Ifa Ussun Repwe Rongorong?
1. Met popun ach angangen afalafal epwe tongeni weires me pwata sipwe chüen sopwelo?
1 Pokiten ränin Jiowa we a arapoto, mi atapwalapwal fän iten chommong aramas ar repwe käeö ewe sile mi enlet ussun Kot me an kokkot fän iten fönüfan. (Jon 17:3; 2 Pit. 3:9, 10) Fän ekkoch a weires ach angang pun chommong ra tenechepwäk are ra esiita ach angangen afalafal. (2 Pit. 3:3, 4) Iwe nge, sipwe tongeni lükü pwe mei chüen wor aramas lon leenien ach afalafal repwe etiwa ewe kapas allim lupwen ra rongorong. Nge ifa ussun ar repwe tongeni rongorong, ika esap wor emön a esile ngeniir?—Rom 10:14, 15.
2. Ifa ussun än aposel Paul leenien äppirü a apöchökkülakich?
2 Likiitü fän Koput: Mi lamot sisap ükkütiu lon ach angang fän iten ekkewe mi chüen mochen rongorong pworausen ewe Mwu. Filipai ewe äeüin telinimw lon Iurop a rongorong än aposel Paul afalafala ewe kapas allim. Lupwen ra tipimwääl ngeni Paul me Silas, ra wichiir me atururelong lon kalapus. (Fof. 16:16-24) Inaamwo ika Paul a küna watte riäfföü nge ese niuokkus me kaülo. Mwirin chök ena a chuuri ewe mwichefelin Tesalonika nge, ‘Kot a ngeniir pwora.’ (1 Tes. 2:2) Än Paul leenien appiru a awora eü popun ach “sisap achanü.”—Kal. 6:9.
3. Met a tongeni efisi akkasiwilin letipen ekkoch, ekkewe rese akkomw etiwa ewe pworaus allim?
3 Chommong rese etiwa ewe pworaus allim lon fite ier, nge iei a siwil letiper. Osukosuken moni, semwen, mäloon attonger, are pworaus mi alolilen woon fönüfan a efisi ena akkasiwil. (1 Kor. 7:31) Ekkoch nau, semer me iner ra oput ewe pworaus, nge lupwen ekkena semirit ra wattetä iwe, ra pwisin mochen aüseling. Ach sopwelo le afalafal epwe suuki ewe al ren ekkoch ar repwe “köri iten ewe Samol,” mwen warotoon ewe sopwoloon.—Rom 10:13.
4. Met a amwökütükich le “sopwela” lon ach angangen afalafal?
4 Sipwe “Sopwela”: Ach tong ngeni Kot me chon oruch epwe amwökütükich le “sopwela” lon ach angangen afalafal me föralo chon käeö ussun ekkewe aposel. (Fof. 5:42) Ikenäi chommong ra “letipeta o kechü ren ekewe föför mi anioput” a fiffis iei. (Is. 9:4) A ifa me mürinnöön ewe äpilükülük me ngaselo a tori iir kewe ra rongorong ewe kapas allim! Inaamwo ika lap ngeni aramas rese mochen aüseling nge ewe Paipel a alükülüküükich pwe Jiowa a fokkun pwapwaiti ach achocho.—Ipru 13:15, 16.