Ámúrinnééló Tufichich Lón Ewe Angangen Afalafal​—Ammólnatá ewe Chón Imw fán Iten Ach Sipwe Liwiniti

PWATA A LAMOT:

Sia mochen achéchénú ewe pwikilin enlet sia fótuki. (1Ko 3:6) Ika sia chuuri emén mi mochen aúseling, a éch sipwe likiti eú kapas eis pwe sipwe pwóróusfengen wóón atun sia chuursefáli. Ena mettóch epwe amwétéresi ewe chón imw me ámecheresi ach liwiniti. Atun sia chuursefáli, sia tongeni apasa pwe sipwele pélúweni ewe kapas eis sia likiti ngeni.

USUN ACH FÉRI:

• Atun ka ammólnatá óm afalafal fán iten imw me imw, kopwe pwal ammólnatá eú kapas eis kopwe pélúweni atun kopwe liwin. Neman ena kapas eis a feito seni ewe puk ka anéúnéú, are eú kapas eis pélúwan a nóm lón eú me lein néúch kewe puk. Kopwe uwei ena puk atun ka liwiniti.

• Atun ka amuchaaló ámi pwóróusfengen me ewe mi pwapwaan aúseling, esile ngeni óm mochen fóssefál ngeni me likiti ngeni ewe kapas eis ka fen ammólnatá. Tingorei alen kopwe tikeri ika mi tufich.

• Ika ka affata ngeni ewe chón imw menni kulók kopwe liwin, kopwe chék liwiniti lón ena atun.​—Mat 5:37.