Mosonoson—eu Lapalap Mi Lamot Fan Iten Chon Kraist
“Pwilitalong . . . mosonoson.”—KOLOSE 3:12.
1. Met popun mosonoson eu lapalap mi fokkun amwarar?
SIA pwapwaiti ach sipwe nonnom ren aramas mi mosonoson. Iwe nge, King Solomon a apasa pwe “eu chonau mi mosonoson a tongeni kupi efoch chu.” (An Salomon Fos 25:15, NW) Mosonoson eu lapalap mi amwarar mi apachafengenni tipoch me pochokkul.
2 Ewe aposel Paul a apachalong mosonoson lon ewe tettelin ekkewe “uwan Ngun,” sia kuna lon Kalesia 5:22, 23. Fan chommong ewe kapas lon fosun Krik a affou ngeni “tipefesir” lon wokisin 23 lon ewe Testament Mi Fo Pwal Kol Fel, a affou ngeni “mosonoson” are “pwotete” lon pwal ekkoch Paipel. Ren enletin, a weires ach sipwe kuna eu kapas epwe titchikin awewei ei kapas lon fosun Krik pokiten ewe kapas ese weneiti och foffor mi pwotete are mosonoson, nge ewe mosonoson me umoumoch lon emon; sap lapalapen an emon foffor, nge lapalapen letipan me ekiekin.
3 Sipwe ekiek ussun fomon lon ewe Paipel mi pwaralo mosonoson ren ach sipwe alapalo ach weweiti weween me aucheaan mosonoson. (Rom 15:4) Ach fori esap chok alisata ach kaeo ussun ei lapalap nge, epwe alisikich le angei me pwaralo mosonoson lon ach kewe foffor meinisin.
“Mi Fakkun Auchea Fan Mesen Kot”
4 Pokiten mosonoson kinikinin uwan an Kot we ngun me fel, sipwe ekiekin kuna pwe a pwal riri ngeni lapalapen Kot kewe mi amwarar. Ewe aposel Piter a makkei pwe “mosonoson o tipemecheres . . . mi fakkun auchea fan mesen Kot.” (1 Piter 3:4) Pwungun pwe mosonoson eu lapalapen Kot me Jiowa a fokkun aucheani. Ina eu popun noun Kot kewe chon angang meinisin repwe amaaraata mosonoson. Iwe, ifa ussun ewe Kot Mi Lapalap Seni Meinisin lon unusen lang me fonufan, epwe pwaralo mosonoson?
5 Lupwen ewe aewin pean aramas, Atam me If ra pukun alleasolap lupwen ra alleasolapa an Kot alluk mi ffat pwe resap ochei uwan ewe iraan silei och me ngau. (Keneses 2:16, 17) Ena fofforun alleasolap a fen atoto tipis me malo ngeniir me mwirimwirir kewe me ar towau seni Kot. (Rom 5:12) Inaamwo ika Jiowa a wor an pwungun apwunguur nge, ese chok poutiirelo meinisin pokiten ra fokkun lukumach me rese tongeni angaseerelo. (Kol Fel 130:3) Iwe, pokiten an umoumoch me an esap mochen kon ssenuk—ruu mettoch mi pwalo an mosonoson ren, Jiowa a awora och minen alillis fan iten an chon tipis repwe arap ngeni i me angei an feioch. Ewer, ren an fangolo noun we Jises Kraist ussun chok eu moon kepichilo, Jiowa a fen atufichi ach arap ngeni an we leenien motun king nge esap wor ach lolilen are niuokkus.—Rom 6:23; Ipru 4:14-16; 1 Jon 4:9, 10, 18.
6 Mwen an Jises feitiu fonufan, an Jiowa mosonoson a fen pwalo lupwen Kein me Epel, noun Atam kewe, ra asor ngeni Kot. Jiowa a etiwa an Epel we asor nge ‘ese efich’ an Kein we asor pokiten a miritiiti met a nonnom lon letiper. An Kot pwapwa ren Epel me an we asor a fen efisata an Kein song. Ewe Paipel a apasa: “Kain a fokun chou, nge won mesan a wowongau.” Met Jiowa a fori? A fen song pokiten an Kein ekiek mi ngau? Aapwi. Iwe, fan mosonoson, a eisini Kein ewe popun a kon song. Jiowa a pwal awewe ngeni Kein met epwe fori pwe epwe tongeni ‘etiwa an asor.’ (Keneses 4:3-7) Ren enletin, Jiowa ewe unusen popun mosonoson.—Ekistos 34:6.
