Atun Koput Epwe Mórófóchóló!
Inaamwo ika sia úkútiw le oputa ekkewe ekkóch, nge sise tongeni aúkatiw aramas seni ar eáni koput. Epwe chék sópwósópwóló án aramas oput chókkewe ese wor popun ar repwe oputer. Iwe, ié epwe tongeni unusen amóeló koput?
Jiowa Kot chék a tongeni unusen aúkatiw lapólóón koput. Ina met ewe Paipel a pwonei an epwe féri.—Än Salomon Fos 20:22.
KOT EPWE AMÓELÓ MET MI EFISI KOPUT
1. SATAN EWE TEFIL. Satan a efisi féfférún koput lón ei fansoun. Kot epwe nieló Satan me meinisin chókkewe mi oputa aramas usun chék i.—Kölfel 37:38; Rom 16:20.
2. ÁN SATAN EI ÓTÓT MI NGAW. Kot epwe amóeló meinisin met mi álisatá koput, kapachelong ekkewe néúwisin mwú mi pworoingaw me néúwisin lamalam mi apéchékkúla koput. Kot epwe pwal amóeló ekkewe business mi tipemmóng, pworoingaw, me kútta chék winner seni aramas.—2 Petrus 3:13.
3. TIPIS. Paipel a erá pwe aramas meinisin ra kan páe ngeni ar repwe eáni ekiek, memmeef, me féffér mi mwáál. (Rom 5:12) Eú me lein ekkena mettóch, ina ar oputa aramas. Kot epwe álisikich le okkufu meinisin ekkena sókkun memmeef mi mwáál pwe sókkun koput meinisin repwe móróló tori feilfeiló.—Aisea 54:13.
PAIPEL A PWONEI USUN EÚ FÉNÚFAN ESAP WOR KOPUT IE
1. ESAP WOR PWÚNGÚNGAW. Án Kot we Mwú epwe nemeni unusen fénúfan. Epwe nemenem seni láng me epwe atoto pwúúng wóón fénúfan tori feilfeiló chék. (Taniel 2:44) Esap chúen wor aapaap me eimwumwu. Kot epwe áwena meinisin féfférún pwúngúngaw aramas ra kúkkúna lón ei fansoun.—Lukas 18:7.
2. ARAMAS MEINISIN REPWE KINAMWEFENGEN. Esap wor ié epwe riáfféú ren féfférún akkachofesá are maun. (Kölfel 46:9) Meinisin aramas wóón ei fénúfan repwe kinamwefengen, me epwe iei eú leeni mi núkúnúkéch ar repwe nónnóm wóón.—Kölfel 72:7.
3. MEINISIN REPWE UNUSÉCH ME MANAW TORI FEILFEILÓ. Meinisin chón fénúfan repwe enletin tongei chón ourur kewe. (Mateus 22:39) Esap wor emén epwe chúen kúna riáfféú, pwal mwo nge riáfféú ren an chemeni minne mi ngaw a fis ngeni are eáni ekiek mi ngaw. (Aisea 65:17) Lupwen esap chúen wor koput, aramas repwe “pwapwaäsini ar feiöch me kinamwe mi somwola.”—Kölfel 37:11.
Ka mochen nóm lón eú fénúfan mi ina usun? Pwal mwo nge lón ei fansoun, chómmóng aramas ra kákkáé le likitaló koput ren ar apwénúetá án Paipel kewe kapasen emmwen. (Kölfel 37:8) Ina met Chón Pwáraatá Jiowa wóón unusen fénúfan ra féfféri. Inaamwo ika iir seni sókkopaten fénú me eéreni, nge ra tipeeúfengen me tongfengen.—Aisea 2:2-4.
Chón Pwáraatá Jiowa repwe pwapwa le áiti ngonuk met ra fen káé mi álisiir le likiitú ngeni pwúngúngaw me aapaap. Minne kopwe káé epwe álisuk le úkú seni koput me poputá le eáni tong. Ka tongeni káé ifa usun kopwe pwári tong pwal mwo nge ngeni chókkewe rese sile kilisou are chókkewe iir mi oputok. Ika ka féri ena, epwe lapóló pwapwaom iei, me oupwe ririéchfengen me ekkewe ekkóch. Nge lap seni meinisin, kopwe káé met ka tongeni féri pwe kopwe nóm fán nemenien án Kot we Mwú, ikewe esap chúen wor koput ie tori feilfeiló.—Kölfel 37:29.