Ülüngät Minen Älillis mi Amürinnölo Om Asukul
1. Pwata sipwe amürinnölo ach asukul?
1 Meinisin Chon Kraist chon afalafal, iir sense. Ewe popun sia föri ei angang fän iten ach sipwe äiti ngeni aramas ewe pworaus, ese lifilifil ika sia kerän chuuriir, liwinitiir pwe repwe alapaalo ar sile are käkkäeö ewe Paipel. Me a aüchea ewe pworaus sia asukula ngeniir. Sia ekketina saramen “ekkewe taropwe mi fel,” mi tongeni etipächemaalo aramas “usun ewe angangen amanau.” (2 Tim. 3:15, TF) A ifa me mürinnöön ena angang! Ikkeei ekkewe ülüngät minen älillis mi amürinnölo ach asukul.
2. Ifa usun sipwe asukul fän mecheres?
2 Mecheres: Ika sia fokkun silei eü pworaus, sia tongeni mönükaalo weiresin ewe pworaus ngeni emön ese silei. Ina popun, atun ka käeö Paipel ngeni emön, kosap achommonga om asukul ren chommong pworaus rese lamot. Nge kopwe chök menlapei ekkewe pworaus mi lamot. Kapas chommong, ese wewe ngeni asukul mi mürinnö. (SalF. 10:19) A öch ika sipwe chök älleani ekkewe wokisin mi lamot. Mwirin, menlapei chök kinikinin ewe wokisin mi weneiti ewe pworaus. Ewe Afalafal woon ewe Chuuk mi mak lon Mattu sopwun 5 ngeni 7, a masou ren ekkewe pworaus mi wesewesen enlet, nge Jises a asukul fän mecheres me ese achommonga an kapas.
3. Met lamoten ekkewe kapas äwewe, me fän chommong ikkefa ekkewe ra kon mürinnö?
3 Kapas Äwewe: Kapas äwewe a anganga ekiek, achchüngü memmeef, me ina eü minen älillis le chechchemeni. Kosap ekieki pwe mi lamot kopwe emön chon tuttullap pwe ka tongeni eäni eü kapas äwewe mi mürinnö. Fän chommong Jises a äeä kapas äwewe mi mwoch me mecheres. (Mt. 7:3-5; 18:2-4) Om chüngaani eü lios mi mecheres lon echö taropwe, a pwal fokkun älillisöch. Om mmolnöch a tongeni älisuk le ekieki kapas äwewe mi mürinnö.
4. Ifa usun sipwe nöünöüöchü kapas eis?
4 Kapas Eis: Kapas eis a efisi än ewe chon käeö epwe ekiek. Ina popun, kopwe mosonottam mwirin om kapas eis ngeni. Ika ka mwittir le pwisin pölüweni om kapas eis, kosap tongeni silei met noum we chon käeö a weweiti. Ika mi mwääl an pölüweni, mi öch kopwe emmweni ngeni pwüngün ewe pworaus ren om eäni pwal ekkoch kapas eis lap seni om kopwe apwüngalo. (Mt. 17:24-27) Ewer, esap kich sense mi unusöch. Ina minne, ewe Paipel a pesekich ach sipwe tüttümünü ach asukul. Ach föri ena epwe atoto feiöch fochofoch ngenikich me pwal ngeni chokkewe mi aüselingakich.—1 Tim. 4:16.