Ewe Sokkun Apwüpwülü Mi Wor Süfölün Mwen Mesen Kot Me Aramas
“A fis eu apwüpwülü lon ewe telinimw Kana . . . Jesus me nöün kewe chon kaiö ra kö pwe repwe eti ewe apwüpwülü.”—JON 2:1, 2.
1. Ewe pworaus ussun Jises lon Kana a menlapei met?
JISES, inan we, me ekkoch nöün kewe chon käeö ra silei watteen ewe chengel ewe sokkun apwüpwülü mi wor süfölün lein nöün Kot kewe aramas epwe tongeni efisatä. Kraist a pwal mwo nge asokkalo öchün eü apwüpwülü ren an föri an we äkkäeüin manaman lon, iwe, a awattei pwapwaan chon fiti. (Jon 2:1-11) Eli ka fen fiti me küna pwapwa seni apwüpwülüün Chon Kraist mi mochen angang ngeni Jiowa ren ar eäni ewe sokkun pwüpwülü mi pwapwa. Are eli ka äneänei om kopwe eäni ena sokkun apwüpwülü are älisi emön chienom pwe epwe fisöch an apwüpwülü. Met epwe atufichi ena sokkun apwüpwülü?
2. Met sokkun pworaus a mak lon Paipel fän iten apwüpwülü?
2 Chon Kraist ra küna watteen älillisin ewe ffön lon än Kot we Kapas mi fel lupwen emön mwän me fefin ra ekiekin pwüpwülü. (2 Timoti 3:16, 17) Pwüngün pwe ewe Paipel ese titchiki ika epwe fet kokkotun än Chon Kraist apwüpwülü. A pwüng ena pun mi sokkofesen eörenien aramas me allükün mwuun lon eü me eü leeni me fansoun. Ren chök awewe, lon Israel loom loom, ese affatetiu eü kokkot aramas repwe wisen apwönüetä fän iten apwüpwülü. Lon ewe ränin apwüpwülü, ewe mwän apwüpwülü epwe aweina ngeni imwan are imwen seman, ewe fin apwüpwülü. (Keneses 24:67; Aisea 61:10; Mattu 1:24) Ena föfför mi pwälo ngeni aramas, ina ewe apwüpwülü, nge ese fiti ewe sokkun kokkot chommong apwüpwülü lon ei fansoun ra kan äkkeäni.
3. Jises a awora an älillis fän iten met lon Kana?
3 Me ren ekiekin chon Israel, ena föfför a fen wewe ngeni eü apwüpwülü. Mwirin, eli repwe fiti ewe möngöön apwüpwülü, awewe chök, ren ewe mi mak lon Jon 2:1. Iei ititin ena wokisin lon chommong Paipel: “A wor eü apwüpwülü lon Kana.” Nge lon fosun Ipru ena kapas a afföü ngeni “kametipen apwüpwülü.”a (Mattu 22:2-10; 25:10; Luk 14:8) Ena pworaus a affata pwe Jises a fiti eü kametip fän iten apwüpwülüün chon Jus me a awattei pwapwaan chon fiti. Iwe nge, sia mochen menlapei pwe weween apwüpwülü lon ena fansoun a sokko seni weween lon ei fansoun.
4. Met sokkun apwüpwülü ekkoch Chon Kraist ra kan filatä, me met popun?
4 Lon chommong fönü lon ei fansoun, Chon Kraist mi mochen pwüpwülü repwe apwönüetä ekkoch allükün mwu. Mwirin ar föri ena, repwe tongeni eäni sokkun apwüpwülü meinisin mi tipeeü ngeni allükün mwu. Repwe tongeni fili eü kükkün apwüpwülü emön sou kapwüng, meiör, are sou emmwenin lamalam mi wor mumutään me ren ewe Mwu an epwe wisen eäni. Ekkoch ra filatä pwe epwe ina ussun ar apwüpwülü, iwe, eli repwe tingorei ekkoch märäriir are chiener Chon Kraist pwe repwe wisen chon pwäratä are repwe chök fiti apwapwaan ena fansoun mi lamot. (Jeremaia 33:11; Jon 3:29) Pwal ina chök ussun, eli pwal fitemön Chon Kraist repwe filatä pwe epwe kükkün pariin are kametipen apwüpwülü pwe esap watte liwinin me ewe kkoten anganga. Nge eli repwe akkota eü fansoun ar repwe chök ekis möngöfengen me ekkoch chiener. Ese lifilifil met sipwe filatä ren ena, nge sipwe weweiti pwe eli ekiekich epwe sokko seni ekiekin pwal fitemön Chon Kraist mi äsimaü.—Rom 14:3, 4.
