Pwata Sipwe Chök Lilliwin
1. Met sokkun kapas eis a piitä mi weneiti ach angangen afalafal?
1 Lon chommong leeni, sia akkawesi ach territory iteitan. Sipwe chök lilliwiniti ekkena imw, inaamwo ika ewe chon imw a erenikich pwe ese mochen aüseling. Pwata sipwe chök foffos ngeni ekkena aramas rese etiwakich akkom?
2. Ifa ewe äkkäeüin popun sia likiitü lon ewe angangen afalafal?
2 Tong Ngeni Jiowa Me Aramas: Äkkäeüin popun sia likiitü lon ewe angangen afalafal pun ina ach tong ngeni Jiowa. Letipach a achüngükich ach sipwe akapworausa ngeni aramas ussun ach Kot mi lapalap. (Luk 6:45) Ach tong ngeni Jiowa a amwökütükich ach sipwe älleäsochisi än kewe allük pwal älisi ekkoch ar repwe pwal älleäsochis. (SalF. 27:11; 1 Jon 5:3) Ach likiitü lon ei angang ese alongolong woon än aramas etiwakich are rese. Inaamwo ika ra küna riäfföü-mwääl, ekkewe Chon Kraist loom ra sopwelo le akkafalafal, rese “ukutiu.” (Fofor 5:42) Lupwen aramas rese mochen aüseling, sisap letipengaü ren nge sipwe chök uppos, pun ina ussun sia ännetatä ach tong mi alolloon me ach tuppwöl ngeni Jiowa.
3. Met epwe älisikich ach sipwe sopwelo le akkafalafal?
3 Sia pwal likiitü pun sia tongei chon oruch. (Luk 10:27) Jiowa ese mochen pwe emön epwe pöütmwäälilo. (2 Pit. 3:9) Sia chüen küna aramas mi mochen angang ngeni Jiowa pwal mwo nge lon ekkewe territory sia akkawesi iteitan. Awewe chök, lon Guadeloupe, ikkewe ie 1 seni iteiten 56 aramas woon ena fönü i emön Chon Pwäratä Jiowa, 214 ra papatais lon ewe ier a lo. Arapakkan 20,000 ra fiti ewe ächechchem, weween pwe 1 seni iteiten 22 aramas woon ena fönü ra fiti!
4. Ifa ussun sia kan chuuri sokkopaten aramas lon ach territory?
4 Ra Sissiwil Chon Ekkewe Imw: A wor sokkopaten aramas sia kan chuuri lon imwer lupwen sia feilo afalafal lon ach territory. Lupwen sia liwiniti imwen ewe emön ese etiwakich me mwan, nge sia chuuri pwal ese mwo piin rongorong ewe pworaus, nge ena emön a etiwakich, a mochen aüseling ewe pworaus. Are sia pwal tongeni chuuri emön a kerän nonnom nge mi mochen etiwakich. Sia pwal tongeni sereni ekkewe nau semer me iner ra oput ewe pworaus allim me loom nge iei ra fen määritä me sü seni semer me iner kewe. Ekkena ra tongeni pwapwaiti le aüselinga pworausen ewe Mwu.
5. Met a tongeni amwökütü aramas ar repwe mochen aüselingakich?
5 Aramas ra pwal tongeni siwili manauer. Me loom, ewe aposel Paul i emön chon “kapasingaü,” chon “ariaföüü o turunufaseei” Kraist. (1 Tim. 1:13) Pwal ussun chök ikenäi, chommong chon angang ngeni Jiowa rese pwapwaiti ewe enlet me loom. Eli, ekkoch ra fen pwal mwo nge ü ngeni ewe kapas allim. Pokiten a siwil napanapen ei fönüfan, ekkoch chon eppeti ika chokkewe rese mochen etiwakich me mwan repwele aüselingakich. Pwal ekkoch ra mochen etiwakich mwirin an a fis ngeniir och osukosuk lon manauer, ussun chowean mäloon emön lon ar famili, ra towu seni ar angang, osukosuken moni are osukosuken inisiir.
6. Pwata sipwe sopwelo le akkafalafal fiti mwasangasang?
6 Ei otot mi ngaü epwele muchulo, nge ach ei angangen afalafal me asukul a atapwalapwalelo. (Ais. 60:22) Ina minne, sipwe sopwelo le akkafalafal fiti mwasangasang pwal amwochu eü ekiek mi pwüng ussun ei angang. Ewe emön sipwe chuuri mwirin epwe tongeni aüseling ewe pworaus. Sipwe chök likitü le akkafalafal! ‘Ren ach fori iei ussun sia amanaua pwisin kich o pwal ekkewe mi auseling ngeni kich.’—1 Tim. 4:16