Mosonoson A Lukeato Me Asosow Aramas
7 Sipwe tongeni weweiti lapalapen Jiowa kewe mi amwarar ren ach kaeo manauen Jises Kraist me an angangen afalafal. (Jon 1:18; 14:6-9) Lupwen Jises a nonnom lon Kalili atun ewe oruuen ierin an angangen afalafal, a fori chommong manaman lon Koresin, Petsaita, Kaperniom, me lon ewe fonu unukkur. Iwe nge, lape-ngeni ekkewe aramas ikewe ie ra lamalam tekia me rese mochen auseling. Ina ewe popun rese luku Jises. Iwe, met Jises a fori? A achema ngeniir liwinin ar nafangauen luku nge a chuen tongei ekkewe ʽam ha·ʼaʹrets, ekkewe aramas mi tekison mi nonnom leir, pokiten ar osupwang lon pekin ngun.—Mattu 9:35, 36; 11:20-24.
8 An Jises kewe foffor mwirin, ra pwarata pwe a wesewesen “sinei ewe Sam” me a akkappiru i. Jises a etiwa ekkewe aramas mi tekison: “Oupwe feito rei, ami meinisin mi pekus o chouchou, o ngang upwe asosokemi. Oupwe pwilitalong ai iok, o kaeo seniei, pun ngang mi mosonoson me tipetekison; iwe, oupwe kuna asosoon ngunumi.” A ifa me watteen ewe aurur me asoso ekkena kapas ra awora ngeni ekkena aramas mi riaffou! Ra pwal aururukich ikenai. Ika sia enletin pwilitalong mosonoson, iwe, sipwe nonnom lein ekkewe aramas “ewe Nau a mochen pwar ngeni” Seman.—Mattu 11:27-29.
9 Tipetekison a riri ngeni mosonoson. Lamalam tekia epwe emmwen ngeni ach pwisin atekiataakich me fan chommong epwe efisi ach rochongau ngeni aramas. (An Salomon Fos 16:18, 19) Jises a tipetekison fansoun meinisin atun an angangen afalafal. Pwal mwo nge lupwen epwe feilo lon Jerusalem walu som ran mwen an malo me aramas ra etiwa ussun chok kingen ekkewe chon Jus, Jises a sokko seni ekkewe sou nemenemen fonufan. Jises a apwonueta an Sekaraia oesini ussun ewe Messaia: “Nengeni, om king epwe feito reom, epwe mosonoson, o epwe momot won emon ass, pwal won emon appanen ass.” (Mattu 21:5; Sekaraia 9:9) Ewe soufos mi tuppwol, Taniel, a kuna ifa ussun Jiowa epwe awiisa ngeni Noun we ewe pwungun nemenem lon eu langepwi. Iwe nge, lon eu oesini mwen ena, a apasa pwe Jises mi “tekison” seni meinisin won fonufan. Pwungun pwe mosonoson me tipetekison ra fokkun ririfengen.—Taniel 4:17; 7:13, 14.
10 An Jiowa me Jises mosonoson a alisata ach arap ngeniir. (Jemes 4:8) Pwungun pwe mosonoson esap wewe ngeni apwangapwang. Aapwi! Jiowa, ewe Kot mi lapalap, a pwaralo an manaman me pochokkul wachemuk. Lupwen a kuna och pwungungau a fokkun watte an song. (Aisea 30:27; 40:26) Pwal ussun chok, Jises a apposa letipan pwe esap ffangeta, pwal mwo nge lupwen Setan ewe Tefil a tooki. Ese tipeeu ngeni an ekkewe nouwisin lamalam sopai mi rikippwor lon ranin we. (Mattu 4:1-11; 21:12, 13; Jon 2:13-17) Iwe nge, a mosonoson ngeni noun kewe chon kaeo lupwen ra tipis, me a mosonottam fan ar kewe apwangapwang. (Mattu 20:20-28) Emon sou kaeo Paipel a awewe won an Jises mosonoson iei ussun: “An Jises tipe pwotete a wor manaman mi pochokkul ussun chok mecha.” Amwo sipwe mosonoson ussun chok Kraist.
