Pwata Sipwe Etipeeüfengeni Manauach ngeni än Paipel Kapasen Emmwen?
ITÄ äitien Paipel kewe usun föfförün lisowu ra minen loom me äweires? Aapw. Pwe minne a äiti ngenikich usun ewe föfförün lisowu a älisikich le ti senikich:
▪ Semwenin sikepwach
▪ Pwopwo mwääl
▪ Riäfföü seni taloon pwüpwülü
▪ Mengiringirin mwelien letip
▪ Itengaw ren än emön eäni leenien angasangas
Jiowa Kot,a ewe Chon Föratä a mochen om kopwe pwapwaiti me feiöch seni om äeä an kewe liffang. Kot ewe Emön a “aiti ngonuk mine kopwe feioch ren.” (Aisea 48:17) Ikkeei ekkewe feiöch emön mi manaueni manauan me ren än Paipel kapasen emmwen usun föfförün lisowu epwe küna:
▪ Än Kot chen
▪ Kinamween ekiek
▪ Ririöch lon famili
▪ Iteüöch
▪ Meefi süfölün
Ifa usun ika kese manaueni ewe manau mi tipeeü ngeni met Paipel a apasa usun minne mi pwüng me mwääl? Epwe tufich ngonuk om kopwe siwili napanapen manauom? Itä Kot epwe apwunguk ren föfförum kewe me loom?
Ekieki mwo, ekkoch me lein ekkewe Chon Kraist lon fansoun ekkewe aposel ra piin föfföri föfförün lisowu mwääl me föfförün lisowu lefilen mwän me mwän me fefin me fefin. Ra filatä pwe repwe siwili napanapen manauer, iwe, ra küna feiöch watte. (1 Korint 6:9-11) Ikenäi, fite ngeröü aramas woon unusen fönüfan ra pwal siwili napanapen manauer. Ra pöütaalo manauer mi limengaw me küna feiöch ren ar etipeeüfengeni manauer ngeni än Paipel kapasen emmwen. Chechchemeni Sarah ewe sia fen pworausan me lepoputään, iei sopwosopwoloon pworausan.
“Ua Mwittir Meefi Ngas”
Sarah a mirititi pwe an pwisin föri mochenin lon manauan ese efisi an ngaselo me pwapwa usun met a fen äneänei. Iei alon: “Ua meefi pwe mwelien letipei a ngawolo. Ua säw me lolilen ika upwe pwopwo are epwe üriei eü semwen mi chou. Ua chüen lükü pwe mei wor emön Kot me ua silei pwe met ua filatä lon manauei a eletipechowu i. Ua meefi pwe ua limengaw me ua fokkun letipechou ren.”
Lo, lo, lo, Sarah a pöchökkülelo le siwili napanapen manauan. A kütta älillisin seman kewe me inan, iir Chon Pwäraatä Jiowa. A pwal kütta älillis seni ekkewe elter lon ewe mwichefel. Sarah a apasa: “Ua mäirü me pwapwa ren ewe tong mi pwichikkar semei kewe me inei me ekkewe elter ra pwäraatä ngeniei. Ua mwittir meefi ngas.”
Iei a wor rüüemön nöün Sarah. Iwe, a erä: “Ua wenechar le apworausa ngeni nei kewe usun ekkewe kefil ua fen filatä me loom. Ua mochen repwe weweiti ifa usun ai tunalo än Kot kewe kapasen emmwen a angawa manauei. Upwe achocho le älisiir le aücheani ekkewe feiöch mi pop seni än emön etipeeüfengeni manauan ngeni met Kot a apasa usun ewe föfförün lisowu. Weween, feiöch lon pekin inis, ekiek me memmeef. Ua lükü pwe Kot a ngenikich kapasen emmwen usun ewe manau mi limöch pokiten ese mochen ach sipwe letipechou.”
Kopwe pwal tongeni küna ekkewe feiöch ren om etipeeüfengeni manauom ngeni än Kot kapasen emmwen fän tong. Ewe Paipel a pwonei: “Än ewe Samol mi Lapalap öüröür ra pwüng, ra apwapwai lelukach. Än ewe Samol mi Lapalap kewe allük ra fat, ra awora mirit. . . . Eman mi apwönüetä epwe angei liwinin mi lapalap.”—Kölfel 19:8, 11.b
[Ekkewe Pwóróus fan]
a Jiowa, ina iten Kot we mi mak lon ewe Paipel.
b Eisini ekkewe Chon Pwäraatä Jiowa ren pwal ekkoch pworaus usun än Paipel kewe kapasen emmwen. Are mak ngeni ekkewe address mi mak lon pekin taropwe 4, ika ppii ewe Web site www.watchtower.org.
[Ekis Pwóróus lón pekin taropwe 8]
Fän chommong chokkewe mi tunalo än Paipel kewe kapasen emmwen ra lichippüng
[Ekis Pwóróus lón pekin taropwe 9]
Chokkewe mi manaueni manauer me ren än Paipel kewe kapasen emmwen ra eäni mwelien letip mi limöch me pwapwaiti ririöch lon famili