“Iö Leimi A Ekieki Pwe A Tipachem O Mirit?”

“Iö leimi a ekieki pwe a tipachem o mirit? Epwe alletätä ren an manaueni eu manau mi mürina me an föför mürina a föri fän tipetekison me tipachem.”​—JEM. 3:13.

ME REOM, iö a enletin tipatchem? Eli semom me inom, emön chinnap mwän, are emön senseen eü sukul tekia? Om ekiek nge iö mi tipatchem epwe longolong woon urusoun manauom me nonnomum. Iwe nge, nöün Jiowa kewe chon angang ra äkkäeüin mochen silei met ekiekin Jiowa.

² Esap meinisin mi tipatchem me ren chon fönüfan ra enletin tipatchem mwen mesen Jiowa. Awewe chök, ekkoch mwän Jop a kapas ngeni ra pwisin ekieki pwe ra mirit, nge Jop a ereniir: “Üsap küna mwo eman mi tipachem me leimi.” (Hiop 17:10) Iei makkeien ewe aposel Paul ussun ekkewe rese etiwa ewe sile ussun Kot: “Ra pwisin apasa pwe ir mi tipatchem, nge ra fen umwesilo.” (Rom 1:22) Me ren ewe soufos Aisea, Jiowa pwisin a äwenawu: “Feiengauemi, ämi mi lükü püsin ämi mirit, oua pwal ekieki pwe ämi chon tipachem.”​—Ais. 5:21.

³ A ffat pwe a lamot ach sipwe silei met a enletin atipatchema emön pwe epwe küna än Kot chen. Än Salomon Fos 9:10 a emiritikich: “Ach niuokusiti ewe Samol mi Lapalap iei popun tipachem, nge ach silei Ewe mi Pin iei popun ach weweöch.” Ekkewe mi tipatchem repwe wesewesen niuokkusiti ar repwe äletipengaüa Kot, iwe, repwe pwal süföliti an kewe allük. Iwe nge, esap naf ach sipwe chök ngüüri pwe a wor Kot me a aworato emmwen. Ewe aposel Jemes a pesekich ach sipwe ekieki ussun ei mettoch. (Älleäni Jemes 3:13.) Nengeni an we kapas: “Epwe alletätä ren an manaueni eu manau mi mürina me an föför mürina.” Tipatchem mi enlet epwe wesewesen letelo ren met ka akkapasa me föfföri iteiten rän.

⁴ Ach pwäratä mirit lon ach kefil me apwönüetäöchü ach sile me weweöch ra pacheri tipatchem mi enlet. Epwe fet föfförüch ika sia eäni ena esin tipatchem? Jemes a etettelaatiu ekkoch föfför ekkewe mi tipatchem repwe eäni.a Met Jemes a apasa pwe epwe älisikich le amürinnölo föfför lefilach me chienach kewe chon lükü, me pwal aramas lükün ewe mwichefel?

Föfför Epwe Esissillatä Ekkewe mi Enletin Tipatchem

⁵ Sipwe enniwili menlapen ei pworaus pwe Jemes a rifengenni tipatchem me föfföröch. Pokiten niuokkusiti Kot, iei poputään tipatchem, emön mi tipatchem epwe achocho le atipeeüfengenni an kewe föfför me än Jiowa kewe al me allük. Ese pükün wor rech ewe sokkun tipatchem mi apwapwai Kot. Nge sia tongeni angei ena tipatchem ren ach sipwe käkkäeö Paipel me ekilonei minne sia käeö. Ekkeei mettoch repwe älisikich pwe sipwe apwönüetä minne Efisus 5:1 a pesekich: “Oupwe appiru Kot.” Ewin ach äppirü föfförün Jiowa, ewin ach sipwe pwäralo tipatchem lon ach kewe föfför. Alen Jiowa kewe ra fokkun tekia seni alen aramas. (Ais. 55:8, 9) Ina minne, lupwen sia äppirü napanapen än Jiowa föri mettoch, chon lükün ach ei pekin repwe küna pwe kich mi sokkolo.

