1 Pokiten Mettóch A Tongeni Siwil

Ekkóch ra eáni áwewe pwe án emén pwisin nieló a usun án emén mochen amóeló metekin mékúran ren an pékúoló úwan. Neman epwe fókkun weires ngonuk óm kopwe lúkú pwe epwe wes óm riáfféú. Nge ren enletin a tongeni échúló nónnómum.​—Ppii ewe pwóór “Nónnómun Manawer A fen Siwil.”

Ikaamwo esap fis ena, nge a éch kopwe ataweei óm osukosuk ekis me ekis. Iei alon Jesus: “Ousap öürek usun ewe rän lesor, pun lesor epwe püsin anafa öürekin lon. Eu me eu rän epwe püsin wor osukosuk lon.”​—Mateus 6:34.

Nge epwele ifa ika nónnómum ese tongeni siwil? Áwewe chék eli a wor pwisin óm semmwen fansoun langattam. Are ka letipechou pokiten oua mufesen me pwúlúwom are a máló emén attongeom?

Inaamwo ika epwe ina, nge mi wor met ka tongeni siwili, ina ekiekum usun nónnómum. Ren óm káé le likiitú fan met kese tongeni siwili, kopwe tongeni poputá le eáni ekiek mi múrinné usun mettóch. (Än Salomon Fos 15:15) Ka pwal tongeni kútta alen óm kopwe likiitú fan nónnómum lap seni óm kopwe ekieki pwe máló chék a tongeni ataweei. Iwe, met mwirilóón? Eli kese tufichin nemeni nónnómum nge ka tongeni nemeni óm ekiek usun nónnómum.​—Hiop 2:10.

CHECHCHEMENI EI: Kese tongeni tééki eú chuuk ren óm kopwe ngaf fán eú chék, nge ka tongeni ren óm ekkeipweipwetá ekis me ekis. A pwal ina usun ren óm kewe osukosuk, inaamwo ika a kon watte usun eú chuuk.

MET KA TONGENI FÉRI IEI: Fós ngeni emén, eli emén chiechiom are emén chón óm famili, usun nónnómum. Eli eménna a tongeni álisuk le eáni ekiek mi múrinné usun nónnómum.​—Än Salomon Fos 11:14.

“Fän chomong aia küna riaföü, nge aisap fangatä. Fän ekoch aia tipemwaramwar, nge aisap apilükingau.”​—2 KORINT 4:8.