Ewe Mi Mosonoson Lap Seni Meinisin Lon Ranin We
11 Moses ewe aulumonun aramas sipwe kaeo ussun. A mak lon ewe Paipel pwe Moses a “fokun tipetekison [mosonoson, NW] seni aramasen fanufan meinisin.” (Numperis 12:3) Ei poraus a makketiu lon ewe Paipel fan nemenemen ngunun Kot. Pokiten Moses a mosonoson, a ekketiwa an Jiowa emmwen.
12 An Moses maarita a sokkolo lapalapan. Jiowa a akkota pwe ei nau, noun ruuemon chon Ipru mi tuppwol, esap malo atun eu fansoun rauangau me nni manau. Inan we a pwisin tumunu i lupwen a kukkun me neminnewe a achocho le aiti ngeni Moses ussun ewe Kot mi enlet, Jiowa. Mwirin, ra fen angei Moses seni lon imwan we me ra uweealo Moses ngeni eu leeni mi fokkun sokkolo lapalapan. Stifen emon chon Kraist mi ninnilo pokiten an luku, a apasa: “Moses a kaeo sokkun tipatchemin Ijip meinisin, o i emon mi pochokkul lon an kapas, o pwal lon an kewe fofor.” (Fofor 7:22) An luku a ppiita lupwen a kuna chommongun ekkewe pwungungau won pwiin kewe seni noun Farao kewe nouwis. Pokiten Moses a nnielo emon chon Isip lupwen a kuna an awatta emon chon Ipru, Moses a su seni Isip ngeni ewe fonuen Mitian.—Ekistos 1:15, 16; 2:1-15; Ipru 11:24, 25.
13 Lupwen a 40 ierin, Moses a wiisen pwisin tumunu manauan lon eu fonu pon. Lon Mitian a kuna noun Reuel fumon fopwul me a alisiir ar repwe itifi konik fan iten noun semer we pwiin siip mi watte. Lupwen ra liwiniiti imwer, ekkewe fopwul ra pwapwa le awewe ngeni semer we pwe emon “re Isip” a fen alisiir lupwen ekkewe chon masen siip ra aosukosukeer. Reuel a etiwa Moses an epwe nonnom ren an we famili. An kewe osukosuk rese asonga Moses; me rese pinei an epwe siwili lapalapen manauan me eorenalo eu minefoon sokkun manau. Ese fen apwangapwangelo an mochen epwe fori letipen Jiowa. A tumunu noun Reuel kewe siip ren 40 ier, me a puluweni Sipora. A tumunu noun kewe at, me a apochokkula ewe lapalap a itefoulo ren. Ewer, fan riaffou, Moses a kaeo mosonoson.—Ekistos 2:16-22; Fofor 7:29, 30.
14 A chuen pwalo an Moses mosonoson mwirin an Jiowa awiisa ngeni wiisan sou emmwenin Muun Israel. Emon anuwol a ereni pwe Eltat me Metat ra nikinikin soufos lon leenier we—pwal mwo nge lupwen rese fen nonnom lupwen Jiowa a ninatiu ngunun we won ekkewe 70 mwan mi asimau mi alisi Moses. Josua a apasa: “Aukatiu ar osuni.” Nge Moses a polueni fan mosonoson: “Ifa ussun, ka apangau won wisei? Amwo, noun ewe Samol mi Lapalap aramas meinisin repwe soufos, pwe epwe anomu Ngunun wor.” (Numperis 11:26-29) Mosonoson a tongeni akinamwelo aramas atun fansoun osukosuk.
15 Fan eu Moses ese pwarata mosonoson. Lon Meripa, mi kanangeni Kates, Moses ese alinga Jiowa, ewe Chon Fori Manaman (Numperis 20:1, 9-13) Inaamwo ika Moses ese unusoch nge, an luku mi nukuchar a fen alisi lon manauan meinisin, me an mosonoson a chuen achungu letipach ikenai.—Ipru 11:23-28.
