IFA USUN SIPWE AÚKATIW LAPÓLÓÓN KOPUT?

4 | Okkufu Koput Ren Án Kot Álillis

Paipel A Apasa:

‘Ekewe uän ngün: chen, pwapwa, kinamwe, mosonotam, kirikiröch, aramasöch, allükülük, tipetekison me tipepwora.’—KALATIA 5:22, 23.

Iei Weween:

Ren án Kot álillis a tongeni úkútiw lapólóón koput. Án Kot we ngún mi fel a tongeni álisikich le eáni ekkewe napanap sise tongeni napanapeni wóón pwisin ach. Sipwe achocho le lúkúlúk wóón án Kot álillis le okkufu koput, nge sisap fen sótun pwákini wóón pwisin ach. Ika sia féri ena, sia tongeni meefieni meefien aposel Paulus ei, ewe mi erá: “Ngang mi tufich ren mettoch meinisin lon ewe emon mi apochokkulaei.” (Filipi 4:13, Testament mi Fö) Sia pwal tongeni apasa: “Alilisi epwe war me ren ewe Samol mi Lapalap.”—Kölfel 121:2.

Minne Ka Tongeni Féri:

“Jiowa a ekkesiwili ai manawen akkachofesá ngeni emén mi efisi kinamwe.”—WALDO

Iótek ngeni Jiowa seni letipom, me tingorei an we ngún mi fel. (Lukas 11:13) Tingorei an epwe álisuk le eáni ekkewe napanap mi múrinné lón manawom. Káé met Paipel a apasa usun ekkewe napanap repwe álisuk le úkútiw le eáni koput, áwewe chék ren tong, kinamwe, mosonottam, me nemeniéchú pwisin mochenum. Ppii ifa usun kopwe tongeni napanapeni ekkena napanap lón manawom. Me chiechi ngeni chókkewe mi pwal achocho le napanapeni ekkena napanap. Ekkena esin aramas ra tongeni apéchékkúla ngonuk óm kopwe “eäni chen me föför mürina.”—Ipru 10:24.

Pwóróusen Manawen Emén—WALDO

A Okkufu An Manawen Koput me Akkachofesá

A weires manawen Waldo lón an mámmááritá, ina popun a chék manaweni manawen koput. A erá: “Ua kan soun fiu ppen al ngeni ekkewe chón amémé drugs . . . Lón eú atun, eú gang a mééni emén mwán mi iteféúló lón an angangen ninni aramas, an epwe nieiló, iwe ua sú nge a chék wor eú pwosui.”

Waldo a oput án pwúlúwan we káé ren Chón Pwáraatá Jiowa. Iei alon: “Ua oput ekkewe Chón Pwáraatá Jiowa, me fán chómmóng ua ottekiir. Nge iteitan ra chék kinamwe ngeniei.”

Ló, ló, ló, Waldo a pwal káé ewe Paipel. A erá: “Ese mecheres ai upwe apwénúetá met ua kákkáé. Ua lúkú pwe ese tufich ai upwe nemeni ai mochen mwááneson.” Nge a káé eú pwóróus seni Paipel mi álisi le siwililó.

Iei met Waldo a erá: “Eú rán, Alejandro, ewe mi wisen káé ngeniei a tingoreei ai upwe álleani Kalatia 5:22, 23. . . . Alejandro a áweweei pwe ai ámááraatá ekkena napanap mi múrinné, ese lóngólóng wóón pwisin ai péchékkúl, nge Kot epwe álisiei ren an we ngún mi fel. Ena pwóróus a unusen ekkesiwili ai ekiek!”

Pokiten Waldo a lúkúlúk wóón án Kot álillis, a sópwéch lón an úkú seni an manawen koput. A apasa: “Aramasei kewe me chiechiei kewe rese fókkun lúkú úkúkún siwililóói.” A pwal erá: “Jiowa a ekkesiwili ai manawen akkachofesá ngeni emén mi efisi kinamwe.”