Pwúng me Mwáál: Eú Kefil A Lamot Kopwe Filaatá
Ekkewe allúk ussun minne mi pwúng me mwáál sia filaatá le álleasochisiir, epwe fókkun kkúú manawach. Jiowa Kot a silei ena. Ina minne, a mochen ach sipwe álleasochisi an kewe allúk.
Jiowa a mochen ach sipwe eáni manaw mi kinamwe me pwapwa.
“Ngang ewe Samol mi Lapalap om we Kot. Üa aiti ngonuk mine kopwe feiöch ren, üa pwal emweni ngonuk ewe al kopwe fetal won. Amwo kopwe aüselinga ai kewe allük! Mürin om kinamwe epwe wewe ngeni eu chanpupu, nge om pwüng epwe wewe ngeni nomongun lematau.”—Aisea 48:17, 18.
Pokiten Kot I Chón Férikichetá, a silei ifa ussun sipwe áeáéchú manawach. A mochen ach sipwe álleasochisi an kewe emmwen pún ina met epwe échitikich. Atun sia álleasochisi án Kot kewe allúk, ese pwal lamot ach sipwe ekieki iká epwe fisiéch minne sia filaatá. Fansoun meinisin sipwe eáni ekkewe kefil mi múrinné, ekkewe epwe emmwenikich ngeni kinamwe me pwapwa.
Jiowa ese menei ngenikich ach sipwe féri ekkewe mettóch sise tongeni féri.
“Ei allük üa allük ngenikemi ikenai esap kon förea ngenikemi, esap pwal toweires ngenikemi.”—Tuteronomi 30:11.
Atun sia mochen álleasochisi án Kot allúk, eli epwe lamot ach sipwe siwili napanapen ekiekich me féfférúch. Iwe nge, Jiowa ese menei ngenikich ach sipwe féri met sise tongeni féri. Pokiten i ewe Chón Férikichetá, iwe a silei met sia tufichin féri. Iwe, atun sia sissileeló Jiowa, sipwe kúna pwe “an kewe allúk resap weires ngenikich.”—1 Jon 5:3.
Jiowa a pwonei an epwe álisi chókkewe mi filaatá le álleasochisi an kewe allúk.
“Ngang om Kot ewe Samol mi Lapalap üa amwöchü pöüifichum, pwal ngang ätewe mi ürenuk, ‘Kosap niuokus, ngang üpwe alisuk.’”—Aisea 41:13.
Ren án Jiowa álillis, sia tongeni álleasochisi an kewe allúk. A tongeni álisikich ren an we Kapas, ewe Paipel, ewe a kan awora ngenikich kapasen apéchékkúl me ápilúkúlúk.
Chómmóng aramas wóón unusen fénúfan ra fen kúna pwe ar álleasochisi án Paipel kewe kapasen emmwen, a émúrinnéló manawer. Kopwe alapaaló óm silei ussun ekkewe emmwen mi múrinné mi kawor me ren ewe Paipel. Ka tongeni poputá ren óm káé ewe puk Eáni Manaw mi Pwapwa Tori Feilfeiló! mi kawor wóón jw.org nge ese kamé. A masou ren ekkeei lesen:
Ifa Usun ewe Paipel A Tongeni Álisuk?
Ewe Paipel A Awora Ápilúkúlúk
Ka Tongeni Lúkú ewe Paipel?
Atun ka káé án Kot we Kapas, ewe Paipel, kopwe kúna pwe masouan ra chúen fichiitikich lón ei fansoun, me a “nonomopos tori feilfeilachök.” (Kölfel 111:8) Ach álleasochisi ekkewe allúk lón Paipel, ina ewe alen manaw mi fókkun múrinné seni meinisin. Iwe nge, Kot esap echchimwakich ach sipwe álleasochisi an kewe allúk. (Tuteronomi 30:19, 20; Josua 24:15) Ina eú kefil a lamot emén me emén kich sipwe pwisin filaatá.