5. Pwata chommong chon Kraist ra mochen pwe epwe wor eü afalafal ussun pwüpwülü lon ar apwüpwülü, me met masouan?
5 A lap me lein ekkan pea Chon Kraist ra kan filatä pwe epwe wor eü afalafal mi alongolong woon Paipel lon ar apwüpwülü.b Ra mirititi pwe Jiowa a poputäni pwüpwülü me a awora ffön mi mirit lon an we Kapas ren ifa ussun pwüpwülü epwe tongeni fisöch me atoto pwapwa. (Keneses 2:22-24; Mark 10:6-9; Efisus 5:22-33) Iwe, a lap ngeni ekkan pea ra mochen pwe chiener kewe Chon Kraist me märäriir kewe repwe fiti ena fansoun mi apwapwa. Iwe nge, epwe fet ekiekich ussun ekkewe sokkopaten allükün mwu, kokkot, me pwal mwo nge eörenien eü me eü fönü? Ei lesen epwe apworausa sokkofesennin apwüpwülü lon fönü mi sokkofesen. Eli epwe watte sokkofesennin ekkoch leir me minne ka silei ussun are minne chon fönüom ra kan föri. Iwe nge, kopwe tongeni ppii ekkoch kapasen alongolongun allük are pworaus mi lamot ngeni nöün Kot kewe chon angang.
Apwüpwülü Mi Wor Süfölün Epwe Fiti Pwüngün Allük
6, 7. Pwata sipwe ateneki ika a wor allükün mwu fän iten apwüpwülü, me ifa ussun sipwe affata pwe a ina ussun ekiekich?
6 Inaamwo ika Jiowa a poputäni pwüpwülü, nge a wor ekis än ekkan mwuun fönüfan nemenem woon föfförün ir kewe repwele pwüpwülü. A pwüng ena. Iei alon Jises “Oupwe ngeni Sisar mine än Sisar, nge oupwe ngeni Kot mine än Kot.” (Mark 12:17) Pwal ina chök ussun , iei än ewe aposel Paul ffön: “Aramas meinisin repwe aleasochisi nöüwisen ewe mwü mi nemeniir. Pun esap wor ar nemenem are Kot esap mwütätä ngeniir, nge Kot a ngeni ekewe nöüwis wiser pwe repwe nemenem.”—Rom 13:1; Taitos 3:1.
7 Lon lape ngeni ekkan fönü, Sisar, are ewe mwu, a kan affata ika iö kewe ra tufichin pwüpwülü. Ina minne, ika rüüemön Chon Kraist mi wor ar mumutä me ren Paipel repwe filatä pwe repwe pwüpwülü, iwe, repwe achocho le apwönüetä allükün mwuur. Eli wiser ar repwe angei laisen, repwe kütta emön sou apwüpwülü mi mumutä me ren ewe Mwu, iwe, eli repwe pwal rechisterini ar pwüpwülü. Lupwen Sisar Akostos a allükü pwe epwe wor eü “makken it,” Meri me Josef ra apwönüetä ena allük, ren ar säi ngeni Petleem pwe epwe “mak iter.”—Luk 2:1-5.