⁶ Jemes a erä pwe ren ach sipwe äppirü Jiowa, sipwe eäni “tipetekison me tipachem.” Inaamwo ika tipefesir a pacheri tipetekison, nge emön Chon Kraist epwe pwal tipeppos ngeni än Kot kewe allük pwe epwe älisi i le eäni ewe ekiek mi itepök me rüüepek. Inaamwo ika esor aükükün än Jiowa pöchökkül, nge I mi tipefesir, me sisap niuokkus le arap ngeni i. Nöün Kot we a äppirü än Seman we tipefesir, ina popun, a tongeni apasa: “Oupwe feito rei, ami meinisin mi pekus o chouchou, o ngang upwe asosokemi. Oupwe pwilitalong ai iok, o kaeo seniei, pun ngang mi mosonoson me tipetekison; iwe, oupwe kuna asosoon ngunumi.”​—Mt. 11:28, 29; Fil. 2:5-8.

⁷ Ewe Paipel a kapas ussun ekkoch mi fokkun tipefesir ika mosonoson. Moses, emön me leir. Mei watte wisan, nge Paipel a erä pwe “Moses eman mwän mi tipetekison, a fokun tipetekison seni aramasen fanüfan meinisin.” (Num. 11:29; 12:3) Chechchemeni ewe tipepwora Jiowa a ngeni Moses pwe epwe tongeni apwönüetä letipan. Jiowa a pwapwa le nöünöü iir kewe mi tipefesir pwe repwe apwönüetä an kokkot.

⁸ A ffat pwe aramas rese unusöch ra tongeni pwäri ewe “tipetekison me tipachem.” Nge kich? Ifa ussun sipwe tongeni feffeitä lon ach pwäralo ei napanap? Tipefesir, iei eü uwaan än Jiowa we ngün mi fel. (Kal. 5:22, 23) Sia tongeni iotek fän iten an we ngün me wenewenen achocho le pwäratä uwaan, iwe, sipwe lükü pwe Jiowa epwe älisikich le pwäppwäri tipefesir. Än ewe sou köl alükülük a mmen achchüngükich, a erä: “[Kot] a afalafala ekkewe mi tipetekison usun an kewe fofor.”​—Kolf. 25:9.

⁹ Iwe nge, sipwe fokkun achocho pwe sipwe feffeitä lon ei napanap. Pokiten urusoun manauach, eli esap mecheres ngeni ekkoch leich ach sipwe tipefesir. Pwal och, eli aramas repwe etipetipakich ach sipwe appölüwa me liwini ngeni aramas ar föfföringaü ngenikich. Iwe nge, itä ina ewe alen tipatchem? Ika a poputä le kar imwom, kopwe kunu ngeni kiris are ngeni konik mi pat? Ika kopwe kunu ngeni kiris, epwe fen awatteelo ewe kar, nge ika kopwe kunu ngeni konik mi pat, epwe kunuelo ewe ekkei. Pwal ina chök ussun, ewe Paipel a öüröürakich: “Eu kapasen pälüen mi pwetete a awesi lingeringer, nge eu kapas pöchökül a afisata song.” (SalF. 15:1, 18) Kapas eis, ika a piitä song lon ika lükün ewe mwichefel, sipwe tongeni pwäratä pwe kich mi enletin tipatchem ren ach sipwe mwökütüküt fän tipefesir?​—2 Tim. 2:24.

¹⁰ Ussun chök met a mak asan, chommong ekkewe ra fitalo ngünün ei fönüfan rese tipepwetete, kinamwe, me mosonoson. Nge sia küna chommong aramas ra arochongaü me lamalam tekia. Jemes a silei pwe a iei ussun, iwe, a öüröüra emön me emön lon ewe mwichefel pwe repwe tümünüür seni ar resap ngaüelo ren ei sokkun ekiek. Pwal met sipwe tongeni käeö seni än Jemes kapasen öüröür?

