Ka Féri Met Kot A Apasa?

Eli kese tongeni eáni ei esin kapas ngeni emén kese sissilei: “Ereniei chék met ka mochen, ngang upwe pwapwa le féri.” Iwe nge, kese osukosuk le apasa ekkena kapas ngeni chiechiom mi áchengicheng. Chókkewe mi chiechiéch ra féri met emén me emén leir a tingor.

Ewe Paipel a pwáraatá pwe Jiowa a kan féfféri met epwe apwapwaai néún kewe aramas. Áwewe chék iei alon King Tafit, ewe a wor an ririéch ngeni Kot: “Ai Samol mi Lapalap ai Kot, ka föri chomong föför mi amwarar me om akot ngenikem, . . . repwe chomong seni ai üpwe tongeni aleaniir.” (Kölfel 40:5) Jiowa a pwal mwo nge féri minne a apwapwaai chókkewe resaamwo silei i, ‘a ngeniir ener o aura leluker ren pwapwa.’​—Föför 14:17.

Pokiten Jiowa a pwapwa le féri minne aramas repwe pwapwa ren, sipwe ekieki pwe chókkewe mi mochen repwe chiechien Kot repwe pwal féri met epwe ‘apwapwai lelukan.’ (Än Salomon Fös 27:11) Met sókkun mettóch kopwe fókkun féri pwe kopwe apwapwaai Kot? Paipel a pélúweni: “Ousap manlükala ämi oupwe föri föför mi öch o alilisfengen lefilemi, pun ena sokun asor Kot a pwapwa ren.” (Ipru 13:16) Itá weween pwe a naf ach sipwe chék féri féffér múrinné me álillisfengen ren ach sipwe apwapwaai Jiowa?

Iei alon Paipel: “Esap wor eman a tongeni apwapwai Kot are esap wor an lükü.” (Ipru 11:6) Nengeni pwe mwirin án Apraham eáni “lükü Kot,” a “iteni Chiechien Kot.” (James 2:23) Jesus Kraist a pwal menlapei ewe lamoten ach sipwe “lükü Kot” ren ach sipwe angei án Jiowa kewe feiéch. (Johannes 14:1) Nge ifa usun kopwe eáni ena lúkú, ewe Kot a kútta seni chókkewe a lukeiireto ren? Ka tongeni poputá ren óm kákkáé án Kot we Kapas. Óm féri ena, epwe atufichuk le “silei letipan” me féri “mine epwe pwapwa ren.” Iwe, lallapólóón óm sileéchú Jiowa me akkapwénúetá met ka káé usun an kewe emmwen mi pwúng, epwe apéchékkúlaló óm lúkú me Kot epwe fókkun arap ngonuk.​—Kolose 1:9, 10.