8. Ifa ükükün pöchökkülen ewe ririin pwüpwülü, me menni kokkot lein Chon Pwäratä Jiowa a affata ei mettoch?
8 Lupwen apwüpwülüün rüüemön Chon Kraist a tipeeü ngeni allükün mwuun me a pwüng, ar pwüpwülü a anükünük mwen mesen Kot. Ina minne, Chon Pwäratä Jiowa rese kan föri ar apwüpwülü fän fite fän allükün mwu me rese pwal apasasefälli ar pwonen apwüpwülü, awewe chök lon ewe rüwe me animuen are animeen ierin ar pwüpwülü. (Mattu 5:37) (Ekkoch lamalam rese tipeeü ngeni än aramas pwüpwülü fän pwüngün allükün mwuun chök, pun ra apasa pwe ika emön patere are sounpetäk ese efeiöchüür are apwüpwülüer, iwe, rese wesewesen pwüpwülü.) Lon chommong fönü, ewe mwu a awisa ngeni ekkan elter lon pekin Chon Pwäratä Jiowa pwe repwe wisen apwüpwülüa aramas. Ika pwe mi tufich ena, neman repwe föri ena mettoch fitifengen me ar eäni eü afalafal ussun pwüpwülü lon ewe Kingdom Hall. Ina ewe leenien fel mi enlet me eü leeni mi fichiiti an epwe wor eü afalafal ussun ena kokkot pun a popu seni Jiowa Kot.
9. (a) Ika rüüemön Chon Kraist repwe pwüpwülü lon ofesin mwu, met sokkun kokkot repwe tongeni filatä? (b) Epwe ifa ussun an epwe tongeni wor wisen ekkewe elter lon ena sokkun kokkotun apwüpwülü?
9 Lon pwal fitu fönü, allükün mwu a apasa pwe aramas repwe pwüpwülü lon eü ofesin mwu are mwen mesen emön chon angangen mwu mi wisen apwüpwülüa aramas. Fän chommong Chon Kraist ra kan filatä pwe epwe wor eü afalafal ussun pwüpwülü lon ewe Kingdom Hall lon ewe chök ränin ar apwüpwülü fän allükün mwuun are lon ewe rän mwirin. (Rese mochen epwe ttam ewe fansoun lefilen ewe apwüpwülü lon ofesin mwu me ewe afalafal seni Paipel, pun ir pwüpwülü mwen mesen Kot me aramas, pachelong ewe mwichefelin Kraist.) Ika rüüemön mi filatä pwe repwe pwüpwülü lon ofesin mwu ra mochen pwe epwe wor eü afalafal lon eü Kingdom Hall mwirin, repwe akkom angei ar mumu seni ekkewe elter lon ewe Congregation Service Committee. Ekkena elter repwe akkom ppii ika chokkana ra itöch, nge mwirin, repwe pwal ppii ika ewe fansoun apwüpwülü esap atai kokkotun ekkewe mwich lon ena leenien mwich. (1 Korint 14:33, 40) Repwe pwal ppii ekkewe mettoch mi mmolnetä lon ena leenien mwich ekkewe rüüemön ra tingor, iwe, repwe apwüngalo ika epwe wor kapasen esilesil ussun äeään.
10. Ika ewe apwüpwülü epwe akkom fis lon ofesin mwu, ifa ussun ei mettoch epwe kkü ewe afalafal ussun pwüpwülü mwirin?
10 Ekkan elter mi wisen eäni ewe afalafal ussun pwüpwülü repwe achocho le anapanapa ar pworaus pwe epwe eü minen apwapwa ngeni chon aüseling, apöchökküleretä lon pekin ngün, me epwe wor süfölün. Ika ewe pea a akkom eäni ewe sokkun apwüpwülü lon ofesin mwu, ewe elter epwe affata pwe ra fen pwüpwülü fän pwüngün allükün Sisar. Ika rese fen apasa ar pwonfengen lon ar we apwüpwülü lon ofesin mwu, eli repwe mochen föri ena le atun ewe afalafal.c Ika ra fen pwonfengen atun ar apwüpwülü lon ofesin mwu, nge ekkena chon pwüpwülü sefö ra mochen apasa ar pwonfengen mwen mesen Jiowa me ewe mwichefel, ititin ar kapas epwe affata pwe ra fen pwonfengen me mwan, weween, ra fen “iokfengen.”—Mattu 19:6; 22:21.
