Kapas Eis Seni Chón Állea
Lupwen Jises a poputááni ewe Fááfen Ach Samol, ikkefa iir ekkewe 70 chón káé a tiiniireló ar repwe afalafal? Ra fen likitaaló?
Ese wor popun ach sipwe ekieki pwe pokiten ekkewe 70 chón káé rese nóm atun Jises a poputááni ewe Fááfen Ach Samol, iwe rese chúen ketiw me ren Jises are ra fen likitaaló Jises. I a mochen nónnóm ren néún kewe chék aposel lón ena atun.
Ekkewe 12 me ekkewe 70 iir meinisin néún Jises chón káé. Jises a akkomw filaatá me lein néún kewe chón káé 12 mwán, me a eita ngeniir aposel. (Luk 6:12-16) Jises a nóm Kalili atun “a kérfengeni ekkewe Engol me Rúúemén” me “tiiniireló ar repwe afalafala ussun ewe Mwúún Kot, me echikara ekkewe mi semmwen.” (Luk 9:1-6) Mwirin, lón Jutia “a filaatá pwal 70 me a tiiniireló ákkárúúemén.” (Luk 9:51; 10:1) Ina minne, a wor néún Jises kewe chón káé iir mi afalafala ussun i lón sókkopaten leeni.
Ekkewe chón Jus mi wiliiti néún Jises chón káé repwe chúen féri ewe Pasofer iteiten ier nge neman fengen me ar kewe famili. (Eks. 12:6-11, 17-20) Ekiseló me mwen án Jises epwele máló, i me néún kewe aposel ra feiló Jerusalem. Nge ese esilei ngeni meinisin néún kewe chón káé seni Jutia, Kalili, me Perea ar repwe feito ren me fitiir le féri ewe Pasofer. A ffat pwe Jises a mochen án néún kewe chék aposel repwe nóm ren lón ena atun. A ereniir: “Úa fókkun mochen oupwe etiei le mwéngé ei Pasofer me mwen ái úpwe kúna riáfféú.”—Luk 22:15.
A wor popun mi múrinné fán iten ena mettóch. Jises epwele máló pwe epwe ussun “ewe Lamen Kot, ewe a uwealó tipisin fénúfan.” (Jon 1:29) Epwe máló me lón Jerusalem, ikewe aramas ra kan ákkeáni ar asor ie. Ewe lamen Pasofer a áchchema ngeni ekkewe chón Israel pwe Jiowa a angasereló seni Isip. Nge ren án Jises asor, a féri eú angangen ngaseló mi kon lap seni ena. I epwe angasaaló aramas meinisin seni tipis me máló! (1 Kor. 5:7, 8) Án Jises asor, a atufichi án ekkewe Engol me Rúúemén aposel repwe wiliiti kinikinin féún lóngólóngun ewe mwichefelin Chón Kraist. (Efi. 2:20-22) Ewe puken Pwáraatá a apasa pwe ewe telinimw mi pin Jerusalem, a wor “12 féún lóngólóngun” mi mak wóór “iten néún ewe Laam kewe 12 aposel.” (Pwár. 21:10-14) Ewer, a fókkun aúchea wisen ekkewe aposel mi túppwél lón ar apwénúetá met Kot a tipeni. Ina minne, sia tongeni weweiti pwata Jises a mochen ar repwe nóm ren atun ewe sáingoon Pasofer me ewe epwe fis mwirin chék ena, ina ewe Fááfen Ach Samol.
Ekkewe 70 me ekkewe pwal ekkóch chón káé rese nóm ren Jises lón ena atun. Iwe nge, meinisin ekkewe chón káé mi túppwél repwe kúna feiéch seni ewe Fááfen Ach Samol. Meinisin ekkena chón káé mi wiliiti Chón Kraist mi kepit, repwe tolong lón ewe pwonen etipeeú fán iten eú mwú, ewe Jises a ereni néún kewe aposel lón ena pwinin.—Luk 22:29, 30.