Met Aramas Ra Käeö Seni Ar Nennengonuk?
1. Met ekkewe chon käeö ra käeö seni ar nennengeni Jises?
1 Jises a erä: “Oupwe pwilitalong ai iok, o kaeo seniei.” (Mt. 11:29) A ffat pwe Jises a asukula aramas ren an isetiw leenien äppirü mi mürinnö, nge esap chök lon an kapas. Ekieki minne ekkewe aposel ra käeö seni ar nennengeni Jises. A tipepwetete, kirekiröch, me tong. (Mt. 8:1-3; Mark 6:30-34) A wesewesen tipetekison. (Jon 13:2-5) Lupwen ekkewe chon käeö ra fiti Jises le afalafal, ra küna pwe i emön chon angang mi tinikken me lipwäköch le äiti ngeni aramas ewe enlet. (Luk 8:1; 21:37, 38) Ifa usun a chchüng letipen aramas ren ar nennengenikich?
2. Ifa usun foutach me napanapach lon ewe angangen afalafal a achchüngü ekkewe chon imw?
2 Ekkewe Chon Imw: Föütach mi fich, napanapöchüch, me ach eteneki aramas ra tongeni achchüngü letipen chon imw. (2 Kor. 6:3; Fil. 1:27) Ra esilla pwe sia kan nönnöünöü ewe Paipel iteitan. Ekkoch ra mwaar atun sia aüselingöch ngeniir fän süföl atun ra fos. Om isetiw leenien äppirü mi mürinnö epwe tongeni amwökütü aramas le etiwa pworausen ewe Mwu.
3. Ifa usun ach apwönüetäöchü wisach a tongeni achchüngü pwiich kewe?
3 Pwiich kewe: Ekieki ifa usun ach leenien äppirü epwe pwal achchüngü letipen pwiich kewe. Ach tinikken le akkafalafal a pwal tongeni etinikkeni pwiich kewe. Ach ammolnaöchü met sipwe apasa epwe achchüngü pwiich kewe ar repwe pwal angangöchülo le afalafal, usun chök mechä a kan ekkeni mechä. (SalF. 27:17) Ach mammakkeei iten chokkewe mi pwapwaiti le rongorong me achocho le mwittir liwinitiir epwe amwökütü pwiich kewe le föri ina usun. Sipwe achchüngü letipen pwiich kewe ren ach unusen apwönüetäöchü wisach le afalafal.—2 Tim. 4:5.
4. Fän ekkoch, pwata epwe öch sipwe pwisin etittinakich?
4 Fän ekkoch, pwata kese kan ppii ika ka isetiw leenien äppirü mi mürinnö ngeni ekkewe ekkoch ren om etittina om kapas me föfför? Ach leenien äppirü mi mürinnö epwe elingalo Jiowa me atufichikich le meefieni meefien ewe aposel Paul ei: “Oupwe apirüei usun ngang üa apirü Kraist.”—1 Kor. 11:1.