Äeüin Napanap

Tongei Aramas, Nge Esap Tongei Moni me Pisek

IFA ALON EWE PAIPEL? “Pun mochenian moni iei popun sokopaten ngau meinisin.”​—1 Timoti 6:10.

IFA EWE MINEN EPPET? Ekkewe chon sitowa ra efisi ach sisap menei minne mi wor rech. Ra mochen sipwe chök akkangang me awatteelo nöüch moni pwe sipwe tongeni kamö mineföön pisek mi mürinnö. A mecheres ach sipwe alamota me tongei moni. Iwe nge, Paipel a öüröürakich pwe emön mi mochen pisekisekilo esap fokkun tongeni menemenöch. Iei makkeien King Salomon: “Eman mi efich moni esap menemenöch ren an moni tolong, nge eman mi efich wöü esap pwal menei mine a tori.”​—Än Salomon Afalafal 5:10.

MET KOPWE TONGENI FÖRI? Äppirü Jises ren an tongei aramas lap seni pisek. A tipemecheres le fangolo meinisin minne a nom ren, pwal mwo nge manauan pokiten a tongei aramas. (Jon 15:13) Iei alon: “Sia feiöch ren ach fang lap seni ach angei mettoch.” (Fof. 20:35) Ika sia fen eörenalo le fangolo ach fansoun me tufich fän iten aramas, iwe, repwe pwal fangoto ngenikich. Jises a apasa: “Oupwe fangelo, o repwe fangoto ngenikemi.” (Luk 6:38, TF) Chokkewe mi chechchei moni me pisek ra aworato wor chommong riäfföü. (1 Timoti 6:9, 10) Nge menemenöch mi enlet a pop seni ach tongei aramas me än aramas tongekich.

Pwata kese etittina ika en mi tongeni amecheresi nonnomun manauom? Ka tongeni akükkünalo minne a nom reom are ekkewe mettoch ka mochen eäni? Ika ka föri ena, kopwe küna pwe epwe wor om fansoun me pöchökkül le föri ekkewe mettoch mi kon lamot seni meinisin ren om äkkälisi aramas me akkangang ngeni Kot, ewe A awora ngonuk mettoch meinisin.​—Mattu 6:24; Fofor 17:28.

[Sasing lon pekin taropwe 4]

“Oupwe fangelo, o repwe fangoto ngenikemi”