Eáni Leenien Áppirú Ekkewe Soufós Usun Apakuk
1. Pwata sia tongeni meefieni meefien ewe soufós Apakuk?
1 Atun sia kúkkúna lallapólóón féfféringaw wóón unusen fénúfan, eli sipwe meefi usun meefien Apakuk, ewe mi eisini Jiowa: “Pwota ka föri pwe üa küna ei sokun weires? Pwota ka tongeni nenengeni ei sokun föför mi ngau?” (Ap. 1:3; 2 Tim. 3:1, 13) Ach ekilonei án Apakuk we pwóróus me an leenien áppirú mi múrinné epwe tongeni álisikich le likiitú atun sia witiwiti án Jiowa we ránin kapwúng.—2 Pet. 3:7.
2. Ifa usun sipwe pwáraatá pwe sia manaw ren lúkú ikenái?
2 Manaw ren Lúkú: Apakuk ese kon ekieki nónnómongawen ewe fansoun, nge a fen akkamwéchú an riri ngeni Kot me féfféri wisan we. (Ap. 2:1) Jiowa a alúkúlúkú ewe soufós pwe An we kapas epwe chék pwénútá lón fansoun mi affat me “ekewe chon pwüng repwe manau ren ar lükü.” (Ap. 2:2-4) Met weween ena ngeni Chón Kraist mi manaw lón ewe fansoun sópwólóón? Ach lúkúlúk pwe ewe sópwólóón epwe feito a kon lamot lap seni ach silei ineet ewe sópwólóón epwe feito. Lúkú a amwékútúkich ach sipwe mammasa me akkomwa ewe angangen afalafal.—Ipru 10:38, 39.
3. Pwata a lamot sipwe akkamwéchú ach pwapwa lón ach angang ngeni Jiowa?
3 Meseikeiti Jiowa: Ach lúkú epwe kúna sóssót atun Kok me Makok epwe tééki néún Jiowa kewe aramas. (Is. 38:2, 10-12) Maun a wato riáfféú pwal mwo nge ngeni ekkewe ra win. Eli epwe wor nafangawen mwéngé, mettóchur kewe ra tongeni péútúló, me núkúnúkéchún manawer a tongeni ngawóló. Ika epwe ina usun, met sipwe féri? Apakuk a fen silei pwe epwe kúna weires ina popun a apposa pwe epwe akkamwéchú an pwapwa lón an angang ngeni Jiowa. (Ap. 3:16-19) “Ewe pwapwa seni ewe Samol mi Lapalap” epwe pwal álisikich le likiitú fán ekkewe sóssót repwe feito.—Ne. 8:10; Ipru 12:2.
4. Ifa ewe pwapwa mi tongeni torikich iei me lón mwachkkan?
4 Chókkewe Jiowa epwe amanawerewú seni ewe ránin kapwúng mi arapoto repwe sópweló le káé án Jiowa alen manaw. (Ap. 2:14) Ekkewe repwe manawsefál repwe pwal káé usun Jiowa. Pwal mwo lón ei fansoun, amwo sipwe áeá iteiten fansoun meinisin mi suuk ngenikich le apwóróusa usun Jiowa me an kewe angang mi amwarar!—Kölf. 34:1; 71:17.