Ámúrinnééló Tufichich lón ewe Angangen Afalafal ren Ach​—Álisi Chón Káé le Feffeitá Ngeni Fangóló Manaw me Papatais

PWATA A LAMOT: A lamot pwe ekkewe chón káé repwe fangóló manawer ngeni Jiowa me papatais pwe repwe angei an chen. (1Pe 3:21) Chókkewe ra etipeeúfengeni manawer ngeni ar we pwon repwe kúna túmún lón ar riri ngeni Kot. (Kf 91:1, 2) Án emén Chón Kraist fangóló manawan, ena, ngeni chék Jiowa Kot nge esap ngeni aramas, och angang are eú mwicheich. Ina minne, a lamot pwe ekkewe chón káé repwe ámááraatá ewe tong me memmeefin kilisou ngeni Kot.​—Ro 14:7, 8.

USUN ACH FÉRI:

• Atun káé, pwóróusfengen usun met ewe lesen a pwári usun Jiowa. Ekilapei ewe álleaan Paipel iteiten rán me iótek ngeni Jiowa “fansoun meinisin.”​—1Tes 5:17; Jas 4:8

• Pesei noum chón káé pwe met epwe achocho ngeni lón an angang ngeni Kot, ina an epwe fangóló manaw me papatais. Pwal och, álisi le tikeri mettóch mi mecheres, choweán uwawu meefian atun mwich are afalafal ngeni chón órun me chienan kewe chón angang. Chechchemeni pwe Jiowa ese eriáni emén an epwe angang ngeni. Pwisin filien emén ika a mochen fangóló manawan.​—Tut 30:19, 20

• Pesei noum chón káé le féri ekkesiwil mi lamot ren an epwe apwapwaai Jiowa me fich an epwe papatais. (SF 27:11) Eli epwe lamot óm kopwe ákkálisi le pwilitawu napanap minen lóóm me pwilitalong napanap mi fé, pún ekkóch napanap me eérenian a kon weires le ekkesiwili. (Ef 4:22-24) Áiti ngeni ekkewe lesen “The Bible Changes Lives” seni ewe Watchtower

• Apwóróusa ewe pwapwa ka meefi lón óm angang ngeni Jiowa.​—Ais 48:17, 18