Napanapen ekkewe mi Tiparoch

¹¹ Jemes a awenewen le makkei ussun napanapen iir kewe mi ü ngeni än Kot we tipatchem. (Älleäni Jemes 3:14.) Lolowo me änini, iir angangen futuk, nge esap napanapen Kot. Ekieki mwo met epwe fis lupwen a chöü ekiekin futuk. Wonu mwichen lamalam, ir tipitipin “Chon Kraist,” ra nemenem woon ekkoch kinikinin ewe imwenfelin Holy Sepulchre lon Jerusalem, ewe a itä kaütä ikewe Jises a ninniilo me peias ie. Fansoun langattam, a wor tipefesen lefiler. Iwe, lon 2006, ewe chassi itan  Time (Fansoun) a apworausa pwe ekkewe chon emmweni ewe lamalam ikewe ie ra “fiüngaü ren fitu awa, . . . ra äeä ekkewe achen kantel mi watte le kawetfengen.” A kon watte ar rese chüen lüküfengeniir, ina popun, ra ngeni emön chon Muslim kiien ewe imwen fel an epwe tümünü.

¹² A kon ssenük ena sokkun föfförün songfengen me esap fokkun fis lon ewe mwichefelin Chon Kraist mi enlet. Iwe nge, pokiten rese unusöch, ekkoch ra chök tipeförea le akkamwöchü pwisin ar ekiek. Ei mettoch epwe tongeni efisatä watteen äninifengen me fiufengen. Ewe aposel Paul a küna ei napanap me lon ewe mwichefelin Korint, iwe a makkei: “Pun lupwen lolowo o anini ra nonnom remi, esap ami mi chuen nonnom lon pekin fituk, o manaueni manauen aramas chok?” (1 Kor. 3:3) Ena napanap mi alolinen a fis me lon ei mwichefel lon fansoun ekkewe aposel. Ina minne, a lamot sipwe tümünü pwe ena sokkun napanap esap pwal tolong lon eü mwichefel ikenäi.

¹³ Ifa ussun ena sokkun napanap epwe tongeni ännifelong lon ewe mwichefel? Epwe tongeni poputä ren ekkoch mettoch mi kükkün. Awewe chök, lupwen eü Kingdom Hall a kaütä, sokkopaten memmeef repwe piitä ren ifa ussun och mettoch epwe för. Emön pwiich epwe tongeni poputä le änicho ika pwe meefian ese pwönütä, eli epwele esiita met a fen pwüngülo. Eli epwe pwal mwo nge ükütiü seni an föri och lon ewe angang! Eli emönnewe a mönükalo pwe pwönüetään ena angang fän iten ewe mwichefel a kon longolong woon ewe ngünün kinamwe lefiler nge sap woon napanapen förün och angang. Jiowa epwe efeiöchü ewe ngünün mosonoson, nge esap ewe ngünün änini.​—1 Tim. 6:4, 5.

¹⁴ Pwal eü awewe, eli ewe mwichen elter lon eü mwichefel ra küna pwe emön elter ese chüen fich ngeni ena wis me ren ewe Paipel, inaamwo ika a fen emön elter ren fite ier. Ewe circuit overseer a küna pwe ekkewe elter ra fen fönöü emönna nge ese kon lien apwönüetä ar kapasen fön. Ina popun ewe circuit overseer a tipeeü ngeni me fiti met ewe mwichen elter a fen apwüngalo pwe emönna epwele towu seni wisan we, wisen elter. Nge ifa meefien emönna ren ena kokkot? Kapas eis, epwe etiwa met ewe mwichen elter ra apwüngalo fän emmwenien Paipel ren mosonoson me tipetekison? Epwe achocho pwe epwe tufichin eänisefälli ewe wis? Are, epwe amwöchü an song me lolowo ren an ese chüen wiseni ewe wis a piin wiseni? Pwata emön pwiich epwe pwomweni pwe mi fichiiti an epwe wiseni ewe wis elter, nge ren enletin, ese fich ngeni? Epwe ifa me watteen tipatchemen emön ika epwe pwäratä tipetekison me mirit!