11. Lon ekkoch fönü, a kan ifa ussun än aramas apwüpwülü, me epwe ifa ussun an epwe kkü ewe afalafal ussun pwüpwülü?
11 Lon ekkoch leeni, eli esap wor eü allükün mwu epwe erä pwe epwe wesewesen wor eü kkotun apwüpwülü, pwal mwo nge mwen mesen emön chon angangen mwu. A fis apwüpwülüün rüüemön lon ewe fansoun ar repwe ngeni emön nöüwisen mwu ewe taropween rechisterin apwüpwülü mi fen sain. Mwirin, epwe rechister echö taropween apwüpwülü. Epwe ina ussun aramas repwe weweiti pwe ei pea iei, ra wesewesen pwüpwülü, me ina ränin ar apwüpwülü. Ussun sia fen küna me asan, eli aramas mi pwüpwülü lon ena sokkun napanap ra mochen an epwe mwittir fis eü afalafal mi longolong woon Paipel lon ewe Kingdom Hall. Ewe brother mi wisen afalafal, emön mi äsimaü lon pekin ngün, epwe esile ngeni meinisin pwe ei pea ra fen pwüpwülü pokiten an we a kerän wes ar rechister. Än ekkewe rüüemön pwonfengen epwe tipeeü ngeni minne a mak lon wokisin 10 me ewe footnote mi mak fan. Meinisin lon ewe Kingdom Hall repwe fiti chengelin ewe pea me küna feiöch seni ewe ffön seni än Kot we Kapas.—Än Salomon Köl 3:11.
Apwüpwülü Fän Eöreni me Fän Allükün Mwu
12. Met weween apwüpwülü fän eöreni, me sia kan pesei chokkewe mi eäni ena sokkun apwüpwülü ar repwe fet mwirin ewe fansoun apwüpwülü?
12 Lon ekkoch fönü, aramas ra kan pwüpwülü fän eöreni. Esap weween pwe ra chök nonnomfengen, esap pwal weween pwe ra eäni ewe sokkun pwüpwülü mi wor ekis itöchün lein aramas, nge rese wesewesen pwüpwülü fän pwüngün allük.d Nge sia kapas ussun ewe sokkun pwüpwülü aramas ra kan eäni pokiten ina eörenien ar einang are fönüer. Ika epwe unusen kamötiu liwinin ewe fin apwüpwülü, me ewe eü pekin epwe tipeeü ngeni me angei liwinin na, iwe, ren ena föfför, ra pwüpwülü fän pwüngün allük me pwüngün Paipel. Me ren ewe mwu, a pwüng ena sokkun pwüpwülü fän eöreni, iwe, a pwal tipeeü ngeni allükün mwu, me a anükünük. Mwirin, ekkewe pwüpwülü repwe tufichin makkei are rechisterini ar apwüpwülü fän eöreni, iwe, mwirin ena, repwe nöüni echö taropween apwüpwülü seni ewe mwu. Ar rechister epwe tongeni awora tümün fän iter are ren ewe fefin ika pwülüwan we epwe mä seni, iwe, pwal ren nöür kewe ika ir mi nöünöü. Ewe mwichefel epwe pesei chokkewe mi eäni ena sokkun apwüpwülü fän eöreni pwe repwe mwittir rechisterini. Sia küna pwe fän ewe Allükün Moses, ra rechisterini än aramas apwüpwülü me uputiuer.—Mattu 1:1-16.
13. Mwirin eü apwüpwülü fän eöreni, met epwe fichiiti ewe afalafal ussun pwüpwülü?
13 Eü pea mi ririfengen fän pwüngün allük lon ena sokkun kokkot fän eöreni ra kerän wesewesen pwüpwülü lon ewe ränin apwüpwülü. Ussun sia küna me asan, eli Chon Kraist mi eäni ena sokkun apwüpwülü repwe ekiekin akkota pwe epwe wor eü afalafal ussun pwüpwülü fitifengen me ar eäni kapasen pwonfengen lon ewe Kingdom Hall. Ika epwe ina, ewe chon afalafal epwe affata pwe ei pea ra fen pwüpwülü me mwan fän pwüngün allükün Sisar. Epwe wor eü chök ena sokkun afalafal. A wor eü chök apwüpwülü, weween, ewe mi tipeeü ngeni pwüngün allük lon pekin eöreni, me eü chök afalafal seni Paipel. Ika esap towaufesen pwönütään ekkena ruu mettoch, nge äkkäeüin, ika repwe fis lon eü chök rän, iwe, epwe lapolo än aramas süföliti än chon Kraist pwüpwülü lon leenier.
