Asukul fän Mecheres
1. Ifa esissillen eü asukul mi fataffatöch me mürinnö?
1 Ach asukula aramas fän mecheres ina eü mettoch mi lamot ren ach sipwe lipwäköch le älisi aramas. Ika sipwe ekiekifichi napanapen än ewe Sense mi Lapalap, Jises asukul epwe tongeni älisikich le amürinnölo ach “angangen asukul.”—2 Tim. 4:2; Jon 13:13.
2. Met weween ach asukul fän mecheres? Ifa älillisöchün ena sokkun asukul?
2 Eäni ewe Kapas mi Mecheres: Lon än Jises we Afalafal woon ewe Chuuk a eäni ekkewe kapas mi mecheres le äweweei ekkewe pworaus mi enlet me alollool. (Mt., sopwun 5 ngeni 7) Ewe mwichen aramas mi aüseling ngeni Jises a “weitifengeni usun an afalafal.” Ekkewe chon aresini Jises ra mäirü me apasa: “Esap wor eman aramas a afalafal usun än ei mwän afalafal.” (Mt. 7:28, 29; Jon 7:46) Ese pwal lamot ach sipwe nöünöü ekkewe kapas mi alollool, weires, me kapas äwewe mi kon titchik ren ach sipwe älisiir ar repwe wesewesen lükü. Sipwe tongeni äweweöchü ewe pworaus mi enlet ren ach eäni ekkewe kapas mi mecheres.
3. Pwata ekkoch ra achommonga ar pworaus ngeni ekkewe chon aüseling, me ifa ussun sipwe tümünü pwe sisap föri ena?
3 Aükükü ewe Pworaus: Jises a ekieki ekkewe aramas mi aüseling an afalafal ika ifa ükükün pworaus repwe tongeni weweiti lon eü fansoun. (Jon 16:12) Sipwe nengenifichi me ekieki met sokkun pworaus mi weneiti emön me emön aramas, äkkäeüin lupwen sia afalafal ngeni märärich, aramas mi kerän sani le aüseling are semirit. Sipwe tümünü pwe sisap achommonga ach pworaus inaamwo ika ussun itä ra ännefota ar ekiek le aüseling ngenikich. Pun chokkewe mi letip wenechar repwe chök sopwelo le angei ewe sile ussun ewe Kot mi enlet, Jiowa.—Jon 17:3; 1 Kor. 3:6.
4. Pwata a öch ach sipwe chök menlapei ekkewe pworaus mi lamot mwen ach kon titchiki?
4 Menlapei Ekkewe Pworaus mi Lamot: Jises ese achommonga an kewe afalafal ren an apachaalong chommong mettoch mi titchik. Lupwen a apasa: “Ekewe sotup meinisin repwe . . . towu seni peiaser,” esap ina atun epwe titchikin äwewe ekkewe ruu sokkun äpilükülükün ekkewe repwe manausefäl. (Jon 5:28, 29) Lupwen sipwe käeö ngeni emön, sipwe chök menlapei ekkewe pworaus mi lamot nge tümünü pwe sisap apachaalong och pworaus me lükün ewe lesen sia käkkäeö.
5. Ifa feiöchün ach asukul fän mecheres?
5 Sia fokkun kilisou ngeni Jiowa pwe a asukulakich fän mecheres pwe sipwe silefichi meinisin käit mi lamot ngenikich! (Mt. 11:25) Amwo sipwe apwönüetä ekkeei kapasen emmwen le asukula aramas fän mecheres, me küna pwapwa ren uwaöchün ach angangen afalafal.