Néúnéún Mettóch mi Record Sipwe Aúseling
1. Me lúkún néúch kewe puk me tract met a pwal kawor?
1 Chómmóng ra pwapwaiti le tétá wóón jw.org pwe repwe álleani kapas mi enlet me múrinné. (SalAf. 12:10) Iwe nge, ka fen néúnéú ekkewe mettóch mi record sipwe aúseling? Ekkeei mettóch a atufichikich le aúseling chómmóng pwóróus wóón ach we website. Ifa usun ekkewe mettóch mi record sipwe aúseling ra álisikich?
2. Ifa usun sipwe tongeni néúnéú ekkewe mettóch mi record fán iten ach pwisin káé are famili fel?
2 Fán Iten Ach Pwisin Káé are Famili Fel: Ach aúseling ngeni ekkewe puken Paipel, puk are tract mi fen record ra tongeni álisikich le alamota ach fansoun atun sia sái are féri ekkewe angang sia féfféri iteitan. (Ef. 5:15, 16) Sipwe tongeni sissiwili napanapen ach famili fel ren ach nelong lón néúch puk atun sia aúseling ngeni ewe mettóch mi record. Ach néúnéú ekkewe mettóch mi record sipwe aúseling atun ach fansoun pwisin káé epwe fókkun álisikich ika sia mochen ámúrinnééló ach állea are ika sia káé pwal eú fós.
3. Ié kewe lón ach we leenien afalafal ra tongeni kúna álillis seni ekkewe mettóch mi record?
3 Fán Iten Angangen Afalafal: Ekkewe aramas lón ach we leenien afalafal mi meefi pwe ra fókkun osukosuk le állea eli repwe mochen rongorong ngeni ekkewe mettóch mi record. Are neman sia chuuri emén mi sókkóló an fós me eli a sani an epwe aúseling ngeni pwóróusen ewe Mwú lón ‘kapasen fanüan.’ (Föf. 2:6-8) Lón ekkóch fénú a mmen aúchea ewe mettóch aúseling. Áwewe chék, eérenien Hmong ar repwe apwóróusa uruwoor ngeni ekkewe mi kúkkún ieriir. Ra fókkun kamwéchúnnúk minne ra fen rongorong. Pwal chómmóng fénú lón Afrika ra pwapwa le káé seni chék ar aúseling tutulap.
4. Ifa usun sipwe tongeni álisi aramas lón ach we leenien afalafal?
4 Lón óm we leenien afalafal, itá epwe álilliséch ika kopwe ettiki eú mettóch mi record sipwe aúseling lón kapasen fénúen ewe chón imw? Itá emén epwe kúna álillis seni eú mettóch mi record sipwe aúseling, sia tiinaaló ngeni lón e-mail? Sipwe pwal tongeni download eú mettóch mi record wóón eféú CD me ngeni emén chón imw mi sani le aúseling fitifengen me ena puk are tract ka download. Iteiten ka tiinaaló unusen eú puk are tract ngeni emén wóón Internet, iwe kopwe apachaalong lón noum repot. A ffér ekkewe mettóch mi record sipwe aúseling fán iten ach pwisin káé me pwal fán iten ach fótuki ekkewe pwikilin enlet usun ewe Mwú.—1 Kor. 3:6.