“Ka Tongeni Pölüeni?”
1. Menni lapalap mi aweires ngenikich sia küna?
1 Ka pwapwaiti än Kot we Kapas nge a weires ngonuk om kopwe chechchemeni titchikin pworausen lon are ia ekkoch kapas mi weneiti och pworaus ra mak ie me lon ekkewe Wokisin? Ka mochen pwe noum kewe semirit repwe wewefichiti ekkewe pworaus mi mecheres me mi pwüng me ekkewe afalafal lon Paipel? Ewe kinikin mi affata ewe lapalap “Ka Tongeni Pölüeni?” me lon Awake! mi kan peres iteiten maram, lon pekin taropwe 31, epwe tongeni älisi ekkewe kükkün me watte ren ar repwe silefichi än Kot we Kapas.—Fof. 17:11.
2. Ifa ussun ekkewe sokkopaten kinikinin ‘Ka Tongeni Pölüeni?’ epwe älisuk?
2 Ifa ussun kopwe fokkun alamota ei lapalap lon ei chassi? Kapiin ewe Awake!, minen January 2006, a awora ekkeei tettelin memmeef: “Awora ekis fansoun om kopwe nennengeni ewe pekin taropwe 31. . . Ekkoch kinikinin lon repwe apwapwa ngeni ekkewe chon älleä, ir säräfö; ekkoch kinikin repwe tesini me amwökütü ekiekin ekkewe chon käeö mi feffeitä. Ewe kinikin ‘Ineet Ra Fisitä Ekkeei Mettoch lon Uruwo?’ epwe älisuk om kopwe silei tefen ewe fansoun ekkewe aramas lon Paipel loom ra manau me ineet a fis ekkewe mettoch. Pölüen ekkeei kapas eis lon ei kinikin ‘Seni ei Kapi’ ra nom lepoputään tori lesopwoloon ei chassi, nge pölüen ekkoch lape ngeni repwe pwä woon ewe pekin taropwe mi affatetiu, nge ir mi soretiu. Pwata kese mwo küttaöchü pölüan kewe me mwen kopwe nengeni pwüngün kewe me äeäfengen ekkena mettoch ka käeö? Ka tongeni äeä ei mineföön lapalap ‘Ka Tongeni Pölüeni?’ an epwe fis pwe eü longolongun om famili käeö are epwe eü minen pwoppworausfengen me pwal ekkoch.”
3. Ifa ussun ekkoch famili ra alamota ei lapalap, iwe, menni kinikin ka fokkun pwapwaiti?
3 Pwüngün, chommong famili ra pwapwa le äeä ei lapalap pwe epwe fis pwe longolongun ar we famili käeö. Emön inelap a makkei: “Ngang me pwülüwei we äm aua ekieki pwe epwe mürinnö äm aupwe apachalong lon äm famili käeö ewe kinikin ‘Än Semirit Kütta Lios’ pwe epwe eü minen apwapwa ngeni nöüm we nengngin ülüngät ierin. A mmen fokkun apwapwa ach küna neminewe an a meseik le suuki pwisin nöün we chassi me nengeni meinisin ekkewe pekin taropwe tori an a küna met a kükkütta.” Emön sam lon Brazil a apasa: “Ngang me nei we ät, fisu ierin, äm aua sani ei lapalap lon ei Awake!. A älisi Moises an epwe aüselingöch, an epwe kütta ekkewe wokisin lon Paipel, an epwe weweiti weween ekkewe lios, me an epwe weweiti ekkewe ier me pwinin maram.” Ashley, walü ierin, a makkei: “Kilisou ngenikemi ren ewe lapalap le sopwoloon ewe Awake!, ‘Ka Tongeni Pölüeni?’. Ua käeö chommong mettoch ussun ewe Paipel seni ei lapalap.”
4. Ifa ussun eü famili epwe tongeni äeä ei lapalap an epwe kapachelong lon ar famili käeö?
4 Pwata kese sotuni le äeä ei lapalap ‘Ka Tongeni Pölüeni?’ fän ekkoch lon ämi we famili käeö? Ka tongeni nöünöü ewe Index are Watchtower Library lon CD-ROM le kütta pölüen ekkoch kapas eis mi weires. Ren om föri ina ussun, ka kan äiti ngeni noum kewe ifa ussun repwe kütta och pworaus. Ika mei wor noum kewe mi watte, en mi tongeni awisa ngeniir ewe a ekis weires ar repwe pölüeni “Ngang Iö?” are “Ineet Ra Fisitä Ekkeei Mettoch lon Ürüwö?” me mwen ämi we famili käeö? Mwirin, repwe tongeni apworausa met ra küna seni ar kütta ekkewe pworaus atun ämi we käeö. Ren nöünöüöchün ei pekin taropwe, iei eü lapalap ekkewe sam me in repwe fotukalong lon letipen nöür kewe ewe kapasen Kot, epwe pwal älisiir ar repwe silei ussun ekkewe ‘taropwe mi fel’ seni chök me le kükkünür.—2 Tim. 3:15; Tut. 6:7.