14. Met Chon Kraist repwe tongeni föri ika epwe tufich ar repwe eäni ruu sokkun apwüpwülü, eü fän eöreni me eü lon ofesin mwuun?
14 Lon ekkoch fönü, ikewe apwüpwülü fän eöreni a tipeeü ngeni pwüngün allük ie, a pwal wor apwüpwülü lon ofesin mwu. Apwüpwülü lon ofesin mwu a kan fis mwen mesen emön chon angangen mwu, iwe, eli epwe kapachelong än ekkewe pwüpwülü apasa ar we kapasen pwonfengen me ar sainnei iter lon eü puken rechister. Ekkoch Chon Kraist ra efich ena apwüpwülü lon ofesin mwu mwen ewe apwüpwülü fän eöreni. Esor popun epwe wor ir me ruu pun ir me ruu ra pwüng lon pekin allük. Minne a mak lon wokisin 9 me 10 ussun eü afalafal fän iten pwüpwülü me kapasen pwonfengen a pwal weneiti ena sokkun apwüpwülü. A äkkäeüin lamot pwe ewe pea epwe eäni ewe sokkun apwüpwülü mi wor süfölün mwen mesen Kot me aramas.—Luk 20:25; 1 Piter 2:13, 14.
Epwe Wor Süföl lon Pwüpwülü Fansoun Meinisin
15, 16. Ifa ussun ewe mettoch süföl epwe pacheri pwüpwülü?
15 Lupwen a wor och osukosuk lon apwüpwülüün emön kingen Persia, emön sou ffön itan Memukan a uwawu och ffön mi tongeni amürinnölo manauen aramas—weween, a erä pwe ‘meinisin fefin repwe meniniti pwülüer.’ (Ester 1:20) Lon än chon Kraist pwüpwülü, sap minne epwe lamot än emön king föratiu ena allük; nge ekkan fefin ra kan pükün mochen asamolu pwülüwer. Iwe, pwal ussun chök, ekkan mwän mi pwüpwülü ra kan süföliti me mwareiti pwülüwer. (Än Salomon Fos 31:11, 30; 1 Piter 3:7) Pwäratään süföl lon ach pwüpwülü esap itä fis mwirin fite, fite ier. Ürürün epwe chök pwälo me le poputään, ewer, seni ewe ränin apwüpwülü feffeilo.
16 Lon ewe ränin apwüpwülü, sap minne ewe mwän me fefin chök—weween, ekkewe ruuemön mi pwüpwülü—repwe pwäratä süföl. Ika emön elter epwe wisen afalafal ussun pwüpwülü, ena afalafal epwe pwal wor süfölün. Ena afalafal epwe weneiti ewe pea. Ren an epwe süfölitiir, ewe chon afalafal esap eäni kapas urumot are tutunlap. Esap kapas ussun ekkewe sokkun mettoch mi tongeni äsäüa ewe pea are ekkewe mi aüseling. Nge epwe achocho ngeni an epwe apwapwai me apöchökküla meinisin, iwe, epwe atekiatäi ewe Chon Poputäni pwüpwülü me an ffön mi sokkolo aüchean. Ewer, än ewe elter afalafal mi wor süfölün epwe eü minen älillis fän iten ewe sokkun apwüpwülü mi asamolu Jiowa Kot.
17. Pwata allükün mwu a kan pacheri än Chon Kraist apwüpwülü?
17 Neman ka fen küna lon ei lesen chommong pworaus ussun pwüpwülü mi fiti pwüngün allük. Eli ekkoch ekkena pworaus resap weneiti leeniom are fönüom. Iwe nge, wisen oukich meinisin ach sipwe weweiti nge a fokkun lamot pwe kokkotun apwüpwülü lein Chon Pwäratä Jiowa epwe süföliti allükün mwuun are minne Sisar a affata. (Luk 20:25) Iei än Paul ffön ngenikich: “Oupwe ngeni ekei aramas mine oupwe wisen ngeniir. Oupwe mönätiu ämi takises me ekewe sokopaten takises ngeni chokewe ra wisen angei takises senikemi, . . . oupwe asamolu ekewe aramas a wor sufölüür.” (Rom 13:7) Ewer, a pwüng pwe Chon Kraist repwe asamolu ewe kokkot Kot a föratiu fän iten ach ei fansoun, poputä seni ewe ränin apwüpwülü.