Rochongau Ngeni Mosonoson
16 Eu pisekin nengeni mi ourourakich a fis lon ranin Tafit, ekiselo chok mwirin maloon noun Kot we soufos Samuel. A weneiti eu pupulu, Nepel me puluwan we Apikael. A ifa me sokkofesennin lapalaper kewe! Apikael mi “mirit,” nge puluwan we “aramasangau me miritingau.” Nepel ese pwalo fairo lupwen ese etiwa ewe tingor fan iten alillis seni noun Tafit kewe, chokkewe ra kan awora alillis le tumunu noun Nepel kewe pwiin siip seni chon sola. Tafit a song me ir me noun kewe ra angei nour kewe ketilas pwe repwe feilo fiu ngeni Nepel.—1 Samuel 25:2-13.
17 Lupwen Apikael a rongorong met a fen fis, a muttir angei pilawa, wain, futuk, me keik mi for seni krep mi pwas me fik, iwe a walo ren Tafit. A tingormau: “Ai samol, ewe tipis epwe chok nonom woi. Ua tungor ngonuk pwe kopwe mwut ngeniei ngang noum chon angang fefin pwe upwe kapas ngonuk. Kose mochen kopwe rongorong aloi ngang noum chon angang fefin.” A kinamwelo letipen Tafit ren an Apikael tingor mi pwotete. Mwirin a fen rongorong an Apikael awewe, Tafit a apasa: “Ua mwareiti ewe Samol mi Lapalap ewe Koten Israel mi tinuketo ikenai pwe kopwe churiei. Kopwe feioch, pun ka mirit, ka epetiei seni tipisin nimanauei aramas, pwal seni ai upwe ngeni aramas chappen ar fofor.” (1 Samuel 25:18, 24, 32, 33) An Nepel rochongau a emmwen ngeni an malo. Lapalapen Apikael kewe mi murinno a fen emmwen ngeni an chengel; a wiliiti puluwen Tafit. An mosonoson a isetiu eu leenien appiru fan iten aramas meinisin mi angang ngeni Jiowa ikenai.—1 Samuel 25:36-42.
Kukkutta Mosonoson
18 Mosonoson mi lamot. Esap chok pwe sipwe pwotete lon ach fos me foffor; a wewe ngeni eu lapalapen letipach mi asosow aramas. Neman me loom, sia fen eoreni ach sipwe rochongau lon ach kapas are kirikiringau lon ach kewe foffor. Nge, lupwen sia fen kaeo ewe enlet lon Paipel, sia fen siwili lapalapach me sia wiliiti aramas mi kinamwe me murinno. Paul a kapas ussun ei siwil lupwen a pesei ngeni chienan kewe chon Kraist: “Oupwe pwilitalong womi umoumoch, kirokiroch, tipetekison, mosonoson, o songomang.” (Kolose 3:12) Ewe Paipel a alollo ei siwil ngeni an ekkewe man mwacho—wolif, lepat, laion, pea, me kopra—siwil ngeni man fesir—lam, me kukkun siike me kou. (Aisea 11:6-9; 65:25) A kon watte ekkewe siwil lon lapalapen aramas pwe chokkewe mi kuneer ra fokkun ingeiti ewe siwil. Sia silei pwe ekkeei siwil ra fisita ren angangen an Kot ngun mi fel pokiten eu me lein uwan kewe mi amwarar, mosonoson.
19 Weween pwe lupwen sia fen siwili lapalapach kewe me fangolo manauach ngeni Jiowa, ese chuen wor lamoten ach sipwe angang ngeni mosonoson? Aapwi. Ekieki mwo ifa ussun sipwe angang ngeni tumunuochun ufach kewe mi fo pwe repwe limoch me murinno. Ach nennengeni an Kot we Kapas me ach ekkekiekifichi ekkewe pisekin nengeni lon, epwe alisikich ach sipwe atittina pwisin kich. Ewe Paipel a ussun chok eu kilas. Met epwe pwalo ussun pwisin en lupwen ka nengeni lon ena kilas?—Jemes 1:23-25.
