IFA USUN SIPWE AÚKATIW LAPÓLÓÓN KOPUT?
3 | Urusawu Koput Seni Ekiekum
Paipel A Apasa:
“Oupwe mwüt ngeni Kot pwe epwe awilikemi o asöföla unusen letipemi. Mürin oupwe tongeni silei letipen Kot, ren met mi mürina me unusöch, pwal met mi apwapwai i.”—ROM 12:2.
Iei Weween:
Kot a áfánni ekkewe mettóch sia kan ekkekiekiir. (Jeremaia 17:10) A pwal wor met mi lamot sipwe féri me lúkún ach chék ttii senikich kapas are féffér mi fiti koput. Lapólóón koput a kan pop seni minne sia eáni ekiek me memmeef. Ina popun, a lamot ach sipwe urusawu sókkun koput seni me lón ekiekich. Ina chék alen ach sipwe tongeni enletin ‘asöfökichela’ me úkútiw le alapaaló koput.
Minne Ka Tongeni Féri:
Etittinafichi óm ekiek me memmeef usun ekkewe ekkóch, ákkáeúin usun chókkewe seni pwal eú lewo are fénú. Pwisin eisinuk: ‘Met ai ekiek usur? Minne ua ekieki usur, a lóngólóng wóón met ua silei usur? Are a lóngólóng wóón aapaap?’ Túmúnú sonuk ekkewe social media, kachito, are minen apwapwa me kunou mi masou ren angangen koput me féfférún akkachofesá.
Án Kot we Kapas a tongeni álisikich le urusawu koput seni ekiekich me letipach
Ese kan mecheres ach sipwe pwisin apwúngú ekiekich me meefiach fán wenechar. Nge án Kot we Kapas a tongeni álisikich le ‘apwüngü mochenich me ekiekin letipach.’ (Ipru 4:12) Ina popun, kopwe sópweló le káéfichi ewe Paipel. Apépéfengeni minne a eáni káit me óm ekiek. Mwirin, kopwe fókkun achocho le etipeeúfengeni óm ekiek ngeni minne Paipel a apasa. Án Kot Kapas a tongeni álisuk le okkufu ewe koput a fen té waran lón ekiekum me letipom.—2 Korint 10:4, 5.