eis pwe repwe alisi emon chiener chon luku le kuna kapasen auruuru letipan seni ewe Kapasen Kot.

13, 14. (a) Ifa ussun sipwe tongeni aea ewe sokkun kapas mi tetteloch me pwung fan iten emon mi apasa pwe ese luku emon Kot esap tongeni kuna? (b) Pwata sisap ekieki pwe meinisin repwe luku ach afalafal?

15. Menni kapas mi tetteloch me pwung sipwe tongeni aea ren ach sipwe menlapei lapalapen me ekiekin Jiowa, me ikkefa ruu poraus mi affata ifa ussun sipwe tongeni aea ena esin kapas mi tetteloch me pwung?

16. Pwata kapas awewe ra mmen auchea lon ewe angangen asukula aramas?

17. Ikkefa ekkewe ruanu mettoch a nom ren ewe esin kapas awewe mi lapoch?

18. Ifa ussun sipwe tongeni ekiekieta kapas awewe mi fichiiti ach afalafal?

19, 20. (a) Sipwe tongeni kuna me ia kapas awewe mi murinno? (b) Ikkefa ekkoch kapas awewe mi lapoch a fen mak lon nouch kewe puk me chassi?

21. Ikkefa ekkewe feioch mi toto rech ika sipwe lipwakoch lon wiisach we, wiisen sense fan iten ewe Kapasen Kot?

[Picture on page 30]

Ekkewe elter repwe tongeni aea kapas eis le alisi chiener kewe chon luku pwe repwe kuna kapasen auruuru letiper seni ewe Kapasen Kot