¹⁵ Pwüngün, mei wor pwal ekkoch mettoch mi tongeni efisi pwe emön epwe eäni ena esin napanap. Ese lifilifil met epwe fis, nge sipwe chök achocho le tii senikich ekkena sokkun napanap mi ngaü. (Älleäni Jemes 3:15, 16.) Ewe chon käeö Jemes a apasa pwe ekkena napanap ra “feito seni fanüfan” pun ir mettochun futuk, me rese longolong woon tipatchem seni Kot. Iir “seni pekin futuk” pun ra popu seni tipen aramas mi ussun chök napanapen maan rese ekieki are weweiti mettoch. Iir “seni anün rochopwak” pun ra pwäralo napanapen ekkewe ngün mi oput Kot. Ese fokkun fich ngeni emön Chon Kraist an epwe napanapeni ekkena sokkun napanap!

¹⁶ Mmen öch ika emön me emön chon ewe mwichefel epwe pwisin chosani manauan me achocho le oturalo ekkena sokkun napanap. Ren ekkewe elter, iir sense lon ewe mwichefel, repwe tümünü ar repwe pwisin pöütalo ekkena napanap mi ngaü lon manauer. Pokiten etipetipaen fönüfan me ach sise unusöch, ese mecheres ach sipwe siwili ekkena napanapangaü. Awewe chök, ach föri ena epwe ussun chök ach tötä woon eü ppan mi pwakak me mitimit. Ika esor wor och mettoch sipwe kamwöch, iwe, sipwe chök likafafasetiw. Iwe nge, ren ach kamwöchülük woon ewe emmwen lon Paipel, pwal etiwa ewe älillis mi kawor me ren än Kot we mwicheich woon unusen fönüfan, iwe, sipwe tongeni feffeitä.​—Kölf. 73:23, 24.

Ekkewe Napanap Chokkewe mi Tipatchem Ra Mochen Pwäralo

¹⁷ Älleäni Jemes 3:17. Sipwe feiöch ren ach ekkekieki ekkoch ekkewe napanap ra feito seni ach eäni “ewe tipachem seni läng.” Limelimöch a wewe ngeni pwe ach föfför me ekiek esap wor limengaüan. A lamot sipwe mwittir pöütalo mettoch mi ngaü. Ach föri ena epwe chök wewe ngeni och mwöküt mi mwittir pükün fis nge ese wor öürümmwöchün. Eli emön epwele tikki mesom. Nge mwittir chök, kopwe amöürü mesom are pöönalo pöün emönna. Mi chök mwittir, kese pwal mwo ekieki ussun. Itä ürürün epwe pwal ina ussun lupwen a torikich sossotun ach sipwe föfföringaü. Limöchüch me mwelien letipach mi käit me ren Paipel epwe mwittir chök amwökütükich ach sipwe pöütalo mettoch mi ngaü. (Rom 12:9) Ewe Paipel a awora ekkewe leenien äppirü ren chokkewe ra eäni ei sokkun napanap, choweän Josef me Jises.​—Ken. 39:7-9; Mt. 4:8-10.

¹⁸ Ewe tipatchem seni Kot a wewe ngeni ach sipwe pwal chechcheei kinamwe. A kapachelong ach tti senikich arochongaü, änicho, are ekkewe föfför mi atai kinamwe. Jemes a pwal apacha ngeni ei pworaus lupwen a apasa: “Ekkewe chon afisätä kinamwe mi fofot fän kinamwe repwe kini ewe uän pwüng.” (Jem. 3:18) Nengeni ewe mwuten fos “afisätä kinamwe.” Lon ewe mwichefel, a pwälo pwe kich chon efisatä kinamwe ika chon atai kinamwe? Kich mi soun änini ngeni ekkewe ekkoch, sia kan songokai, are fen kich sia kan asonga ekkewe ekkoch? Kich mi soun ekieki pwe aramas repwe chök etiwa napanapach nge meit ika a ochchou letiper, are fän tipetekison, sipwe pöütalo ach kewe napanapangaü mi asonga aramas? Sia pwal sillelo ren ach achocho iteitan le efisatä kinamwe, mwittir le omusalo tipisin aramas, me sisap pwal chüen ekieki tipisiir? Ach pwisin etittinakich fän wenechar epwe äiti ngenikich ika mi lamot ach sipwe angang woon ach pwäralo ewe tipatchem seni läng.