20 Mi fokkun sokkolo lapalapen aramas. Epwe ekis mecheres ngeni ekkoch noun Kot kewe chon angang ar repwe mosonoson nge epwe weires ngeni ekkewe ekkoch. Iwe nge, chon Kraist meinisin ra wiisen amaaraata uwan an Kot we ngun mi fel, kapachelong mosonoson. Fan tong, Paul a pesei Timoti: “Kopwe achocho ngeni minne mi pung, o ngeni ewe manau mi fich ngeni Kot; kopwe pwal achocho ngeni luku, me tong me likiitu me umoumoch [mosonoson, NW].” (1 Timoti 6:11) Ewe kapas “achocho” a affata ngenikich pwe sipwe angang ngeni. Lon eu Paipel ei poraus a chiyaku ngeni ‘apposa letipom ngeni.’ (New Testament in Modern English, ren J. B. Phillips) Ika kopwe achocho le ekiekifichi ekkewe leenien appiru mi murinno lon ewe Paipel, kosap monukiirelo, ekkewe leenien appiru repwe fotukalong lon tupuwom. Repwe alapalapok me emmwenuk.—Jemes 1:21.
21 Ach kewe foffor ngeni aramas epwe pwarata ukuukun ach feffeita lon ach amaaraata mosonoson. “Io mi tipatchem leimi? Iwe, epwe pwarata an kewe fofor mi murinno lon an tipatchem mi tipetekison [mosonoson NW].” (Jemes 3:13) Ifa ussun sipwe pwaralo ei lapalapen chon Kraist lon imwach, atun ach we angangen afalafal, me lon ewe mwichefel? Ewe lesen mwirin ei epwe emmweniochukich.
Enniwiliin Poraus
• Met ka fen kaeo ussun mosonoson seni
• Jiowa?
• Jises?
• Moses?
• Apikael?
• Met popun a lamot ach sipwe kukkutta mosonoson?
2, 3. Ifa ewe riri lefilen mosonoson me ngun mi fel, me met sipwe pwungupwung won lon ei lesen?
4. Ifa ussun sia silei pwe Jiowa a aucheani mosonoson?
5. Pokiten an Jiowa mosonoson, ifa ewe apilukuluk a nom rech?
6. Ifa ussun an Kot mosonoson a pwalo lon an kewe foffor ngeni Kein?
7, 8. (a) Ifa ussun sipwe tongeni weweiti an Jiowa mosonoson? (b) Ifa ekkewe kapas lon Mattu 11:27-29 ra pwaralo ngenikich ussun Jiowa me Jises?
9. Menni lapalap a riri ngeni mosonoson, me ifa ussun Jises a isetiu eu leenien appiru mi murinno fan itach?
10. Met popun an chon Kraist mosonoson esap wewe chok me apwangapwang?
11, 12. Lupwen sia chechchemeni manauen Moses me le kukkunun, met popun an mosonoson a fokkun amwarar?
13. Ifa ussun ekkewe 40 ier a nonnom lon Mitian ra kku manauen Moses?
14. Awewei mwo eu poraus seni ewe fansoun Moses a emmweni Israel a pwarata watteen an mosonoson.
15. Inaamwo ika Moses ese unusoch nge, met popun a murinno ach sipwe appiru i?
16, 17. Ifa ewe kapasen ourour seni porausen Nepel me Apikael?
18, 19. (a) Ikkefa ekkewe siwil mi pwalo lupwen sia pwilitalong mosonoson? (b) Met epwe alisata ach pwisin atittinakich?
20. Ifa ussun sipwe tongeni sopwoch lon ach wiliiti aramas mi mosonoson?
21. (a) Met popun sipwe kutta mosonoson? (b) Met sipwe fos ussun lon ewe lesen mwirin ei?
[Picture on page 20]
Met popun Jiowa a etiwa an Apel we asor?
[Picture on page 21]
Me ren Jises, mosonoson me tipetekison ra ririfengen
[Picture on page 22]
Moses a isetiu eu leenien appiru mi murinno ren mosonoson