LESEN 15

Fós fán Lúkúlúk

1 Tesalonika 1:5

MENLAPAN: Pwári pwe ka wesewesen lúkúlúk pwe minne ka apasa mi enlet me a fókkun lamot.

Mmólnefichitá. Káéfichi ewe pwóróus tori óm esilla ekkewe menlapen pwóróus lón me weweiti ifa usun Paipel a ánnetatá pwúngúr. Achocho le apasa lón kapas mi mwoch me mecheres ekkewe menlapen pwóróus lón óm we afalafal. Nefótófót wóón ifa usun epwe álisi ekkewe chón aúseling. Tingor ewe manaman mi fel lón iótek.

Léúwommóng le asóssót óm afalafal pwe epwe ffatéch me lón ekiekum me epwe múrinnéló óm eáni.
Néúnéú ekkewe kapas mi pwári lúkúlúk. Kopwe kapas lón itiitin pwisin óm kapas, kosap chék ekkenniwili ekkewe kapas mi makketiw lón puk me metakkan. Fili ekkewe kapas mi pwári óm lúkúlúk wóón minne ka apasa.
Pwári pwe ka enletin lúkúlúk wóón minne ka apasa. Kapas fán úkúkéchún léúwóm. Mi éch kopwe nennengeni ekkewe chón aúseling ika pwe esap ásáwer.

Óm kapas fán lúkúlúk ese wewe ngeni óm kese pwári súfél, are óm péchéú are aumwesi aramas. Pwal mwo lón ekkewe atun ka tuwenewen lón óm fós seni letipom ngeni chón aúseling, kopwe achocho le achchúngú letiper fán tong.