Itä mi Lamot ach Sipwe Silei Met Paipel a Apasa usun ewe Föfför Lefilen Mwän me Fefin?

Iei alon emön nengnginin Australia itan Sarah:a “Atun a engol ieri ua poputä le fiffiti ät. Le poputään, aua kamwöchüpöü me kiss. Mwirin, aua atapafengennikem me sotuni sokkopaten föfför mi amocheniakemitä. Atun a 15 ieri, ua poputä le angang me chommong chon angang mwän ra etto me mochen kon rei. Ua mochen pwora le fiti chienei chon angang lon met ra föri. Ua mochen chiechiei repwe saniei ina popun a lapolo ai sotuni sokkopaten napanapen föfförün lisowu.”

KESE mäirü ren om silei pwe Sarah a määritä lon eü famili mi achocho lon lamalam? Seni le kükkünün, seman kewe me inan ra achocho le äkkäiti le manaueni manau mi limöch me ren Paipel. Nge Sarah a filatä och sokkun manau.

Chommong repwe tipeeü ngeni met Sarah a filatä. Ra lükü pwe a fen minen loom met ewe Paipel a apasa usun föfförün lisowu. Chommong ra ekieki pwe esor ngawen än emön apasa pwe a achocho lon an lamalam nge a föri föfförün sikepwach.

Itä mi lamot om kopwe silei me etipeeüfengeni manauom ngeni met ewe Paipel a apasa usun föfförün lisowu? Lon 2 Timoti 3:16 a erä pwe ewe Paipel a mak fän emmwenien Kot me a “aüchea fän iten afalafala ewe kapas mi let.” Ika ka lükü pwe Kot a föratä aramas me ka ächiföüa pwe ewe Paipel ina an we Kapas, iwe, a lamot kopwe silei met a apasa usun föfförün lisowu.

Nge chommong ra osukosuk ren met ewe Paipel a apasa usun föfförün lisowu. Ekkewe nöüwisin lamalam mi erä pwe ra süföliti Paipel ra apöchökküla sokkopaten ekiek usun föfförün lisowu, nge ra tipefesen woor. Ren enletin, ei pworaus a etipefeseni chommong lamalam.

Pwata kese awora ekis fansoun le pwisin etittina ei pworaus lap seni om lükü alon ekkoch? Ewe lesen mwirin ei epwe äweweei engol kapas eis chommong aramas ra eäni usun met Paipel a apasa usun föfförün lisowu. Lon ena lesen, kopwe küna pölüwan mi fataffatöch me tichik mi longolong woon met ewe Paipel a wesewesen apasa. Ewe säingoon lesen lon ei pworaus epwe äweweei pwata ach kefil usun föfförün lisowu a wesewesen lamot.

[Pwóróus fan]