Pworun Kapas Eis

◼ Iö epwe wisen amasoua ewe taropween tingor mi kawor lon nöüch kewe puk me woon ewe Internet?

Fän chommong a nom lon nöüch kewe puk ekkewe taropween tingor, aramas ra tongeni amasoua me tiinaalo ngeni ewe keangen ofesilap ika ra mochen emön Chon Pwäraatä Jiowa epwe chuuriir are nöüni nöüch kewe puk. Pwal och, lon ewe Internet, lon www.watchtower.org, ra tongeni tingor än emön epwe käeö ngeniir ewe Paipel. Ekkeei mettoch ra älisi chommong ar repwe silei ewe enlet. Iwe nge, a fis osukosuk lupwen pwich kewe ra äeä ekkeei minen älillis le tingor ar repwe tiinaalo nöüch puk are än emön Chon Pwäraatä Jiowa epwe chuuri aramaser are pwal ekkoch.

Ekkoch ra angei nöüch kewe puk mi titiito seni ewe keangen ofesilap nge rese fen amasoua ekkena minen tingor, iwe ra song pun ra ekieki pwe ach mwicheich a oumwesiir are äkkäeä ar address fän iten business. Ekkoch pwich ra lo chuuri ekkoch aramas pokiten ra angei ewe taropween tingor, nge ekkena aramas ra ekis song ngeniir pun rese fen amasoua ena taropween tingor ar repwe chuuriir. Ina minne, chokkewe mi mochen emön Chon Pwäraatä Jiowa epwe chuuriir are nöüni nöüch kewe puk repwe pwisin amasoua ewe taropween tingor lon nöüch kewe puk are woon Internet. Ekkewe Chon Pwäraatä Jiowa resap amasoua ekkena taropwe fän iten ekkoch. Fän chommong, ewe ofes esap etiwa eü tingor ika a fen esilla pwe emön chon afalafal a wisen tiinaalo ewe tingor fän iten pwal emön.

Iwe nge, ifa usun sipwe älisi emön märärich are chiechiach an epwe silei Kot? Ika ka mochen an epwe nöüni nöüch kewe puk, pwata kese pwisin liffang ngeni? Ika a apasa pwe a mochen emön Chon Pwäraatä epwe chuuri nge kese silei ia ekkewe elter lon ewe mwichefel lon ena leeni ra nonnom ie, iwe kopwe amasoua ewe taropween Please Follow Up (S-43) (Ouse Mochen Oupwe Chuuri) me ngeni ewe seketeri lon om we mwichefel. Iwe, epwe cheki me tiinaalo ngeni ewe keangen ofesilap. Iwe nge, ika ewe emön a nom lon kalapus, are lon pioing, kosap mak ngeni ewe keangen ofesilap fän itan, nge kopwe fen pesei an epwe pwisin fos ngeni ekkewe Chon Pwäraatä ra kan afalafal lon leenian we are pwisin mak ngeni ewe keangen ofesilap.