IFA USUN SIPWE AÚKATIW LAPÓLÓÓN KOPUT?

1 | Kosap Lifilifil Aramas

Paipel A Apasa:

“Kot esap lifilifil aramas, nge a etiwa aramas mi niuokusiti i o föri mine a pwüng seni ekewe mwü meinisin.”—FÖFÖR 10:34, 35.

Iei Weween:

Jiowaa Kot ese apwúngúkich alóngólóng wóón ika kich seni ia, ach lewo, anúwen únúchchach, are ach eéreni. Nge, a fen nefótófót wóón ekiekich me mochenich. Paipel a pwal affata pwe “aramas ra nenengeni lapalapen mesen eman,” nge Jiowa a “nenengeni leluken aramas.”—1 Samuel 16:7.

Minne Ka Tongeni Féri:

Inaamwo ika sise tongeni silei masouen letipen aramas, nge sia tongeni achocho le áppirú Kot me sisap lifilifil aramas. Kopwe achocho le silei emén me emén lap seni óm chék sileer ika iir seni menni kúmiin aramas. Ika ka meefi pwe ka eáni ekkewe esin memmeef ese pwúng usun ekkewe ekkóch eli pokiten iir seni pwal eú fénú are lewo, iwe kopwe tingorei Kot an epwe álisuk le urusawu ekkena esin memmeef me lón letipom. (Kölfel 139:23, 24) Ika ka tingorei Jiowa seni enletin letipom an epwe álisuk pwe kosap lifilifil aramas, ka tongeni lúkúlúk pwe epwe aúseling ngeni óm iótek me epwe álisuk.—1 Petrus 3:12.

a Jiowa ina iten Kot we. (Kölfel 83:18) Ewe kapasen lepoputáán lón ewe Paipel are Testamentin Lom me Testament Söfö, a apasa pwe “lon ewe Testamentin Lom sia nöünöü . . . ‘Samol mi Lapalap’ fän iten Jiowa ika Yahwe.”

“Esap fán eú ai upwe mómmóót ren emén mi pwech fán kinamwe . . . Iei ua chóni eú mwicheichen pwipwi wóón unusen fénúfan, iir enletin pwipwi.”—TITUS

Pwóróusen Manawen Emén—TITUS

A Úkú Seni An Oputa Aramas

Emén mwán itan Titus a fókkun song ren ekkewe allúkún mwú mi eimwumwu ngeni aramas, ina popun a fiti eú gang mi pwal eáni ena esin memmeef. Iei met a apasa: “Aua kan ló ren ekkewe leeni lón town, ikewe ese mumu ngeni ekkewe mwán iir black ar repwe nóm ie ren chék ám aupwe fiu, áwewe chék ren ekkewe hotel me bar.” Titus a esilla pwe koput a nemeni, me a pwal erá: “Ika aua ánini me emén mwán are fefin, iwe ngang ewe ua kan akkomw éfénú.”

Titus a poputá le siwililó atun a káé ewe Paipel ren Chón Pwáraatá Jiowa. Atun a álleani ewe Paipel a fókkun chúng letipan, ákkáeúin ren ewe pwon usun met epwe fis lón mwachkkan ngeni fénúfan, ikewe ie “esap chüen wor mäla ika letipeta ika kechü ika cheuch.”—Pwärätä 21:3, 4.

Akkomwan a fókkun weires ngeni Titus an epwe urusawu koput seni me lón letipan. A erá: “A fókkun weires ai upwe siwili ekieki me féfférúi.” Nge a kúna álillisin met a káé seni Föför 10:34, 35, ewe mi erá pwe Kot ese lifilifil aramas.

Ifa mwirilóón? Titus a erá: “Ua fókkun lúkú pwe Chón Pwáraatá Jiowa, ina ewe lamalam mi enlet pokiten ewe tong ra pwári lefiler, ese lifilifil ika iir seni menni fénú are mi fet anúwen únúcher. Pwal mwo nge me mwen ai papatais, emén chón ewe mwichefel i mi pwech, a etiwaei ngeni imwan we ám aupwe mwéngéfengen. Use fókkun lúkú pwe epwe tongeni fis ena. Esap fán eú ai upwe mómmóót ren emén mi pwech fán kinamwe, nge iei aua mwéngéfengen. Iei ua chóni eú mwicheichen pwipwi wóón unusen fénúfan, iir enletin pwipwi.”