En Mi Silei?

Pwata aramasen Israel lóóm ra kan ménatiw liiwin fán iten ewe fin apwúpwúlú?

LÓN fansoun lóóm, ewe mwán are chón an famili ra kan méén ngeni familien ewe fefin liwinin ewe fin apwúpwúlú ika iir me ruu ekkewe famili ra tipeeú ngeni ar repwe apwúpwúlú. Ena liiwin a tongeni pisek mi aúchea, man, are moni. Fán ekkóch a pwal tongeni kamétiw ren angang, áwewe chék usun minne a fis ngeni Jakop, ewe a tipeeú ngeni an epwe angang ngeni semen Rahel we úkúkún fisu ier pwe epwe pwúlúweni Rahel. (Ken. 29:17, 18, 20) Ifa ewe popun ra kan féri ena?

Emén soukáé usun Paipel itan Carol Meyers a apasa: “Eú liiwin mi kamétiw ngeni familien ewe fin apwúpwúlú a tongeni ekkesiwili án ewe fefin angang, ewe mi aúchea ngeni ewe famili, manawer mi lóngólóng wóón angangen atake.” Liwinin ewe fin apwúpwúlú a pwal tongeni apéchékkúla ewe ririin chiechi lefilen ekkewe ruu famili. Chón ekkena famili ra tongeni álillisfengen lefiler lón fansoun mi áweires. Pwal och, ena liiwin a ánnetatá pwe emén fefin a kófót me epwele nóm fán túmúnúen pwúlúwan we nge esap chúen seman we.

Án ewe mwán ménatiw ngeni familien ewe fin apwúpwúlú ewe liiwin, esap weween nge itá neminna och minen amémé. Ewe puk Ancient Israel​—Its Life and Institutions a apasa: “Ei ééreni án ewe mwán ngeni familien ewe nengngin och moni, are pwal och mi léllé ngeni, usun itá a fis pwe a mééni och mettóch. Nge ena liiwin itá esap ina méén ewe fefin, nge usun ina chék och liiwin fán iten familien ewe fefin.”

Lón ekkóch fénú lón ei fansoun, aramas ra chúen eáni ei ééreni ar repwe ngeni familien ewe fefin och liiwin. Lupwen ekkewe sam me in Chón Kraist ra tingor och liiwin, iir repwe “tipepwetete ngeni aramas meinisin” ren ar resap tingor och watteen liiwin. (Fil. 4:5; 1 Kor. 10:32, 33) Ar féri ena, a pwáraatá pwe iir rese tongei moni, are tipemmóng. (2 Tim. 3:2) Pwal och, ika ekkewe sam me in Chón Kraist rese tingor och watteen liiwin seni kófótun néúr we nengngin, átena esap ámweta ewe fansoun apwúpwúlú tori an epwe naf úkúkún met epwe ménatiw ngeni ena famili. Are, kófótun néúr we nengngin esap meefi pwe mi lamot an epwele úkútiw le pioneer pwe epwe angang full-time pwe epwe tongeni ménatiw ewe úkúkún watteen liiwin.

Lón ekkóch leeni, a wor allúk ren fite úkúkún ewe liiwin epwe kawor fán iten ewe fin apwúpwúlú. Ika ina, ekkewe sam me in Chón Kraist ra álleasochisi ekkena esin allúk. Pwata? Pún án Kot we Kapas a allúkú ngeni Chón Kraist ar repwe “aleasochisi nöüwisen ewe mwü mi nemeniir,” me álleasochisi ar kewe allúk ika pwe ese ú ngeni án Kot allúk.​—Rom 13:1; Föf. 5:29.