Sisap Ükütiw le Afalafal
1 Fän ekkoch, eli sipwe meefi pwe sia fen ekkenniwil le afalafal lon ach kewe leenien afalafal, nge ekkewe aramas rese kon lien etiwakich. Iwe nge, mei wor chommong popun ach sipwe chök sopwelo le afalafal.—Mt. 28:19, 20.
2 Eü Minen Pwäratä: Jises a fen oesini pwe ewe angangen afalafala ewe kapas allim epwe eü kinikinin esissillen “sopolon ei fansoun” pwe epwe “eu minen pwäratä ngeni aramas meinisin.” (Mt. 24:3, 14) A eü watteen minen pwäratä ngeni aramas lupwen ra nennengeni kich atun sia fiti ewe angangen afalafal. Mwirin ach lo seni ewe leeni, eli chommong aramas repwe chüen foffosfengen ussun ach chuuriir, inaamwo ika rese fen etiwakich. Ach aücheani populapen ach fiti ewe angangen afalafal epwe älisikich le likiitü lon ach angang. Sia apwapwaai Jiowa atun sia fiti ei angang mi apwönüetä ewe oesini lon Paipel ren ach pwäratä me esilefeili ewe kapasen öüröür ngeni aramas.—2 Tes. 1:6-9.
3 Mi Lamot Likiitü: Pokiten chommongun ekkewe minen erikalo aramas me chommong mettoch mi asolapa än aramas fansoun, mi lamot ach sipwe likiitü lupwen sia achocho le alapalo än aramas pwapwaiti ewe pworaus. Ekkewe Chon Pwäratä ra chuchchuuri emön fefin iteiten wiik, iwe, mwirin ükükün eü ier, epwap kerän etiwer lon imwan we pwe repwe pworausfengen woon ewe Paipel. Neminnewe a fokkun sani met a rongorong, iwe, a poputä le käeö ewe Paipel, fiffiti mwich, me mwirin, a apasa pwe a mochen pwe epwe papatais.
4 Napanapen ei fönüfan a chök mwittir sissiwil, iwe, pwal ina chök ussun ren nonnomun me ekiekin aramas. Chommong ekkewe aramas rese fen etiwakich me mwan, nge eli iei, repwe le lefareni ewe epilükülük sia atoura ngeniir. Inaamwo ika emön chök epwe etiwa pworausen ewe Mwu, iwe, mi fen wor lamoten ach sipwe likiitü.
5 Lon unusen fönüfan, chommong aramas ra “letipeta o kechü ren ekkewe föför mi anioput ra fis.” (Is. 9:4) Uwaan ach angangen afalafal a ännetatä pwe chokkewe mi letip wenechar ra etiwa ewe pworaus ussun ewe Mwu. (Ais. 2:2, 3) Ina popun, sipwe sopwelo ach tinikken le afalafal ren ach likiitü le “arongafeili kinamwe o uwato kapasen feiöch.”—Ais. 52:7; Fof. 5:42.