¹⁹ Jemes a pwal apachalong tipemirit lon an we aweweei ewe tipatchem seni läng. Sia kan tipemecheres le mut ngeni meefien ekkoch an epwe chöchö, nge esap meefiach, lon ekkewe mettoch ese atai allükün Paipel? Mi pwäpwälo pwe kich mi tipepwetete, me a mecheres än aramas repwe fos ngenikich? Ekkena sokkun napanap ra pwäratä pwe sia fen käeö tipemirit.

²⁰ A ifa me öchün ewe mwichefel ika meinisin repwe achocho le napanapeni ekkewe napanapen Kot Jemes a mak ussun! (Kolf. 133:1-3) Ach sipwe tipefesir, kinamwe, me tipemirit lefilach epwe enletin äfeffeitääi ririöch lefilach me pwäratä pwe a nom rech ewe “tipachem seni läng.” Mwirin, sipwe käeö ifa ussun napanapen ach äteneki ekkewe ekkoch ussun än Jiowa nennengeniir epwe älisikich lon ei mettoch.

[Footnote]

En mi Tongeni Aweweei?

• Met epwe efisi än emön chon Kraist epwe enletin tipatchem?

• Ifa ussun sipwe tongeni feffeitä lon ach pwäralo tipatchemen Kot?

• Met sokkun napanap a pwälo lon chokkewe rese pwäralo ewe “tipatchem seni läng”?

• Ikkefa ekkewe napanap kopwe achocho le ämääraatä?

[Kapas Eis fán Iten ewe Lesen]

1, 2. Met sipwe tongeni apasa ussun aramas mi ekieki pwe ra tipatchem?

3, 4. Ika emön epwe enletin tipatchem, met epwe föri?

5. Ifa föfförün emön mi wesewesen tipatchem?

6. Pwata tipefesir, ina esissillen emön chon äppirü Kot, me ifa ussun emön epwe pwäratä pwe a eäni ei napanap?

7. Pwata sipwe erä pwe Moses i eü leenien äppirü mi mürinnö ren tipefesir?

8. Epwe ifa ussun aramas rese unusöch ra tongeni eäni “tipetekison me tipachem”?

9, 10. Ifa ussun sipwe achocho le napanapeni napanapen Kot we itan tipefesir, iwe, pwata?

11. Ikkefa ekkewe napanap ra ü ngeni än Kot tipatchem?

12. Lupwen ese wor tipatchem, met epwe tongeni fis?

13, 14. Aweweei ifa ussun emön epwe pwäri pwe a chüen nonnom fän nemenien futuk?

15. Pwata ka meefi pwe ewe emmwen lon Jemes 3:15, 16 mi fokkun aüchea?

16. Ikkefa ekkewe ekkesiwil mi lamot sipwe föri, me ifa ussun sipwe tongeni sopwöch lon ei mettoch?

17. Ra fet ekkewe mi tipatchem lupwen a toriir mettoch mi ngaü?

18. Met weween (a) ach sipwe kinamwe? (b) ach sipwe chon efisatä kinamwe?

19. Ifa ussun emön epwe sillelo pwe i emön aramas mi tipemirit?

20. Met mwiriloon lupwen sia pwäralo ekkewe napanapen Kot sia kerän pwoppworausfengen woon?

[Sasing lón pekin taropwe 25]

Ifa ussun osukosuken tipefesen epwe fisitä ikenäi?

[Sasing lón pekin taropwe 26]

Ka mwittir pöütalo mettoch mi ngaü?