IFA USUN SIPWE AÚKATIW LAPÓLÓÓN KOPUT?
2 | Kosap Liwini Ngaw Ngeni Ngaw
Paipel A Apasa:
“Are eman a föri mi ngau ngenikemi, ousap liwini ngeni lon föför mi ngau. . . . Oupwe föri mine oupwe kinamwefengen me aramas meinisin ren ükükün ämi tongeni. . . . Ousap liwini ngeni eman chappen an föför. . . . Pun a mak lon ewe Toropwe mi Pin, ‘Ngang üpwe ngeniir chappen ar föför, üpwe liwini ngeniir ükükün liwinin ar föför mi ngau, iei alon ewe Samol.’”—ROM 12:17-19.
Iei Weween:
Sia kan song ika emén a ámetekikich, nge Kot ese mochen ach sipwe liwini ngeni ena emén liwinin an ámetekikich. A fen pesekich ach sipwe mosonottam pún ekiseló chék epwele áwena meinisin féfférún pwúngúngaw.—Kölfel 37:7, 10.
Minne Ka Tongeni Féri:
Lupwen aramas tipis ra liwini ngeni emén minne a féri ngeniir, epwe fen chék alapaaló koput. Nge, ika emén a asongok are efeiengawok, kosap liwini ngeni. Achocho le nemeni meefiom me kinamwe ngeni. Eli epwe fen éch óm kopwe chék likitaló met a fis. (Än Salomon Fos 19:11) Fán ekkóch, eli a éch óm kopwe repotei met a fis. Áwewe chék, ika en ewe a fis ngonuk ewe osukosuk, ka tongeni filatá óm kopwe repotei ngeni police are pwal ekkóch sounemenem.
Óm liwini ngaw ngeni ngaw a pwisin efeiengawok
Ifa usun ika kese tongeni ataweei ewe osukosuk fán kinamwe? Are ifa usun ika ka fen achocho úkúkún óm tufich le ataweei fán kinamwe? Kosap liwini ngaw ngeni ngaw. Ena mettóch epwe fen alapaaló ewe osukosuk. Ika kese liwini ngaw ngeni ngaw, iwe a pwári pwe ka álisatá úkútiwen lapólóón koput. Kopwe lúkúlúk wóón ifa usun Kot epwe ataweei ewe osukosuk. “Kopwe lükü ngeni ewe Samol mi Lapalap manauom o apilükülük ngeni, nge i epwe alisuk.”—Kölfel 37:3-5.