Pworun Kapas Eis
◼ Ikkefa án Paipel kewe kapasen emmwen a weneiti néúnéún cell phone atun sia fiti án Chón Kraist kewe mwich me fiti ewe angangen afalafal?
“Ren Mettoch Meinisin A Wor Ar Fansoun.” (SalAf. 3:1): Cell phone a atufichi aramas pwe repwe text are fós ngeni pwal emén ese lifilifil menni fansoun. Iwe nge, mi wor ekkóch atun ekkewe Chón Kraist rese mochen osukosuk ren néúr phone. Áwewe chék, atun ach kewe mwich pún ina ewe fansoun sia fel ngeni Jiowa, angei an kewe emmwen me pwapwaiti le apéchékkúlafengenikich. (Tut. 31:12; Kölf. 22:22; Rom 1:11, 12) Kich mi tongeni offeló néúch kewe phone atun sia wareiti ewe mwich nge mwirin sia ló seni mwich sipwap cheki? Ika sia ekieki pwe epwe wor och mettóch epwe weiweitá, iwe, a lamot néúch phone epwe on, nge féri chék pwe néúch phone esap aosukosuka ekkewe ekkóch.
‘Föri Ekei Mettoch Meinisin Fänäsengesin ewe Pworausen Manau.’ (1 Kor. 9:23): Fán ekkóch mi lamot sipwe néúnéú cell phone lón ewe angangen afalafal. Áwewe chék, pwich we a wisen emmweni ewe angangen afalafal eli epwe néúnéú le cheki ekkewe ra afalafal lón ekkewe ekkóch leenien afalafal. Fán ekkóch ekkewe chón afalafal repwe néúnéú cell phone le kékkéri emén mi mochen aúseling are chón káé Paipel me mwen repwe chuuri, ákkáeúin ika a towau leenier. Ika sia uwei néúch phone sipwe túmúnú pwe ete aosukosukakich atun sia fós ngeni ewe chón imw. (2 Kor. 6:3) Atun sia witi ekkewe ekkóch chón afalafal, esap pwe a fen éch ach sipwe nefótófót wóón ewe angangen afalafal me chókkewe sia angangfengen, lap seni ach sipwe kéri me text ngeni emén?
Ekieki Ekkewe Ekkóch. (1 Kor. 10:24; Fil. 2:4): Sise fókkun mochen ach sipwe mmangeiti ewe mwich fán iten ewe angangen afalafal pokiten sia ekieki pwe sipwap kékkéri are text ngeni ekkewe ekkóch pwe sipwe tongeni kúna ia ekkewe chón afalafal ra afalafal ie. Ika pwe sia mmangeiti ewe mwich, iwe, ewe kókkót a fen wes epwe fférsefál. Pwúngún pwe fán ekkóch epwe wor och mettóch epwe weiweitá iwe epwe ammangakicheló. Iwe nge, ika sia eéreni le mwittiriti ewe mwich, iwe, sia pwáraatá ach ekieki án Jiowa we kókkót, pwich we mi wisen emmweni ewe mwich me chienach kewe chón afalafal.