LESEN 4

Suuki Alen Néúnéún Wokisin

Mateus 22:41-45

MENLAPAN: Ammólnatá ekiekin ekkewe chón aúseling me mwen óm kopwe álleani eú wokisin.

Ekieki ewe popun ka álleani ewe wokisin. Mwen óm álleani ewe wokisin, álisi chón aúseling le silei menni pwóróus mi lamot ka mochen menlapei lón ewe wokisin.

Ekieki usun masouen ewe sópwun are puk lón Paipel ia ewe wokisin a feito me ie. Ika kopwe apasa ié ewe a kapas are ié a makkeei ewe puk lón Paipel, túmúnú pwe minne ka apasa epwe pwúng.
Ámmeef ngeniir pwe Paipel ina kapasen Kot. Lupwen kopwe fós ngeni aramas mi lúkú Kot, menlapei pwe Paipel ina án Kot Kapas. Óm féri ena epwe pwári pwe Paipel ina ewe popun tipachem mi múrinné seni meinisin.
Álisiir le pwapwaiti ewe wokisin. Eáni kapas eis epwe pélú me lón ewe wokisin, eppiietá eú osukosuk ewe wokisin a tongeni álillis ren kataween, are eppiietá eú kapasen emmwen ewe pwóróus lón Paipel epwe álisiir le weweiti.

Ekieki ika met ekkewe chón aúseling ra fen silei usun me lón ewe pwóróus me ewe wokisin. Féri an epwe amwasangasang óm eppiietá ekkewe wokisin pwal mwo nge ekkewe ra fen sissilei usun, me álisiir ar repwe pwal alapaaló ar weweiti weweer.