18. Ifa pwal eü mettoch epwe tongeni fis fän iten apwüpwülü nge mi lamot ach sipwe äteneki, me ia sipwe küna me ia pworausan?
18 Fän chommong a wor minen apwapwa mwirin än Chon Kraist apwüpwülü—weween, kametipen are möngöön apwüpwülü. Chechchemeni mwo pwe Jises a fiti eü ena sokkun kametip. Ika epwe wor ena sokkun pari, ifa ussun ffön seni Paipel epwe tongeni älisikich pwe ena pari epwe pwal enletin asamolu Kot me aitöchü ekkewe chon pwüpwülü sefö me ewe mwichefelin Kraist? Sipwap käeö ena mettoch lon ena eü lesen mwirin ei.
[Footnote]
a Ina ewe chök kapas epwe tongeni mak ren eü kametip esap fis fän iten eü apwüpwülü.—Ester 9:22, Septuagint.
b Chon Pwäratä Jiowa ra kan äeä eü afalafal ussun pwüpwülü ükükün ttaman 30 minich, nge iei itelapan, “Pwüpwülü mi Wor Süfölün Mwen Mesen Kot.” Ena afalafal a longolong woon ewe ffön mi echipwör e mak lon ewe puk The Secret of Family Happiness (Ewe Al mi Emmwen ngeni Pwapwaan Famili) me pwal fitu puk förien Chon Pwäratä Jiowa. Ena afalafal epwe älisi ewe pean pwüpwülü me meinisin mi fiti ewe apwüpwülü.
c Ikkeei ekkewe pwonen pwüpwülü mi asamolu Kot sia kan äeä, chilon chök ika allükün mwu a affatatiu pwal och sokkun. Iei alon ewe mwän apwüpwülü: “Ngang [iten ewe mwän apwüpwülü] ua angeuk [iten ewe fin apwüpwülü] pwe kopwe chon etiei lon ewe ririin pwüpwülü, iwe, upwe tongeök me aücheanuk me ren ewe allük mi fel e mak lon ewe Paipel mi fel fän iten re Kraist mi pwüpwülü, ükükün fansoun sipwe manaufengen woon fönüfan me ren än Kot we kokkotun pwüpwülü.” Iei alon ewe fin apwüpwülü: “Ngang [iten ewe fin apwüpwülü] ua angeuk [iten ewe mwän apwüpwülü] pwe kopwe chon etiei lon ewe ririin pwüpwülü, iwe, upwe tongeök me aücheanuk me süfölituk me ren ewe allük mi fel e mak lon ewe Paipel mi fel fän iten Chon Kraist mi pwüpwülü, ükükün fansoun sipwe manaufengen woon fönüfan me ren än Kot we kokkotun pwüpwülü.”
d A mak lon The Watchtower, minen May 1, 1962, pekin taropwe 287, pworausen än aramas nonnomfengen chök, nge rese wesewesen pwüpwülü.
En Mi Chechchemeni?
• Pwata sipwe äteneki ekkan allükün mwu me allükün Paipel mi weneiti apwüpwülü?
• Ika rüüemön Chon Kraist repwe pwüpwülü lon ofesin mwu, repwe tongeni filatä an epwe wor met ekiselo mwirin?
•Pwata ekkan afalafal ussun pwüpwülü ra kan fis lon ewe Kingdom Hall?
[Lios lon pekin taropwe 24]
Lon än chon Israel apwüpwülü loom loom, ewe mwän apwüpwülü a kan aweina ngeni imwan are imwen seman ewe fin apwüpwülü
[Lios lon pekin taropwe 25]
Mwirin ar eäni ewe sokkun apwüpwülü fän eöreni, eli Chon Kraist ra mochen akkota pwe epwe wor eü afalafal lon ewe Kingdom Hall